Makahimo Kita og mas Maayo: Pag-abiabi sa Uban ngadto sa Panon
Ania ang upat ka mga paagi nga makatabang kamo sa bag-o ug mibalik nga mga miyembro nga mobati nga sila nahisakop.
Sulod sa usa ka bulan human sa bunyag ni Melissa (ang tanang mga pangalan giusab) diha sa Midwestern sa Estados Unidos, siya mihalad sa pangbukas nga pag-ampo sa sakrament miting. Nakulbaan siya sa pag-ampo atubangan sa kadaghanan apan “nabati ang matag pagsalig sa akong abilidad sa pagpakigsulti sa akong Langitnong Amahan,” siya miingon. “Tungod kay, nag-ampo man ko sulod sa mga katuigan, ilabi na samtang nag-imbestigar pa sa Simbahan, ug nabati ang Espiritu Santo nagtabang kanako.”
Mao nga nakalitan siya nga nakadawat og email gikan sa usa ka miyembro sa ward nga mihulagway “sa maayong pagkadetalye” nga ang tanan niyang pag-ampo sayop. Kaulaw, ug ang bug-at nga pagbati sa pagduha-duha ang milukop sa hunahuna ni Melissa hangtud nga naaghat siya sa pagtawag sa mga returned missionary kinsa mitudlo kaniya. “Diha-diha dayon mipasalig siya kanako nga dili gayud tukma alang niini nga miyembro sa pagdaot kanako sa ingon nga paagi,” siya miingon. “Gisultihan usab ko niya nga ang bishopric dili gayud mohangyo sa lain nga miyembro, kay ako nagtuo, ang bishopric maoy nagsugo nga ipadala kanako kining matang sa feedback.”
Nahupay, si Melissa nagpabilin nga aktibo diha sa ward, midawat og mga calling, ug mipadayon sa paglambo sa iyang hugot nga pagtuo. Apan kini midangat pa og pipila ka bulan aron mabuntog ang kasakit ug ang pagkawala sa pagsalig gumikan sa nadawat nga makasagmuyo nga email.
Ang nakabati, sa istorya ni Melissa mao nga kini dili na bag-o. Daghang bag-o ug namalik nga mga miyembro ang nagsagubang sa dagko, apan sa kasagaran malikayan, nga mga hagit gumikan sa pagbati nga sila wala nahisakop. Usahay bisan kadtong dunay lig-on og pagpamatuod nanglimbasog nga magpabiling matinud-anon kon sila mobati nga walay labut. Sa bag-ong video nga serye nga giulohan og Panaghiusa diha sa Kalahian, ang mga lider sa Simbahan namulong bahin niining isyu, nag-awhag sa mga miyembro nga mahimong mas sensitibo, tigpaapil, ug mahigugmaon sa atong inter-aksyon.
Ang mosunod nga mga istorya makatabang sa pagpakita kon unsaon nato sa paggamit kining mga baruganan isip mga miyembro ug magtanyag og tinuod nga panaghigalaay ug emosyonal nga suporta alang niadtong nagtinguha og maayo nga dawaton diha sa Simbahan sa Ginoo.
Magmahigalaon diha sa Hugot nga Pagtuo
“Kon dunay mosulod sa chapel, kinahanglan mobati dayon sila nga gihangop ug gihigugma ug nabayaw ug nadasig… . nga molakaw ug mahimong mas maayo tungod kay sila nasayud nga ang Ginoo nahigugma kanila ug sila adunay mga higala diha sa ilang tinuohan.”
—Carol F. McConkie, Unang Magtatambag sa Kinatibuk-ang Kapangulohan sa Young Women
Si Melissa nagkinahanglan og tinuod nga mga higala, ilabi na sa iyang ward, nga ilang kaduolan kon siya nagkinahanglan og tambag o tabang. Ang iyang bana ug anak nga babaye wala moapil kaniya sa pagpasakop sa Simbahan.
“Ang pagsimba ug magtan-aw sa tanang mga pamilya nakapabati nako sa hilabihang pag-inusara,” miingon siya. Ang tanan mahigalaon, apan bisan ang ilang kalipay nga nakahimo kaniya nga mobati sa ingon og “dili gayud ako makaangkon kanang kasanag sa pagka-Mormon tungod kay ako lang ang bugtong tawo nga may mga problema.”
