Pagpangalagad sa Mas Balaan nga Paagi

Hunyo 2019

Pagpangalagad sa Mas Balaan nga Paagi

Ni Elder Neil L. Andersen

Sa Korum sa Napulog Duha ka mga Apostoles

Gikan sa debosyonal nga pakigpulong, “A Holier Approach to Ministering [Usa ka Mas Balaang Paagi sa Pagpangalagad],” nga gipamulong didto sa Brigham Young University niadtong Abril 10, 2018.

Mosaad ko nga samtang mohigugma kamo sa Dios sa tibuok ninyong kasingkasing ug mag-ampo aron mahimong instrumento sa Iyang mga kamot, ang Ginoo mobutang sa Iyang espesyal nga mga anak diha sa inyong kinabuhi.

Ang basahon nga giulohan og The Narcissism Epidemic nagsugod sa nanobra nga mga ehemplo sa moderno nga kultura sa Amerika:

“Sa usa ka salida sa TV base sa reyalidad [reality show], usa ka batang babaye nga nagplano sa iyang ika-16 nga birthday party gusto nga maalihan ang usa ka dakong dalan aron ang usa ka banda mag-una og martsa sa iyang bongga nga pag-abut agi sa pula nga carpet. Usa ka basahon nga gitawag og My Beautiful Mommy mipasabut sa plastic surgery ngadto sa mga bata kansang mga inahan operahan alang sa nauso nga ‘Mommy Makeover.’ Posible na karon nga mo-hire og peke nga paparazzi aron magsunod-sunod sa pagkuha og litrato ninyo kon mogawas mo sa gabii—makadala pa gani kamo og peke nga hapin sa sikat nga magasin nga nagpakita sa mga litrato. Usa ka popular nga kanta mideklarar, nga walay tataw nga pagbugal-bugal, ‘Nagtuo ko nga ang kalibutan kinahanglang mag-agad nako!’ … Ang mga masuso magsul-ob og mga babero [bib] nga giburdahan og ‘Supermodel’ … ug magsupsop sa ‘Bling’ nga mga tsupon samtang ang ilang mga ginikanan magbasa sa pina-moderno nga mga nursery rhymes gikan sa This Little Piggy Went to Prada [Kining Gamay nga Baktin Miadto sa Prada].”¹

Isip mga disipulo ni Jesukristo, kusganon natong gisalikway ang ideya nga ang atong kinabuhi mahitungod ra sa atong kaugalingon. Hinoon, nagsunod kita sa Manluluwas, kinsa miingon:

“Bisan kinsay gustong magdako kaninyo, kinahanglan mainyo siyang sulugoon;

“Ug bisan kinsay gustong maghawod kaninyo, kinahanglan ma-inyo siyang ulipon:

“… Ang Anak sa tawo mianhi dili aron siya pag-alagaron kondili sa pag-alagad, ug sa paghalad sa iyang kinabuhi sa pagpakamatay ingon nga lukat alang sa daghan” (Mateo 20:26–28).

Atong gipakabililhon ang Iyang mga pulong:

“Maghigugmaay kamo ang usa sa usa maingon nga ako nahigugma kaninyo” (Juan 13:34; tan-awa usab sa Juan 15:12).

“Pakan-a ang akong mga nating karnero. … Tagda ang akong mga karnero” (Juan 21:15, 16).

“Sa mahibalik na ikaw kanako, lig-una ang imong mga igsoon” (Lucas 22:32).

“Tabang sa maluyahon, ipataas ang mga kamot sa nawad-an og paglaum, ug lig-una ang mga tuhod nga mahuyang” (Doktrina ug mga Pakigsaad 81:5).

