Mga Apostoles sa tibuok Kalibutan

Si Elder Cook Mibisita sa Brazil

Si Elder Quentin L. Cook ug Sister Mary Cook miadto sa Brazil aron sa pagbisita sa mga miyembro sa Simbahan. Miadto sila aron motudlo ug mopaambit sa gugma ni Jesukristo.

Gibisita nila ang dakong siyudad sa Belo Horizonte. Ang ngalan niana nga siyudad nagpasabut og “matahum nga kapunawpunawan.” Miingon si Elder Cook nga ania dinhi ang labing nindot nga mga pagsalop sa adlaw nga iyang nakita sukad!

Daghang mga tawo ang mitambong aron maminaw ni Elder Cook nga namulong sa usa ka komperensya sa stake. Gidapit niya ang tanan nga mahimong kahayag. Nagpasabut kana nga mahimong maayo nga ehemplo ug motabang sa uban, sama sa gibuhat ni Jesus.

Ang mga bata nalipay kaayo nga makahimamat sa usa ka Apostol sa Dios!

Si Elder ug Sister Cook mibisita og missionary training center. Ang mga misyonaryo nagpaambit sa kahayag ni Jesukristo matag adlaw!

Unsaon nimo nga mahimong kahayag diha sa panimalay, sa kasilinganan, o sa eskwelahan?

Kon usa kita ka kahayag, maimpluwensyahan nato ang kalibutan alang sa mas maayo. —Elder Quentin L. Cook

Paghimo og Parol

tasang papel [paper cup]

puncher o hait nga lapis

flashlight o glow stick

1. Gamita ang puncher o lapis sa paghimo og mga lungag libut sa tasa. Duslaki usab og mga lungag sa ilawom o tangtanga kini sa hingpit (pangayo og tabang gikan sa usa ka hamtong).

2. Adornohi ang imong kopa bisan unsa nga imong gusto. Dayon ibutang ang suga o glow stick ilawom sa kopa.

3. Palunga ang mga suga ug tan-awa ang imong parol nga modan-ag!

Tip: Kon ikaw walay mga tasang papel, mahimo ka nga molukot og construction paper ug ipapilit ang mga kilid niini.

Tan-awa ang Pagsalop sa Adlaw

Paggahin og panahon nga motan-aw ug malingaw sa pagsalop sa adlaw sama sa gibuhat ni Elder Cook. Pagdrowing og hulagway sa pagsalop sa adlaw nga imong nakita. Dayon paghunahuna og usa ka klasmeyt, silingan, o sakop sa pamilya nga nagkinahanglan og higala. Pahayaga ang ilang adlaw pinaagi sa pagpaambit sa imong hulagway.