Agig dugang sa returned missionary nga mitudlo kaniya, si Melissa napanalanginan nga nakaila si Cindy, usa ka higala sa Internet kinsa unang mipaila-ila kaniya ngadto sa Simbahan. “Lisud ang magtan-aw ni Melissa nga nanglimbasug sa iyang lokal nga dapit samtang ako mitan-aw nga walay matabang,” pasabut ni Cindy. “Mao nga nagbuhat ko og usa ka pribado nga mga grupo sa Facebook uban sa pipila ka mga miyembro nga mahigugmaon kaayo, nagkalain-lain nga mga miyembro kinsa mitabang ug nakighigala kaniya sa mga paagi nga dili nako mahimo nga ako lang.”
Ang grupo dili lamang nagtanyag ni Melissa sa pagbati nga gi-welcome samtang siya nahiluna sa iyang ward apan mitubag usab sa mga pangutana bahin sa estilo sa kinabuhi sa Mormon ug sa mga problema nga pangkultura. “Gipadako ko nga magsul-ob og sleeveless ug mubo kaayo nga shorts” miingon si Melissa. Mapasalamaton siya sa mga higala sa internet kinsa mitubag nga dunay mga litrato sa mga sinina nga iyang matan-aw sa lokal nga mga tindahan. Nakadasig kini kaniya sa paghangyo sa mga sister sa iyang ward og mga rekomendasyon sa mga salida human nga dili na siya komportable sa iyang mga pinili nga nakolekta.
Usa ka importante nga aspeto sa panaghigalaay, gipasabut ni Melissa, mao nga siya nangayo og tambag. Ang pagdawat og tambag nga wala pangayoa mao ra og pagpanglapas imbis pagpaapil, usa ka pagpanghilabot sa privacy nga mahimong makapasakit niadtong dili pa andam niini.
Sa katapusan, si Melissa gitawag aron magtudlo sa Relief Society. Ang iyang calling naghatag kaniya og mga oportunidad sa pagpakigdait sa uban diha sa ward. Gipakigbahin ni Melissa ang iyang mga kalisud dili lang sa pag-adjust isip usa ka bag-ong miyembro apan nagsagubang usab siya og usa ka autistic nga bata, pipila ka mga isyu sa personal nga panglawas, ug “Oy, ang akong iro kamatyunon.” Ang kasinatian nga adunay ubang mga sister nga maminaw ug motubag sa ilang kaugalingong mga kalisud diha sa klase ug sa pribado nga panag-istoryahanay napamatud-an gayud nga makaayo. Kini nga mga koneksyon nakatabang ni Melissa nga mobati nga siya sa katapusan adunay tinuod nga mga higala diha sa hugot nga pagtuo.
Paapila ang Tanan
“Ang Manluluwas misugo sa Iyang mga sumusunod nga ‘maghigugmaay sa usag usa; maingon nga ako nahigugma kaninyo’ (Juan 13:34; emphasis gidugang). Mao nga atong tan-awon kon unsa ka dako ang Iyang paghigugma kanato. … Kon ato Siyang himoon nga atong ehemplo, kinahanglan kitang maningkamot kanunay sa pagtabang sa pagpaapil sa tanan.”
—Elder Dallin H. Oaks sa Korum sa Napulog Duha ka mga Apostoles
Si Robert, usa ka investigator sa Canada, mitambong og lain-laing mga miting ug mga kalihokan sa LDS. Siya nagsiksik sa lain-laing mga relihiyon apan nagpadayon sa pagtuon sa Simbahan tungod sa pagdasig nga iyang nakaplagan sa doktrina niini ug sa Basahon ni Mormon. Nagtambong siya sa institute nga nakakat-on ug nakakaplag og sosyal nga kahimtang “makapahimuot nga kanindot, mahigalaon, uban sa usa ka maayo kaayo nga bation”, siya miingon. “Ang mga Mormon mao ang kinanindotang mga katawhan sa kalibutan.”
Si Robert usa ka manggi-ulawaon nga tawo, ug gustong makig-istorya, apan mas pilion niya nga magpadaplin kay sa makigkulokabildo sa grupo, dili sigurado kon unsaon nga mahimong kabahin sa mga grupo, ang uban kanila mga higala nga dugay nang mga LDS nga ingon og wala na nagkinahanglan ni bisan kinsa nga tawo.” Apan dali ra siyang natabangan nga mabuntog ang gibati nga pag-inusara. Atol sa kalihokan, siya nahinumdom, “dunay tawo nga miduol nako human sa panihapon ug miawhag kanako nga magpabilin sa salida; kon wala pa, mobiya na unta ko, apan nakaangkon hinoon ko og talagsaong higayon. Nagkinahanglan lang gyud ko nga makahibalo nga dunay tawo nga gusto nga naa ko didto.”
