Ang Katapusang Pulong
“Ayaw Kahadlok, Ako Nagauban Kanimo”
Ni Elder David A. Bednar
Sa Korum sa Napulog Duha ka mga Apostoles
Gikan sa usa ka debosyonal nga gihatag didto sa Brigham Young University–Hawaii niadtong Disyembre 15, 2012.
Usa ka inila nga lider sa militar kausa kusganong mipahayag: “Ayaw paimpluwensya sa inyong mga kahadlok.”1
Samtang atong ikonsiderar ang mga butang nga nahitabo libut kanato karon, tingali makakita kita og daghang mga rason nga mahadlok, magpanagana, ug maghunahuna kon ang mga butang sa atong kinabuhi mahitabo ba gayud sa paagi nga kanunay natong gipangandoy nga mahitabo.
Ang pipila kaninyo mahimong magduhaduha o makulangan og pagsalig sa inyong kaugalingong abilidad nga magmalampuson sa temporal ug espirituhanong paagi. Tingali maghunahuna kamo kon ang mga saad sa Ginoo nga suporta ug giya—nga dali ninyong namatikdan ug naila diha sa mga kinabuhi sa daghan kaayo nga mga tawo—makita ba usab diha sa inyong kinabuhi. Tingali dili kamo sigurado nga mopahimulos sa usa ka oportunidad tungod kay dili ninyo mapanglantawan ang tanang detalye kon sa unsang paagi mahitabo ang mga butang, ug busa nagpanagana kamo sa pagsugod ug paghimo sa unang mga lakang niana nga dalan. O tingali nabalaka kaayo kamo nga makahimo og sayop nga napakyas kamo sa paglihok uban sa pagtuo ug sa pagpadayon sa unahan ug sa ingon nadugangan ang kalagmitan sa mismong kapakyasan nga inyong gikahadlokan.
Ang dili magpaimpluwensya sa atong mga kahadlok nagpasabut lamang nga dili nato tugutan ang kahadlok ug kawalay kasiguroan nga maoy modeterminar sa atong dalan sa kinabuhi, nga negatibong moapekto sa atong mga kinaiya ug pamatasan, nga moimpluwensya sa dili tukmang paagi sa atong importanting mga desisyon, o mopatipas o mopalinga kanato gikan sa tanan niining kalibutan nga mahiyason, matahum, o maayo og dungog. Ang dili magpaimpluwensya sa atong mga kahadlok nagpasabut nga ang pagtuo diha ni Ginoong Jesukristo mobuntog sa atong mga kahadlok ug nga kita mopadayon sa unahan uban ang pagkamakanunayon diha Kaniya. Ang dili magpaimpluwensya sa atong mga kahadlok nagpasabut nga mosalig kita sa paggiya, kasiguroan, ug panahon sa Dios diha sa atong kinabuhi. Mosaad ko nga ang matag usa kanato mahimong mapanalanginan ug pagapanalanginan gayud sa giya, proteksyon, ug mahangturong kalipay samtang magkat-on kita nga dili magpaimpluwensya sa atong mga kahadlok.
Samtang mopakita kita og pagtuo diha kang Kristo ug mosalig sa Iyang mga saad, makalakaw kita ngadto sa kangitngit uban sa hingpit nga kasiguroan nga ang atong dalan pagadan-agan—bisan igo lang ang gilay-on nga mahimo ang sunod nga lakang—ug dayon ang sunod nga lakang—ug ang sunod nga lakang.
Si Joseph Smith mipahayag, “Wala kitay angay nga kahadlokan kon nagmatinud-anon kita.”2
Si Presidente Thomas S. Monson (1927–2018) mitambag, “Ayaw kahadlok. Pagmaya. Ang umaabut sama kahayag sa inyong hugot nga pagtuo.”3
Samtang moatubang kamo sa inyong umaabut uban sa pagtuo, ang Manluluwas mag-una kaninyo, maanaa sa inyong tuo nga kamot ug diha sa inyong wala, ug ang Iyang Espiritu maanaa sa inyong mga kasingkasing (tan-awa sa Doktrina ug mga Pakigsaad 84:88) sa tanan ninyong matarung nga mga paningkamot ug sa tanang mga adlaw sa inyong kinabuhi.