Nagatuo Kami sa Pagkahimong Hingpit—diha ni Kristo

Panahon sa Iyang Wali sa Bukid, si Jesus mihatag kanato sa lisud nga sugo nga magmahimong hingpit (tan-awa sa Mateo 5:48). Apan tungod kay kitang tanan masayop, sa unsang paagi ang Dios naglaum kanato sa pagsunod niini nga sugo? Pinaagi sa pagkaangkon og husto nga pagsabut sa mga gilauman sa Dios kanato, mahimo natong masayran kon unsay gipasabut ni propeta Moroni dihang miingon siya nga mahimong “hingpit diha kang Kristo” (tan-awa sa Moroni 10:32–33).

Unsa Gipasabut sa Pagkahimong Hingpit?

“Ang Greyigo nga pulong alang sa hingpit mahimong hubaron nga ‘kompleto, nahuman na, hingpit nga milambo’ (sa Mateo 5:48, footnote b). Ang atong Manluluwas nagsugo nato nga mahimong kompleto, nahuman na, hingpit nga molambo—sa paghingpit sa mga hiyas ug kinaiya nga gipakita Niya ug ang atong Amahan sa Langit.”¹

“Ang kahingpitan nga gipanglantaw sa Manluluwas alang kanato mas labaw pa kay sa walay sayop nga pagbuhat. Kini mao ang mahangturong gipaabut ingon nga gipahayag sa Ginoo diha sa iyang pangamuyo nga pag-ampo ngadto sa iyang Amahan—nga unta kita mahimong hingpit ug makapuyo uban kanila sa mga kahangturan sa umaabut.”²

“Nagtuo ko nga dili tuyo ni Jesus nga ang Iyang wali niini nga hilisgutan mahimong mga pulong sa pagpangdukdok kanato kabahin sa atong mga kakulangan. Dili, nagtuo ko nga gituyo Niya kini nga usa ka pasidungog kon kinsa ug unsa ang Dios nga Amahan sa Kahangturan ug unsay mahimo natong makab-ot uban Kaniya diha sa kahangturan.”³

Unsay Gipaabut sa Dios

“Ilimud ang inyong mga kaugalingon sa tanan nga dili diosnon … ug mohigugma sa Dios uban sa tibuok ninyo nga gahum, hunahuna ug kusog” (Moroni 10:32).
Uban sa pagtuo diha ni Jesukristo, maghinulsol kon kita masayop.
Motuman sa mga pakigsaad, o mga saad, nga atong gihimo ngadto sa Dios.
Mobuhat sa atong labing maayo sa pagsunod sa mga sugo sa tibuok natong kinabuhi.
“Padayon diha sa pagpailub hangtud kamo mahingpit” (Doktrina ug mga Pakigsaad 67:13).

Unsay Wala Gipaabut sa Dios

Mahimong hingpit karon! Dili gayud mohimo og mga sayop.
Mabug-atan tungod sa kinaiya sa pagkamahingpiton [perfectionism].
Kanunay nga nagkapuliki—pulos trabaho ug walay dula.
Mahinawayon sa kaugalingon tungod sa kakulang sa kalamboan.
Mag-una sa tanang butang—mas maayo kay ni bisan kinsa.
Maningkamot nga mahimong takus sa langit pinaagi sa “paghimo og daghang maayong butang nga dili maghinulsol”.

“Ang pagsabut sa libreng matubsanong gugma nga gihatag sa Manluluwas makapalingkawas nato gikan sa gituohan sa kaugalingon, sayop, ug dili reyalidad nga mga gipaabut kon unsa ang pagkahingpit.”

Elder Gerrit W. Gong sa Korum sa Napulog Duha ka mga Apostoles, “Pagkahimong Hingpit diha kang Kristo,” Liahona, Hulyo 2014, 42.