Makatabang ba ang Atong Pagpangalagad aron Mamaayo ang Uban?

Usa ka Dominggo, naglingkod ko sa miting sa sakrament nga namalandong sa dihang akong nabasa sa akong mga kasulatan nga kinahanglan kitang mohimo sa mga buhat nga gihimo sa Manluluwas (tan-awa sa 3 Nephi 27:21). Naghunahuna ko, “Unsa man ang mga buhat ni Kristo dinhi sa yuta?” Labi nakong nahunahunaan ang duha ka butang: pagserbisyo ug pagpang-ayo. Mahimo nako ang pagserbisyo, apan ang pagpang-ayo?

Ang konsepto sa pagpang-ayo kanunay nakong gipamalandungan. Nakasinati na ako og 16 ka pag-opera sa akong kinabuhi ug mihimo na og daghang pagpaayo! Apan naghunahuna ko kon unsaon nako nga mahisama ni Jesukristo ug motabang nga mamaayo ang uban. Siguradong wala ako sa makaayo nga mga gahum nga Iyang gihuptan. Busa sa unsang paagi man Niya gusto nga akong mahimo ang Iyang mga buhat sa pagpang-ayo dinhi sa yuta? Unsa may akong mabuhat?

Samtang namalandong ko kon sa unsang paagi ang uban mitabang nako nga mamaayo, ang akong hunahuna nabuksan ngadto sa talagsaong mga buhat sa pagpang-ayo—paghupay, pagserbisyo, ug pagpangalagad—nga nabuhat sa uban alang kanako sa akong kinabuhi. Uban sa atong pagtutok sa pagpangalagad sa uban sa mga paagi nga buhaton sa Manluluwas, kini nga konsepto sa pagtabang sa uban nga mamaayo usa ka gamhanan nga konsepto. Kitang tanan mag-antus panahon sa atong mortal nga kinabuhi dinhi sa yuta. Daghan kaayo ang adunay pisikal o mental nga mga sakit o nag-antus sa espirituhanong paagi. Kitang tanan nagkinahanglan nga mamaayo. Sama sa akong gipasabut sa akong artikulo (pahina 20) ug sama sa gitudlo ni Elder Neil L. Andersen sa iyang artikulo (pahina 12), kitang tanan makaapil sa pagpangalagad ngadto sa uban sa mga paagi nga makatabang kanila nga mamaayo.

Matinuoron,

Merrilee Boyack