Sama ni Melissa, nakadayeg siya sa LDS nga mga higala kinsa ipasabut ang doktrina apan dili na kaayo piho mahitungod kon unsaon sa pagsunod niini. Ang mga higala nga maminaw labaw pa kay sa ilang pag-awhag sama ra sa “usa ka tawo nga miabay kaninyo sa paglakaw, sukwahi sa magtulod gikan sa luyo aron mopaspas ang imong paglakaw. Sa kasagaran, mapandol ug madagma lang kamo.”
Si Robert nanglimbasug sa pag-undang sa pagpanigarilyo. Ang iyang pagkadili komportable naghulagway kon sa unsang paagi kadtong mga bag-o pa nga masayud niining mga kalainan. “Wala gayuy usa ka miyembro nga nagsulti og bisan unsang butang bahin nako nga nanimaho kong sigarilyo,” miingon siya. “Apan kon ang akong sinina dili bag-ong laba, mopabilin ra ko sa balay kay sa moadto sa institute o sa simbahan.”
Makahimo kita og mas dakong pagbati nga nahisakop samtang kita modasig ug mopaapil niadtong mga bag-o pa sa Simbahan. Si Elder D. Todd Christofferson sa Korum sa Napulog Duha ka mga Apostoles miingon, “Makapaguol kaayo kini kanako kon dunay tawo nga moabut nga tabangonon kaayo ug moingon … , ‘ganahan ko dinhi,’ ug unya baliwalaon o walay usa nga interesado. Subo kaayo kana. Kinahanglan mas maayo pa kita niana” (“Is There a Place for Me?” [video], lds.org lds.org/media-library).
Ibutang ang Inyong Kaugalingon sa Ilang Dapit
“Kon kamo mopili nga ibutang ang inyong kaugalingon sa ilang dapit, nakapanalangin kamo sa kinabuhi sa uban. … Makaako ba kamo og tan-aw sa tawo nga nagpalahi sa gawas, naglain og lingkod? … Kon magkat-on kamo sa paghigugma ug pagdawat sa ubang tawo, makita ninyo nga kitang tanan managsama ra.”
—Jean B. Bingham, Kinatibuk-ang Presidente sa Relief Society
Human si Elsa nagpamiyembro sa Simbahan sa Netherlands, nakasinati siya og tinuod nga koneksyon uban sa usa ka mahigugmaong Langitnong Amahan. Apan isip usa ka young single adult, siya usab nakasinati og pag-inusara sa dihang ang mga sakop sa pamilya ug mga higala dili na komportable uban sa iyang bag-ong tinuohan ug mga gawi. “Ang labing maayo nga nahimo sa mga miyembro para nako,” siya miingon, “mao ang kaandam makighigala kanako gawas sa simbahan. Ang uban makig-adto sa templo aron mopahigayon og mga pagbunyag bisan og sila endowed na. Kinahanglan kong makig-istorya sa mga miyembro gawas sa Dominggo aron makakuha og kalig-on ug molahutay hangtud sa katapusan.”
Gibati ni Elsa nga morag ang iyang labing dakong hagit isip bag-ong kinabig mao “ang gilauman ko nga makasabut dayon sa tanang butang”, siya miingon. “Tanang mga acronym, mga panghitabo, mga calling. Bug-at kaayo kini sa hunahuna, ug usahay mabalaka ko nga ang mga tawo mohukom nako tungod sa dili paspas ang pagkat-on.” Dugang pa, sama sa kadaghanan, nakasinati siya og sosyal nga mga kabalaka nga “mas komportable ko nga maglingkod sa luyo sa chapel, nga talagsa ra makig-istorya.” Ang dagkong mga pundok makapakulba, ug maghunahuna siya nga ang uban mohukom niya tungod sa kakulang sa iyang partisipasyon. “Wala man kana magpasabut nga dili ko ganahan moapil sa mga leksyon o dayag nga mokanta sa mga himno o moampo atubangan sa kadaghanan,” pasabut niya. “Mahadlok lang gyud ko basin mokalit lang ko og hilak atubangan niining mga tawhana nga wala pa gayud kaayo nako makaila.”
Si Sister McConkie miingon: “nakaila ko og mga tawo nga magsimba kada Dominggo aron nga sila madasig ug mabayaw ug kinsa mobiya nga gibati nga gihukman ug wala higugmaa—wala kinahanglana, sama ra nga walay luna alang nila diha sa simbahan. Kinahanglan nato kining usbon.”
