Ang Akong Misyonaryo nga Damgo Natuman na sa Katapusan
Jean Daniel Daroy
Ontario, Canada
Paghulagway pinaagi ni Katy Dockrill
Sulod sa daghang katuigan, nagdamgo ko nga moserbisyo og full-time nga misyon. Apan sa dihang miuli ko human mogradwar sa unibersidad, akong nakita nga gikinahanglan kaayo ko sa akong pamilya. Dili maayo ang panglawas sa akong amahan, ug ang pamilya nagkinahanglan og pinansyal nga tabang. Isip ang kamagulangan sa upat ka anak, gibati nako nga magpabilin sa panimalay ug motabang. Ang Langitnong Amahan mipanalangin kanako og arang-arang nga trabaho. Bisan tuod dili kini dako og sweldo, igo kining makabayad sa akong galastuhan.
Sa matag higayon nga gipangutana ko kabahin sa pagserbisyo og full-time nga misyon, mitubag ko nga magmisyon ko. Sa matag higayon nga mosulti ako niini, hinoon, ang akong inahan motan-aw kanako uban sa nagsagol nga kahinam ug kaguol sa iyang mga mata. Nasayud ko nga kon mohangyo ko nga magmisyon, mosugot siya ug hilum nga tagoan ang iyang kabalaka nga mawagtangan og kinitaan ang pamilya.
Milabay ang pipila ka tuig, ug usa ka takus nga naghupot sa pagkapari [priesthood] mihangyo kanako nga makigminyo kaniya sa templo. Misugot ko, ug sa wala madugay napanalanginan kami og tulo ka anak—duha ka babaye ug usa ka lalaki. Usa sa among labing dako nga kalipay mao ang pagbiya sa among anak nga lalaki alang sa iyang misyon. Usa ka diwa sa kahupayan ug kalinaw ang mipuno sa panimalay. Gibati nako nga usa ka bahin sa akong tinguha nga moserbisyo og misyon natuman.
Nalipay kaayo ko sa dihang ang akong kamagulangang anak nga babaye miingon nga gusto usab niya nga moserbisyo og misyon. Matag semana diha sa natad sa misyon, padalhan ko niya og mga istorya sa iyang buhat. Ang iyang pagpamatuod midasig kanako ug mipuno kanako sa diwa sa misyonaryo. Nag-ampo ko matag adlaw alang sa misyonaryo nga mga oportunidad.
Usa ka adlaw, nadasig ko sa pagpangutana sa usa ka higala pinaagi sa pribado nga mensahe sa social media kon interesado ba siya nga mahimamat ang mga misyonaryo. Miingon siya, “Oo!” Misulat ko sa usa ka porma sa online referral diha sa LDS.org, ug wala madugay ang mga misyonaryo misugod sa pagtudlo kaniya. Pagkahuman sa tulo ka bulan nagpasakop siya sa Simbahan. Misunod ang iyang mga anak paglabay sa pipila ka bulan. Sumala sa paggiya sa Espiritu kanako, midapit ko sa ubang mga higala nga maminaw sa mga misyonaryo. Sa dihang miuli ang akong anak nga babaye, gibati usab nako nga nakahuman ko og 18 ka bulan nga misyonaryo nga pagserbisyo.
Ang Langitnong Amahan nasayud sa mga tinguha sa akong kasingkasing ug unsa ang labing maayo alang sa akong pamilya ug kanako. Mapasalamaton ko nga gihatag Niya kanako ang akong tinguha nga moserbisyo isip misyonaryo, nga dugay na kaayo nakong gitinguha.