Uban sa tabang, nakahinulsol ko sa sala nga gibalik-balik. Apan nahadlok ko nga mapukan pag-usab. Unsaon nako pagbatok sa tintasyon ug magpabilin nga malipayon?
Pulihi ang imong kahadlok og hugot nga pagtuo kang Jesukristo ug sa Iyang Pag-ula, diha sa Iyang gahum sa pagbayaw ug pag-usab kaninyo, ug sa Iyang gugma ug kalooy. Hinumdumi ang Langitnong Amahan ug si Jesukristo ug ang Ilang kaayo kanimo. Pagpaubos, pag-ampo, pagtuon sa kasulatan, ug pagmatinud-anon. (Tan-awa sa Mosiah 4:11–12.) Dayon makabaton ikaw og hingpit nga kalipay, nga mao ang “gasa nga moabut gikan sa tinuyo nga paningkamot sa pagpuyo og matarung nga kinabuhi, sama sa gitudlo ni Jesukristo.”1
Ang hingpit nga paghinulsol mahimong lisud. Sa kasagaran nagkinahanglan og panahon, ilabi na kon ikaw nakasala pagbalik-balik. Likayi ang mga sitwasyon nga maduol og mga tintasyon. Mahimo nimong usbon ang imong inadlaw nga buluhaton, ang imong palibut, ug ang imong mga higala. Kon nadakin-as ka, hinumdumi nga ikaw makahimo gihapon sa paghinulsol ug makausab. Padayon sa pagpaningkamot. Ang imong Langitnong Amahan ug ang imong Manluluwas dili mohunong og tabang nimo. “Ang Pag-ula … makapawala sa matag lama bisan unsa pa kalisud o kadugay o kadaghan gibalik-balik.”2