Paghimo og Resonable nga mga Tumong nga Mahimo Nimong Makab-ut

Ni Chakell Wardleigh

Mga Magasin sa Simbahan

Gusto ba nimong molambo? mahimong mas maayo sa usa ka piho nga kahanas? magkat-on og bag-ong butang? Labing siguro nga kinahanglan nimong maghimo og mga tumong aron makab-ut kini.

Usahay mosulat kita og taas nga lista sa mga tumong ug maningkamot og maayo sa pagkab-ut niini, apan unya ato kining kalimtan o ato kining undangan. Pamilyar ba? Ngano kaha nga kon gusto nato nga mag-usab ug mahimong mas maayo, usahay dili kita makapadayon sa pagkab-ut sa mga tumong nga atong gihimo? Nan, kining tanan madeterminar kon unsa ka resonable ang atong mga tumong ug unsa ka dakong paningkamot ang andam natong buhaton!

Aniay pipila ka ideya kon unsaon sa paghimo og resonable nga mga tumong:

Paghimo og lain-laing mga tumong. Tutuki ang pagpalig-on sa daghang mga aspeto sa imong kinabuhi, dili sa usa lang. Ang Manluluwas mihimo og hingpit nga ehemplo: “Si Jesus mitubo sa kaalam ug sa gidak-on ug sa kahimuot kaniya sa Dios ug sa tawo” (Lucas 2:52). Buot ipasabut, mitubo Siya sa mental, pisikal, sosyal, ug espiritwal nga paagi. Makahimo kamo og mga tumong sa pagbuhat sa ingon. Ang pagkasayud nga ang imong mga tumong nagtabang kanimo nga mahimong mas maayo nga tawo makadasig kanimo nga mopadayon sa pagbuhat niini.
Isulat ang imong mga tumong. Ibutang ang imong mga tumong sa dapit nga makita nimo kini matag adlaw! Maanaa man kini sa bulletin board sa imong kwarto, sa imong locker sa eskwelahan, o gani sa imong telepono, ribyuha kini kanunay. Kon mas mapahinumduman ka sa mga tumong nga imong gihimo, malagmit nga mas mopadayon ka sa pagpaningkamot niini.
Himoa kining detalyado. Kon mobutang ka og “Magkat-on og bag-o” sa imong lista sa mga tumong, siguradong resonable kini nga tumong, apan dili kini piho. Unsa nga matang sa butang ang gusto nimong makat-unan? Bag-ong instrumento sa musika? Bag-ong resipe? Tingali usa ka bag-ong kalingawan? I-detalye kon unsay gusto nimo nga makab-ut!
Paghimo og mugbo og tagal nga mga tumong. Makahimo ka og dakong tumong alang sa imong kaugalingon, apan aron makab-ut kana nga tumong, kinahanglang magmalampuson ka sa gagmay nga mga tumong padulong sa pagkab-ut niini. Sa sukaranang paagi, magkinahanglan ka og plano. Sama pananglit, ingnon ta nga gusto nimong modagan og marathon niining tuiga. Aron makahimo sa pagdagan og 26 ka milya (42 km), kinahanglang mosugod ka sa gamay. Paghimo og tumong nga modagan og pipila ka milya matag semana, ug dugangi sa hinay-hinay ang imong distansya matag semana. Kon mohimo kita og mga plano sa pagkab-ot sa atong mga tumong, ang Dios motabang kanato sa pagkab-ut niini (tan-awa sa Mga Proverbio 16:9).
Gahini og panahon ang imong mga tumong. Tungod kay ang kinabuhi saku kaayo, mahimong sayon ang paghikalimot sa imong mga tumong tungod sa eskwela, trabaho, mga higala, ug pamilya. Apan kon mogahin ka og piho nga oras sa pagtrabaho sa imong tumong matag adlaw, matag semana, o unsa ka sagad nimo gusto, dako og kalagmitan nga mopadayon ka sa pagtrabaho niini.
Ayaw pagbuhat og sobra ra. Ayaw paghimo og daghan kaayo nga mga tumong nga maglisud na gani ka sa paghinumdom sa tanan nga giplanohan nimong buhaton. Kon magsugod ka og pipila lamang ka importante nga mga tumong imbis nga maningkamot sa pagkab-ut og dungan sa 40, dili kaayo ka mabug-atan ug mas masaligon sa imong mga paningkamot sa pagkab-ut niini. Kinahanglang mobuhat kita sa mga butang “sa kaalam ug kahusay; kay kini dili panginahanglan nga ang usa ka tawo kinahanglan modagan nga labaw pa kay sa iyang kusog” (Mosiah 4:27). Ug kon imong makab-ot ang usa ka tumong, mas dako og kalagmitan nga makakab-ut ka sa lain! Ang gagmay nga mga butang mosangput ngadto sa dagko nga mga butang.