Mga Tingog sa mga Santos sa Ulahing mga Adlaw
PISIKAL NGA KAHUPAYAN GIKAN SA MGA KASULATAN
Paghulagway pinaagi ni Allen Garns
Sa bata pa, na-diagnose ko nga adunay juvenile rheumatoid arthritis. Kanunay kong masakit, ug ang akong mga ginikanan migahin og daghang oras uban kanako sa mga opisina sa doktor. Nabalaka sila sa akong panglawas ug mibati nga wala silay mahimo tungod kay dili sila makaayo kon unsay problema. Wala gayud nako mahatagi og bili kon unsay ilang gibati hangtud miabut nga ako na usab nga turno nga magbantay sa akong inahan nga nakigbisog sa kanser.
Pagtapos sa semana, nagdrayb ko paingon sa balay sa akong Mama sa New Jersey aron makauban siya sa iyang pagpa-chemo. Gusto ko nga makauban kaniya ug aron makapahulay usab ang akong mga igsoon nga lalaki gikan sa pag-atiman kaniya kada adlaw. Gikinahanglan nga dunay tawo nga magmonitor kaniya sa gabii tungod sa iyang pagpatambal. Dunay higdaanan nga gipahiluna alang kaniya diha sa sala, ug nagplano ko nga matulog sa sofa. Si Mama anaa sa kasakit ug wala koy mahimo. Mibati ko nga walay mahimo ug napungot.
Samtang si Mama naningkamot nga makatulog, naaghat ko nga basahan siya sa mga kasulatan. Gihigugma niya ang mga kasulatan, apan siya luya kaayo nga mogunit o pagbasa niini sa iyang kaugalingon. Sa dihang gipangutana nako siya kon unsay iyang gusto nga akong basahon, miingon siya nga ganahan siya sa basahon ni Alma. Human sa pagbasa sa mga ulohan sa kapitulo, naaghat ko sa pagbasa gikan sa kapitulo 7.
Ang Espiritu milukop sa kwarto samtang nagbasa ko sa mga pulong nga naghulagway sa misyon ni Kristo dinhi sa yuta: “Ug siya magpadayon, mag-antus sa mga sakit ug mga kasakit ug mga pagtintal sa matag matang; ug kini aron ang pulong matuman nga nag-ingon nga siya modala diha kaniya sa mga sakit ug mga balatian sa iyang mga katawhan.
“Ug siya modala diha kaniya sa kamatayon, nga siya mahimo nga mohubad sa mga higot sa kamatayon diin naghigot sa iyang mga katawhan; ug siya modala diha kaniya sa ilang mga kahuyang, nga ang iyang kasingkasing mahimo nga mapuno uban sa kalooy” (Alma 7:11–12).
Nagpadayon ko sa pagbasa hangtud nga malinawong nahinanok si Mama. Ang mga kasulatan midapit sa Maghuhupay ngadto sa iyang panimalay ug mitabang kaniya nga mahikatulog. Nakabaton ako og mas dakong pagpamatuod sa gahum sa mga kasulatan ug ni Jesukristo, kinsa andam nga molihok sama sa atong Manluluwas ug sa paghupay kanato sa tanan natong mga kasakit.