Aniay usa ka ehemplo sa matang sa pagpangalagad nga sama kang Kristo nga nahitabo taliwala sa mga miyembro sa Simbahan sa Ginoo. Usa ka estudyante sa Brigham Young University bag-o lang misulat:

“Nagsinati ko og lisud kaayo nga panahon. Usa ka adlaw hilabihan ang akong panlimbasug ug hapit na ko mohilak. Nangamuyo ug nag-ampo ko sa hilum alang sa kalig-on nga mopadayon. Nianang higayuna gayud, ang akong kauban sa kwarto mipadala nako og text nga nagpahayag sa iyang gugma alang kanako. Mipaambit siya og kasulatan ug mihatag sa iyang pagpamatuod. Nakahatag kini kanako og dakong kalig-on ug kahupayan ug paglaum niana nga higayon sa kawalay paglaum.”

Mopaambit ko og pipila ka hunahuna nga hinaut makalig-on sa maayo nang paagi nga nangalagad kamo sa usag usa. Ang akong unang punto mao kini: Hinumdumi ang unang sugo sa dili pa ninyo gamiton ang ikaduha. Usa ka batan-ong lalaki miduol sa Manluluwas ug nangutana Kaniya:

“Magtutudlo, unsa man ang dakong sugo sa kasugoan?

“Si Jesus miingon kaniya, Higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong salabutan.

“Mao kana ang dako ug unang sugo.

“Ug ang ikaduha sulosama ra, nga mao kini, Higugmaa ang imong silingan sama sa imong kaugalingon” (Mateo 22:36–39).

Ang inyong abilidad sa paggamit og mas balaan nga pamaagi sa paghigugma sa inyong silingan, sa pag-amuma ug pagpangalagad sa uban, mag-agad kon unsa kalig-on ninyong gisunod ang unang sugo.

Laing Matang sa Pagpangalagad

Adunay talagsaon ug balaang gasa sa pagpangalagad nga moabut gikan sa tawo nga nahigugma sa Dios sa tibuok niyang kasingkasing; kinsa nahiluna na sa kinabuhi, mabuot, makanunayon, ug dili matarug sa iyang pagtuo kang Jesukristo ug sa gipahiuli nga ebanghelyo (tan-awa sa Mga Taga-Efeso 3:17; Mga Taga-Colosas 1:23; 1 Nephi 2:10; Mosiah 5:15; Alma 1:25; 3 Nephi 6:14); ug kinsa nagtuman sa mga sugo sa walay pagkasayop.

Tuguti ko nga mohatag ninyo og pipila ka konteksto nga inyo nang nahibaloan. Sa tibuok kalibutan, ang mas batan-ong henerasyon nawad-an na sa pagtuo ug ilabi na sa pagtuo niini sa usa ka piho nga relihiyon. Sa dihang migradwar ko gikan sa BYU niadtong 1975, ang gidaghanon sa batan-ong mga hamtong (nag-edad og 18 ngadto sa 24) nga konektado sa usa ka relihiyon hapit 90 porsyento. Karon anaa kini sa 66 ka porsyento. “Hingpit nga ikatulong bahin sa batan-ong mga hamtong wala magpasakop og bisan unsang organisado nga relihiyon.”²

Niadtong 2001, ang iskolar sa relihiyon nga si Robert C. Fuller misulat og libro nga gitawag og Spiritual, But Not Religious.³ Usa ka uso padulong sa personal nga pagka-espirituhanon gawas sa pormal nga relihiyusong mga organisasyon siguro tinuod 20 ka tuig na ang milabay, apan dili na kaayo kini tinuod karon. Ang batan-ong mga hamtong sa Estados Unidos karon dili na kaayo permi mag-ampo, dili na kaayo motuo sa Dios, dili na kaayo motuo sa Biblia, ug dili na kaayo motuo sa mga sugo.⁴ Ignorante ra ang motuo nga ang mga uso sa kalibutan dili makahimo sa pag-impluwensya kanato—bisan sa labing pinili.

Ang pag-amuma sa uban, sa pisikal ug emosyonal nga paagi, nagkinahanglan og matinabangon ug sensitibo nga kasingkasing. Kini nga pag-amuma usa ka importante nga bahin sa ebanghelyo. Gibuhat kini sulod ug gawas sa Simbahan sa maayong mga tawo, mga tumutuo ug dili tumutuo. Adunay daghang talagsaon, buotan nga mga tawo sa tibuok kalibutan, ug makakat-on kita gikan kanila.

