Mga Tingog sa mga Santos sa Ulahing mga Adlaw
Nagtan-aw sa Among Masuso nga Mibiya Niini nga Kinabuhi
Paghulagway pinaagi ni Allen Garns
Human sa unang ultrasound, ang doktor misulti kanamo nga dunay kahigayunan nga ang among bag-ong masuso adunay Down syndrome. Ang akong bana ug ako wala magdahum nga makadungog niini, ug ang akong panglantaw sa umaabut nausab diha-diha dayon.
Sa akong pagmabdos, napuno ko sa mga pangutana ug kabalaka mahitungod sa unsay mapaabut. Apan nag-andam kami pag-ayo sa pag-abut sa among anak. Sa dihang sa katapusan miabut ang adlaw, akong gibati sa akong kasingkasing nga usa ka maanindot ug espesyal nga butang hapit na matawo.
Ginganlan namo ang among masuso nga batang lalaki nga Santiago, ug wala madugay human sa iyang pagkahimugso nahibaloan namo nga gawas sa Down syndrome adunay daghang seryoso nga komplikasyon nga nakaapekto sa iyang kasingkasing, atay ug baga. Diha-diha dayon, ang mga doktor ug mga nurse mitaod sa artificial respirator ug usa ka heart–lung machine. Paglabay sa mga adlaw didto sa ospital, ang akong bana ug ako misugod sa paghisgut kon unsaon namo sa pagpadako si Santiago kauban sa iyang mga igsoon. Diha niana nakaamgo kami nga gikinahanglan namo pag-ayo ang atong Langitnong Amahan.
Ang among gamay nga si “Santi” miarang-arang nga gitangtangan na sa artificial respirator. Sa dihang nagsugod na siya sa pagginhawa sa iyang kaugalingon, ingon og nagsulti siya nga, “Ma, mabaskog ra ko ug mohimo sa akong bahin.” Iyang gipislit ang among mga tudlo sa iyang gamay nga kamot. Kusgan siya, apan ang iyang kasingkasing dili makasugakod. Na-cardiac arrest siya, ug sa wala madugay, mipauli siya ngadto sa iyang Langitnong Amahan.
Wala ko magdahum nga moagi ko sa butang sama niana. Sa paghulat sa imong anak nga moabut uban sa tumang kadasig, sa paghimo og daghan kaayong mga plano alang kaniya, ug dayon sa pagtan-aw kaniya nga mobiya niini nga kinabuhi mao ang usa sa labing masakit nga butang nga maagian sa usa ka amahan ug inahan.
Ang akong bana ug ako miadto sa templo human sa lubong ni Santiago. Sa dihang misulod mi, gibati namo nga nahupay. Nasayud ko nga sa umaabut ako makaila sa akong masuso ug malingaw kaniya isip iyang inahan. Mapasalamaton ako sa mga templo ug sa mahangturong mga pamilya. Karon anaa ra kanamo nga magpuyo sa paagi nga makauban namo ang among gamay nga Santiago pag-usab.