Pagsunod sa Akong mga Sumbanan

Ni Becky Craven

Ikaduhang Magtatambag sa Kinatibuk-ang Kapangulohan sa Young Women

“Mobarug ingon nga mga saksi sa Dios sa tanan nga mga panahon” (Mosiah 18:9).

Ang akong papa anaa kaniadto sa army, busa nagsige kami og balhin sa bata pa ko. Usa sa labing lisud nga mga butang kabahin sa pagbalhin mao ang pagbiya sa akong mga higala. Naglisud ko sa paghimo og bag-ong mga higala tungod kay maulawon ko. Salamat na lang, ang mga tawo kanunay nga mahigalaon sa eskwelahan ug sa Primary. Sa simbahan dili igsapayan kon unsa kita ka managlahi. Kitang tanan pulos mga higala.

Usa ka paagi nga nabuntog nako ang akong pagkamaulawon mao ang pagtabang diha sa simbahan. Nagsugod kini sa Primary. Mipaambit ko og kasulatan sa panahon sa pagpakigbahin. Mibasa ko og kusog sa klase. Sa hinay-hinay, mibati ko nga mas masaligon. Nakatabang kini kanako nga manalipud sa akong mga gituohan.

Sa dihang anaa na ko sa ikaupat o ikalima nga grado, ang akong pamilya nagpuyo sa Maryland, USA. Dili kaayo daghan ang mga miyembro sa Simbahan sa akong eskwelahan. Duna koy mga higala nga mga miyembro sa Simbahan ug mga higala nga dili miyembro.

Sa dihang tin-edyer ko, ang uban sa akong mga higala mihimo og mga butang nga supak sa akong mga sumbanan. Apan wala sila mosulay sa pagpabuhat niini kanako. Mapasalamaton ko nga ang akong mga higala mitahud sa akong mga tinuohan. Usahay mibati ko nga wala maapil tungod kay dili ko makahimo sa tanan nga gibuhat sa akong mga higala sa eskwelahan. Apan maayo kanunay ang akong gibati mahitungod sa pagsunod sa akong mga sumbanan. Nakahukom ko nga mosunod ko sa ebanghelyo, bisan unsa pa ang mahitabo. Mas nalig-on ang akong pagpamatuod diha sa Primary ug sa family home evening. Akong nasayran nga ako anak sa Dios.

Paglabay sa katuigan, akong nasayran nga duha sa akong mga higala sa eskwelahan mipasakop sa Simbahan. Nalipay kaayo ko! Misulti sila kanako nga ang pagtan-aw nila kanako nga nagsunod sa ebanghelyo sa batan-on pa kami nakatabang nila sa paghukom nga maminaw sa mga misyonaryo.

Akong minahal nga batan-ong mga higala, kamo mga anak sa atong Langitnong Amahan. Kon inyong hinumduman kining importante nga kamatuoran matag adlaw, ang pagsunod sa ebanghelyo mahimong mas sayon.