Hinoon, ang talagsaon sa usa ka nakabig nga miyembro sa Ang Simbahan ni Jesukristo sa mga Santos sa Ulahing mga Adlaw mao ang lahi nga matang sa pagpangalagad. Isip mga disipulo sa Manluluwas, kita adunay mga oportunidad sa pagpangalagad sa paagi nga makatabang nga dili mapaling ang pagtuo sa usa ka higala, nga magpahinumdom sa usa ka kauban sa kwarto sa mabinationg paagi nga ang pagbasa sa Basahon ni Mormon matag adlaw makahatag gayud og mga milagro, ug nga nagpakita sa usa ka miyembro sa ward nga ang mga sumbanan sa Simbahan dili lang usa ka hugpong sa mga lagda apan usa ka paagi aron magpabilin kitang duol sa Dios ug makahatag kanato og kalipay.

Ang tawo nga adunay maayong mga tinguha makatabang sa usa ka tawo sa pag-ayo sa ligid, pagdala sa silingan ngadto sa doktor, maniudto uban sa tawo nga naguol, o mopahiyom ug motimbaya aron makapanindot sa adlaw. Apan ang sumusunod sa unang sugo natural nga modugang niining importante nga mga buhat sa pagserbisyo, moawhag sa tawo nga maayog kahimtang sa pagsunod sa mga sugo ug mopaambit og maalamon nga tambag sa paglig-on sa pagtuo sa tawo nga nagkaluya o nagkinahanglan og tabang nga makabalik sa dalan nga kaniadto gisubay.

Hagiton ko kamo sa paglig-on sa inyong mga paningkamot sa pagpangalagad sa espirituhanong paagi ngadto sa usag usa. Ang pagpangalagad sa espirituhanong paagi mahimong sugdan sa pagluto og cookies o pagdula og basketball. Apan sa katapusan, kining mas balaan nga paagi sa pagpangalagad nagkinahanglan sa pagbukas sa inyong kasingkasing ug inyong pagtuo, magbaton og kaisug sa pag-awhag sa positibong paglambo nga inyong nakita sa usa ka higala, ug sa pagpahayag og kabalaka mahitungod sa mga butang nga inyong nakita ug gibati nga wala mahisubay sa pagkadisipulo.

Dili kita magpakaaron-ingnon nga matarung, apan magmaisugon kita sa espirituhanong paagi sa pagpangalagad sa mas balaan nga paagi, ilabi na sa paglig-on sa pagtuo sa uban. Aron madasig ang inyong panghunahuna, ikonsiderar kining posible nga mga sitwasyon:

Nakabantay mo nga ang usa ka higala mogahin og dako-dakong panahon sa pagdula diha sa smartphone apan panagsa ra nga moapil sa pag-istoryahanay kalabut sa mga hilisgutan sa ebanghelyo.
Nagduda mo nga ang usa ka miyembro sa ward morag dunay problema sa pornograpiya.
Ang inyong mga higala migahin og dakong panahon sa pagkuha ug pag-post og mga litrato sa ilang kaugalingon nga daw dili tarung og sininaan.
Nakabantay mo nga ang usa ka tawo nga kaniadto ganahan nga mag-istorya mahitungod sa Basahon ni Mormon karon dili na gayud maghisgot niini.
Nakabantay mo nga ang usa ka sakop sa pamilya nga kaniadto ganahan moadto sa templo karon dili na moadto.
Nakabantay mo nga ang usa ka higala kinsa kaniadto namulong uban sa pagtuo mahitungod sa tambag sa propeta karon manaway na.
Nakaila mo og usa ka returned missionary nga kaswal na kaayo og sinul-oban sa sinina nga nagpakita sa mga pakigsaad sa templo.
Nakabantay mo nga ang usa ka miyembro sa ward mangitag rason aron moadto og laing mga dapit sa Dominggo gawas sa simbahan.
Nagduda mo nga ang usa ka higala misugod na sa pagkadili matinuoron sa gagmay nga mga butang.
Nakaila mo og tawo kinsa daw malipayon ug madasigon human makauli gikan sa misyon, apan karon dili na ingon ka malipayon ug madasigon.
Duna kamoy higala nga magpasiaw sa sagradong mga butang.
Duna kamoy higala kansang kasagmuyo sa pagpakig-date miabut ngadto sa “ang Dios wala mahigugma kanako.”
Inyong nakita ang pagtuo sa usa ka higala nga naapektuhan sa pagkadili takus ug nanginahanglan sa paghinulsol.

