Digital Lamang
Sa Katapusan Nakatambong sa Templo
Ang magpuyo sa gamay nga isla sa Caribbean nakapahimo sa pagbisita sa templo nga imposible.
Ang tagsulat nagpuyo sa Barbados.
Pipila ka tuig na ang milabay, wala gayud ko makadungog kabahin sa mga templo. Human sa pagdiskobre sa Simbahan hapit tulo na ka tuig ang milabay, ang mga templo daw mahitabo lang sa imahinasyon sa mga misyonaryo. Sa akong gamay nga Caribbean nga isla sa Barbados, ang ideya sa usa ka templo sa kalibutan ingon og bunga lang sa hunahuna nga nindot kaayo kon matinuod. Kon kini maanindot kaayo, nan nganong wala may usa ang Barbados?
Usa ka tuig human sa pag-apil sa Simbahan, sa katapusan mas nasabtan nako ang papel sa mga templo diha sa atong mga kinabuhi isip mga miyembro sa tinuod nga Simbahan sa Langitnong Amahan. Aduna koy dako kaayong tinguha sa pagbisita og usa ka templo nga labing duol sa akong gamay nga isla—ang Santo Dominggo Dominican Republic Temple.
Mga Kalisdanan ug Pagpangandam
Ang kantidad sa usa ka tiket sa eroplano paingon sa Dominican Republic mosubra pa sa pipila ka dolyares kay sa unsay naa sa akong account sa banko. Kalisdanan human sa laing kalisdanan nagtukmod kanako nga mahilayo gikan sa unsay akong gibati nga usa ka imposible nga tumong ang pagbisita sa templo. Apan ako nang nabatasan ang dili gayud mahikalimut niining kinutlo ni Presidente Thoma S. Monson (1927–2018): “Itumong kanunay sa inyong panan-aw ang templo. Ayaw pagbuhat og bisan unsa nga makapugong ninyo sa pagsulod ug pag-ambit sa sagrado ug mahangturong mga panalangin didto” (“Ang Balaan nga Templo—usa ka Suga sa Kalibutan,” Liahona, Mayo 2011, 93).
Usa sa labing dako nga kalipay niining kinabuhi mao ang kalipay nga dala sa templo. Sa pagkadungog sa mga misyonaryo nga namulong kabahin sa kalipay ug makasanap nga pagbati sa kalinaw nga kanunayng mopuno kanila kon sila mobisita sa templo kanunayng makapahimo nako nga maibog og gamay tungod kay bisan og nagpabilin ko nga mapasaligon sa akong mga pakigsaad, dili ko ingon ka bulahan sama nila, dili makahimo sa paglakaw o pagdrive ngadto sa kinaduolan nga templo. Tungod kay layo ang templo sa Dominican Republic, ingon og dili gayud ko makadawat sa mga panalangin nga naghulat nako didto.
Sa hapit na ko mawad-an sa tanang paglaum nga makabisita gayud sa templo, ang mga batan-ong hingkud sa Misyon sa Barbados Bridgetown mobiyahe sa Dominican Republic nakapahimo sa akong mga damgo sa templo nga matinuod. Ang pagpangandam maoy yawe. Ang pagsulod sa templo dili gamay o yano nga paningkamot, mao nga sa pagsugod sa tuig, nangandam ko sa paghimo og dakong kausaban aron sa pag-usbaw sa akong pagka-espirituhanon. Mas giseryuso nako ang pag-ambit sa sakrament, misugod ko sa pagpaminaw og maayo atol sa tigum sa sakrament, mihatag ko sa akong pagpamatuod kon makahigayon ko, ug gihunong nako ang teknolohiya nga makabalda kanako ug mihukom sa pagpahinungod sa akong mga oras sa simbahan aron sa pagkaplag og dugang nga mga paagi nga mas mobati og kabuhong sa Espiritu.
Sa katapusan …
Ang maandam sa espirituhanong paagi ug takus sa dili pa mosulod sa templo nagsiguro nga atong madawat ang mga panalangin nga giandam sa Langitnong Amahan alang kanato. Human sa malisud nga mga bulan, mga pagsulay, ug gani sa kamatayon sa akong minahal nga apohan nga babaye, walay pulong nga ikahulagway kon unsay akong nabati sa dihang una kong nakatunob sa nataran sa Dominican Republic Temple. Samtang nagbarug ko didto nga nanglugmaw ang mga luha sa akong mga mata, nabati nako ang Espiritu nga wala pa nako mabati sukad.
Atol sa daghang pagbisita sa templo niana nga biyahe, kanunay nakong ablihan ang akong Basahon ni Mormon ngadto sa partikular nga kasulatan. Usa kadto nga kanunay nakong basahon ngadto sa akong apohan nga babaye, bisan og dili siya miyembro sa Simbahan sa wala pa siya namatay. Naggikan kini sa 1 Nephi 3:7, nga mabasa “Ug nahinabo nga ako, si Nephi, miingon ngadto sa akong amahan: Ako moadto ug mobuhat sa mga butang nga ang Ginoo nagsugo, kay ako nasayud nga ang Ginoo dili mohatag og mga sugo ngadto sa mga katawhan, gawas kon siya moandam og paagi alang kanila nga sila unta makatuman sa butang diin siya misugo kanila.”
Nakahibalo ko inubanan sa tanang kasiguraduan nga ang Langitnong Amahan nag-andam og usa ka paagi alang nako aron makaabut sa templo ug nga pinaagi kadto sa Iyang balaan nga pagpanginlabot nga ako sa katapusan nakaabut didto. Kon diin adunay mga oposisyon o mga babag sa atong dalan, ang Langitnong Amahan mohimo og usa ka paagi alang kanato nga makapadayon, bisan kon ang dalan ingon og mangitngit. Ang templo tinuod gayud nga usa ka sagrado nga dapit diin makabati kita sa gugma sa Langitnong Amahan niining kalibutana.