Ang mga miyembro nga dili manghukom, si Elsa miingon, nakatabang kaayo niya. “Sila maminaw sa akong mga problema ug wala manghilabut sa akong personal nga dapit. Molihok sila uban sa sinseridad ug sa pailub samtang nagkat-on ko sa akong kaugalingon kon unsa ang pagkamiyembro.” Bisan pa sa iyang kabalaka, giubanan niya ang mga misyonaryo ug nangita og bag-ong mga miyembro ug mga investigator. “Nasayud ko kon unsay bation nga mahimong bag-ong miyembro,” siya mipasabut, “ug gustong makasiguro nga walay mobiya gikan sa mga gasa sa ebanghelyo nga nakaluwas nako sa kawalay paglaum.”
Sunda ang Ebanghelyo, Mahimong mga Disipulo
“Ang mga tawo makahatag og lain-laing mga gasa ug mga panglantaw. Ang halapad nga kasinatian ug mga kagikan ug mga hagit nga giatubang sa mga tawo mopakita kanato kon unsa gayud ang mahinungdanon sa ebanghelyo ni Jesukristo. Ug sa kadaghanan, tingali, nga naangkon sa paglabay sa panahon ug mao ang bahin sa kultura kay sa doktrinal mahimong mahanaw ra, ug kita makakat-on gayud sa pagkadisipulo.”
—Elder D. Todd Christofferson sa Korum sa Napulog Duha ka mga Apostoles
Bisan pa sa panghinaway batok sa Simbahan kaniadto, si Jim mipasakop tungod sa iyang nadawat nga “usa ka dili makwestyon nga espiritwal nga pagpamatuod gikan sa Espiritu Santo nga mipamatuod sa kamatuoran sa ebanghelyo ug doktrina.” Usa sa iyang labing dakong mga hagit, hinoon, mao ang pagpahiangay sa kultura sa LDS.
Human sa bunyag, iyang nadiskubrihan nga daghang mga pamatasan nga gidawat ra sa kadaghanan sa miyembro mao ang bahin sa kultura kaysa doktrina. “Samtang kini nahitabo sa bisan unsang organisado nga relihiyon,” siya mipasabut, “mibati ko nga kon wala ko monunot sa piho nga mga paagi, mahimong akusahan ko nga wala mohangup sa ebanghelyo sa hingpit. Ang akong mga panglimbasog dili sa ebanghelyo o sa doktrina apan ang gibati nga katas-on sa kamanunuton nga sa kultura lang.”
Sama sa gipasabut ni Elder Christofferson, gikinahanglan nato nga ang atong mga bag-ong mga kinabig, mga investigator, ug ang uban sa pagtabang kanato sa pagbiya sa mga gipraktis nga wala masubay sa doktrina nga milambo sulod sa panahon ug mahimong tinuod nga mga disipulo.
Ang pagkuhag mga kaayohan sa pakig-interaksyon sa mga tawo nga lain-lain og mga kagikan, si Elder Oaks nag-awhag sa Santos sa Ulahing mga Adlaw nga likayan ang pagtutok sa mga kalahian ug, hinoon, sugdi pinaagi sa pagpangutana kon, “Asa ang inyong kagikan? Unsa ang inyong mga sukaranang mga hiyas? Unsay gusto ninyong makab-ot? Kining matang sa pagkadayag ug pagdawat, agi’g sangputanan, makatabang niadtong mga bag-o pa sa atong pundok nga mobati nga nahisakop, nabayaw, gihigugma, ug andam sa pagdawat sa kaluwasan diha sa lawas ni Kristo.
Sama sa mga lider sa Simbahan karon, si Apostol Pablo nabalaka mahitungod sa pagkabahin-bahin sa karaang Simbahan ni Kristo. Iyang giawhag ang mga miyembro nga may lig-ong mga opinyon nga likayan ang pagsilo sa isigka Santos mahitungod sa mga gipraktis nga, sa katapusan, dili gayud importante, nagpasabut nga samtang “Ang kahibalo baya magapaburot, … ang gugma magapalig-on” (1 mga taga-Corinto 8:1). Naghangyo siya nga “wala unta kaninyoy pagkabahinbahin” ug sa pag-focus ni “Jesukristo lamang ug kaniya ingon nga linansang sa krus” kaysa pamaagi sa mga miyembro nga lahi sa usag-usa (1 Mga Taga-Corinto 1:10; 2:2).
Karon, ang modernong mga apostoles ug mga propeta nag-awhag kanato sa paghiusa diha sa panaglahi, nag-awhag kanato sa paghatag og luna alang sa matag miyembro sa Simbahan ni Kristo isip usa ka importante nga bahin sa atong katuyoan sa pagbuhat sa “pagkahiniusa sa pagtuo, ug sa kahibalo sa Anak sa Dios … sa sukod sa gidak-on sa kahupnganan ni Kristo” (Mga Taga-Efeso 4:13).