Napanglantawan ba ninyo kini nga mga sitwasyon o uban nga sama niini? Duna bay piho nga mga ngalan nga misantop sa inyong hunahuna? Si Apostol Pablo miingon, “Ang atong pakigdumog dili batok sa mga binuhat nga unod ug dugo, kondili batok sa mga punoan, batok sa mga kagamhanan, batok sa mga labawng agalon niining mangitngit nga kalibutan karon, batok sa mga dautan nga espirituhanong panon diha sa mga dapit sa kalangitan.” (Mga Taga-Efeso 6:12). Usa sa pinakadakong panginahanglan sa tibuok kalibutan mao ang pagbaton og dugang nga pagtuo diha sa atong Langitnong Amahan ug sa Iyang Anak, si Jesukristo, ug mas dakong kaandam sa pagsunod sa mga sugo.

Pagpangalagad ngadto sa Usa ka Tawo

Kon atong sundon ang sundanan sa Manluluwas, kadaghanan sa atong pagpangalagad mao ang gikan sa usa ka tawo ngadto sa lain. Ngadto sa babayeng Samarianhon sa atabay, ang Manluluwas miingon:

“Ang tanan nga magainom niining tubiga pagauhawon pag-usab:

“Apan bisan kinsa nga magainom sa tubig nga akong igahatag kaniya dili na gayud pagauhawon. …

“Ang babaye miingon kaniya, Senyor, hatagi ra ko nianang tubiga aron dili na ako uhawon. …

“[Dayon miingon siya] Ako nasayud nga ang Mesias, siya nga ginatawag og Kristo: inig-abut na unya niya, siya mao ang magasaysay kanato sa tanang mga butang.

“Si Jesus miingon kaniya, Ako nga nakigsulti kanimo mao siya” (tan-awa sa Juan 4:13–15, 25–26).

Bisan sa pagdeklarar sa Iyang pagkabalaan, si Jesus nangalagad ngadto sa usa.

Dili sama sa pag-ilis sa na-flat nga ligid, ang usa lang ka kasinatian sa pagpangalagad talagsa ra nga makaayo og espirituhanong problema. Magkinahanglan kini og panahon, pakig-istorya, ug makadasig nga mga kasinatian nga motabang sa pag-ugmad og balik sa pagtuo. Moabut kini nga mas sama sa yamog sa langit kay sa usa ka bugwak sa hose sa sunog. Kinahanglang mangalagad kamo sa makadaghan samtang tabangan ninyo ang usa ka tawo nga mobalik ngadto sa Dios ug mosalig pag-usab sa Manluluwas ug sa Iyang Pag-ula.

Aron mangalagad sa pamaagi sa Ginoo, magkinahanglan kita sa tabang sa Espiritu Santo. Si Presidente Russell M. Nelson kusganong namulong mahitungod niini nga hilisgutan atol sa kinatibuk-ang komperensya sa Abril 2018, “Sa umaabut nga mga adlaw, dili na posible ang espirituhanong pagsugakod kon wala ang giya, direksyon, ug makahupay nga impluwensya sa Espiritu Santo.”⁵

Midugang si Presidente Nelson, “Giawhag ko kamo nga palapdan pa ang inyong kasamtangang espiritwal nga abilidad sa pagdawat og personal nga pagpadayag.”⁶ Mitambag siya kanato sa pag-ampo, pagpaminaw, sa pagsulat sa atong mga hunahuna, ug sa paglihok.

Magamit ba nato kini sa pagpangalagad sa mas balaan nga paagi? Mag-ampo kita, maminaw, morekord sa atong mga hunahuna, ug molihok kalabut niadtong kinsa mahimo kitang mangalagad.

Pag-ampo og mga oportunidad sa pag-ugmad og pagtuo sa uban. Dili tanan nga inyong tabangan mao ang mga tawo nga inyong kaila. Sa dihang si Jesus nangalagad sa biyuda sa Nain, nagpadulong Siya sa siyudad. Hinoon, nakita Niya siya, nalooy kaniya, ug mibuhi sa iyang anak nga lalaki gikan sa patay. Ang Iyang pagpangalagad miusab sa iyang kinabuhi (tan-awa sa Lucas 7:11–15).

Pag-ampo nga ang mga oportunidad sa pagpangalagad moabut kaninyo, maminaw, isulat ang inyong mga hunahuna, ug dayon andam nga molihok samtang makasugat kamo og mga tawo.

Kanunay akong matandog sa hilak sa Salmista: “Sud-onga sa akong toong kamot, … kay walay bisan kinsa nga tawo nga nakaila kanako: sa dalangpanan, wala ako makakaplag; walay bisan kinsa nga tawo nga may kaawa alang sa akong kalag” (Salmo 142:4). Atong tabangan kadtong mibati niini nga paagi.

Paggahin og Panahon alang sa Espiritu

Aron makaangkon sa tabang sa Espiritu Santo, kinahanglan nga andamon nato ang atong hunahuna ug kasingkasing. Sa atong henerasyon, nagkinahanglan kita og disiplina ug pagpugong sa atong paggamit sa mga himan sa teknolohiya. Si Adam Alter, sa iyang libro nga Irresistible, namulong mahitungod sa makaadik nga kinaiya sa teknolohiya ug social media. Gikutlo niya si Greg Hochmuth, usa sa mga enhinyero nga miugmad sa Instagram, kinsa mikomentaryo, “Kanunay nga adunay laing hashtag nga i-klik. Dayon mora na kini og dunay iyang kaugalingong kinabuhi, sama sa usa ka organismo, ug ang mga tawo mahimong dili na kapugong.”⁷

Midugang si Mr. Alter: “Ang Instagram, sama sa daghan pa nga mga plataporma sa social media, walay kahumanan. Walay hunong ang feed sa Facebook; ang Netflix awtomatik nga mopadayon sa sunod nga hugna sa usa ka serye; ang Tinder nag-awhag sa mga tiggamit nga magpadayon sa pag-swipe aron sa pagpangita og mas maayo nga opsyon. … Sumala ni Tristan Harris, usa ka ‘design ethicist [tigtuon sa pamatasan sa pagdesinyo sa social media],’ ang problema dili ang kakulang sa kusog sa kabubut-on sa katawhan; ang problema mao nga ‘adunay daghan kaayong tawo nga migamit usab sa ilang computer niana nga website aron sa pagguba sa imong pagpugong sa kaugalingon.’”⁸

Mipadayon si Mr. Alter: “Ang usa ka like sa Facebook ug Instagram makapalipay kanato, ingon man ang ganti sa pagkompleto og misyon sa World of Warcraft, o makita ang usa sa inyong mga tweet nga gipaambit sa gatusan ka mga tiggamit sa Twitter. Ang mga tawo nga mimugna ug mihashas sa teknolohiya, mga dula, ug interactive nga mga kasinatian maayo kaayo sa ilang trabaho. Mohimo sila og liboan ka mga pagsulay uban sa minilyon ka mga tiggamitan aron masayran kon hain nga mga kausaban ang mosalir ug hain ang dili—unsa nga kolor sa background, mga font, ug mga tono ang labing makapaapil sa mga mambabasa ug makapaminos sa kasagmuyo. Samtang molambo ang usa ka kasinatian, mahimo kining dili kapugngan, hilabihan ka epektibo nga bersyon sa kasinatian kaniadto. Niadtong 2004, ang Facebook makalingaw; [karon,] kini makaadik.”⁹

Aron ang Espiritu makapuyo sulod kanato, kinahanglang aduna kitay panahon ug luna. Pagkat-on nga ibutang ang inyong smartphone. Pag-iskedyul og panahon nga ang inyong teknolohiya tuyo nga dili magamit.

Panahon sa kinatibuk-ang komperensya sa Abril 2018, si Presidente M. Russell Ballard, Akting nga Presidente sa Korum sa Napulog Duha ka mga Apostoles, miingon: “Daghan kaayo ang mitugot sa ilang kaugalingon nga hapit na lang mogahin sa tibuok nilang kinabuhi diha sa internet gamit ang ilang mga smart device—ang mga screen nga magdan-ag sa ilang panagway sa adlaw ug gabii ug motaud sa ilang mga dunggan og mga earphone nga mobabag sa ligdong, hinagawhaw nga tingog sa Espiritu. Kon dili kita mangita og panahon sa pagtangtang sa mge electronic device, mahimong mawala kanato ang mga oportunidad nga makapaminaw sa Iyang tingog kinsa miingon, ‘Humilum kamo, ug ilhon ninyo nga ako mao ang Dios’ [Salmo 46:10]. Karon, walay sayop sa pagpahimulos sa kalamboan sa teknolohiya nga dinasig sa Ginoo, apan kinahanglan gayud nga magmaalamon kita sa paggamit niini.”¹⁰

Paglig-on sa Usag Usa

Atol sa akong undergraduate nga mga panahon sa BYU, gawas sa akong asawa, si Kathy, kansang mahangturong impluwensya imposibleng masukod, duha ka roommate—ang usa sa wala pa ko magmisyon ug ang usa pagkahuman—nakaumol pag-ayo sa akong espirituhanong pundasyon. Ang usa mao si Reid Robison, karon propesor sa BYU sa organizational behavior. Nahimamat nako siya sa akong misyon, ug nahimo kaming mga roommate pagkahuman. Ang katukma ni Reid sa pagsunod sa mga sugo, ang iyang gugma alang sa propeta, ug ang iyang dili matarug nga pagpamatuod sa Manluluwas nakapalig-on kanako ug tanan niadtong naglibut kaniya. Ug padayon siya nga nahimong ehemplo kanako sulod sa milabayng 45 ka tuig.

Ang laing roommate nga akong gihisgutan mao si Terrel Bird, nga karon nagpuyo sa St. George, Utah, USA. Akong nahimamat si Terrel samtang dungan kaming mitambong sa high school sa Pocatello, Idaho, USA. Bisan tuod kauban kaming magdula og basketball, ang among pagkahigala nahitabo samtang nakaobserbar ko sa iyang espirituhanong pagkahingkod. Dayag niyang ipaambit ang espirituhanong mga ideya nga anaa kaniya ug ang mga baruganan sa kinabuhi nga iyang gibasa ug nakat-unan. Nasurprisa ko nga makadungog niining mga butanga gikan sa usa ka 17 anyos. Nakahukom mi nga mag-uban og kwarto sa BYU.

Niadtong panahona, kami walay mga computer; kami adunay mga typewriter. Kuhaon ni Terrel ang mga kasulatan nga makahuluganon kaniya ug mga kinutlo nga makasilsil og pamatasan, i-type kini, ug dayon tipigan kini sa usa ka gamay nga kahon aron matan-aw niya kini kanunay. Komon ra alang niya nga adunay sobra sa usa ka libo ka mga kasulatan ug mga kinutlo, nga daghan niini iyang gisag-ulo. Bisan tuod nagtrabaho ko—manglimpyo sa librarya kada buntag gikan sa alas 4:00 hangtud alas 7:00—ug adunay puno nga iskedyul sa mga klase, sa pagtan-aw kang Terrel, misugod ko sa paghimo og akong kaugalingong butanganan nga kahon.

Ania ang usa sa mga kinutlo nga mahinumduman gihapon nako sa hapit 50 ka tuig na ang milabay:

Ang hunahuna mao ang Hawud nga gahum nga mohulma ug mohimo,
Ug ang Tawo usa ka Hunahuna, ug kanunay niyang gigamit
Ang himan sa Panghunahuna, ug, sa pagmugna sa bisan unsang iyang gusto,
Mosangput sa usa ka libong kalipay, usa ka libong kasakit: —
Maghunahuna siya sa tago, ug mahitabo kini:
Ang iyang palibut nagpakita lamang sa unsay iyang gihunahuna.11

Nakahinumdom usab ko, siyempre, og gamhanan nga mga kasulatan sama niini:

“Ako mao ang pagkabanhaw, ug ang kinabuhi; ang mosalig kanako, bisan siya mamatay, mabuhi siya:

“Ug ang tanan nga buhi ug nagasalig kanako dili na gayud mamatay” (Juan 11:25–26).

Mitabang si Terrel nga akong mabutang sa akong hunahuna isip usa ka freshman sa BYU ang mga pulong sa kasulatan ug mga pulong sa kaalam nga nakaimpluwensya kanako sa tibuok nakong kinabuhi. Magpasalamat ko ni Reid Robison ug Terrel Bird tungod sa pag-amuma kanako sa espirituhanong paagi sa usa ka panahon nga nakahimo kini og kalainan.

Aniay balak nga gisulat sa akong silingan nga si Thomas L. Kay:

Salamat sa Dios sa tanang mihatag og kahupayan
niadtong tinud-anay nga nagpakabana
Kinsa misuporta sa mga mahuyang
ug nangamuyo alang kanila diha sa pag-ampo
Salamat sa Dios alang niadtong nakadungog sa kasingkasing
ug naminaw sa mga pulong
Kinsa nasayud nga ang usa ka pagtan-aw o malumong paghikap
maoy labing importante sa tibuok kalibutan
Salamat sa Dios alang niadtong mipataas sa mga kamot
ug milig-on sa huyang nga mga tuhod
Kinsa mipahiuli og mga kalag
sa hilom nga pagpangalagad.12

Minahal nakong mga higala ug kaubang mga disipulo, mohatag ako kaninyo sa akong siguradong pagsaksi nga ako nasayud nga ang Manluluwas buhi. Siya nabanhaw. Siya ang naggiya niining balaan nga buhat. Si Presidente Nelson mao ang Iyang dinihugan nga propeta dinhi sa yuta. Ang atong panahon dinhi sa yuta importante sa mahangturong paagi.

Mosaad ko nga samtang mohigugma kamo sa Dios sa inyong tibuok nga kasingkasing, mag-ampo nga mahimong instrumento sa Iyang mga kamot, mangalagad sa mga indibidwal, mopalambo sa inyong kapasidad sa pagdawat og pagpadayag, ug mosalig sa impluwensya sa Espiritu Santo, ang Ginoo mobutang sa Iyang espesyal nga mga anak diha sa inyong kinabuhi ug mamahimo kamo nilang tigpangalagad nga mga anghel, mopanalangin sa ilang kinabuhi sa kahangturan. Mangalagad kamo sa mas balaan nga paagi.

Mag-ampo ko nga mamahimo kining importante kaninyo samtang mopadayon kamo niining labing importante nga dalan sa atong mortalidad. Mohatag ako kaninyo sa akong lig-on ug sigurado nga pagsaksi sa Manluluwas ug sa inyong mahangturong bili ngadto Kaniya ug nga Siya moanhi pag-usab ug mogakos kanato isip Iyang mga anak, isip Iyang mga disipulo.