Mga Hulagway sa Hugot nga Pagtuo
Cayo ug Anthony
Paris, France
Sila si Cayo Sopi ug Anthony Linat managhigala na sukad pa sa pagkabata. Si Cayo, usa ka miyembro sa Simbahan, kanunayng naglaum nga magpamiyembro si Anthony.
Leslie Nilsson, photographer
Cayo:
Akong nahimamat si Anthony sa dugay nang panahon. Bag-o lang mi nga mibalhin ngadto sa dapit. Miadto ko niining bag-ong eskwelahan ug misugod sa pagbaton og mga higala. Usa si Anthony kanila. Tingali mga sayis o siyete anyos pa mi. Kataw-anan ang paghunahuna bahin niana, karon nga 26 anyos na ko.
Nagdula mi og usa ka dula nga gitawag og Pog. Usa kini ka dula nga among dulaon sa France—wala ko kahibalo kon gidula ba kini sa laing dapit. Samtang nagdula mi, si Anthony misulay sa pagkuha sa usa o duha sa akong mga piyesa sa dula. Sa kalit lang, nagsugod mi sa pag-away. Ang among magtutudlo kinahanglan nga mobulag kanamo. Human niana, naghunahuna ko nga mas gidayeg namo ang usag usa. Nagsugod mi sa pagtinabangay—pagdula og mga video game, skateboarding, ug magbisikleta. Sa hinay-hinay, nagsugod mi nga magkauban og mas daghan pang oras.
Ang akong inahan kanunayng gusto nga ang among pamilya mag-ampo. Kabahin kini sa among himoon diha sa panimalay. Susama usab sa pagbasa sa mga kasulatan. Kini nga mga butang naandan na namong buhaton. Usa ka gabii didto ko natulog sa balay ni Anthony. Samtang nag-ampo ko una pa matulog, nakit-an ko ni Anthony ug nangutana kon unsay akong gibuhat. Wala ko kahinumdom kon unsa gyuy akong gisulti; nahinumduman lang nako nga anaa mi sa iyang kwarto ug nag-istorya mi bahin sa pag-ampo.
Si Anthony miadto og pipila ka higayon sa akong balay, ug nakakita siya namo nga nagbasa og mga kasulatan, nag-ampo alang sa panalangin sa pagkaon una pa mokaon, ug nag-ampo isip pamilya. Nakakita usab siya namo nga kaubang nanganta og mga himno. Gihangyo nako siya kausa o kaduha nga moadto sa simbahan. Siguro nakita nako sa iyang reaksyon nga dili kaayo siya ganahan sa ideya nga moadto sa simbahan. Miingon ko sa akong kaugalingon, “Ah mao na kana, tingali, ug dili gayud kini maayo, pero magpadayon lang gihapon kita nga suod nga higala.”
Anthony:
Sa sinugdanan medyo nagpanuko ko gamay bahin sa Simbahan. Wala kaayo ko makasabut, ug medyo nahadlok ko nga makig-istorya ni Cayo kon sa unsang paagi nga ang iyang pamilya nagpundok alang sa pag-ampo. Mao nga sa sinugdanan wala ko mosanong sa mga pagdapit. Apan sa hinay-hinay, maayo ang akong gibati. Mibati ko sa akong kasingkasing nga ang pamilya ni Cayo lahi sa ubang mga pamilya.
Cayo:
Sa katapusan kaming duha nag-iyahay og buhat sa uban pang mga butang. Wala na mi balita sa usag usa sa pipila ka higayon sulod sa katuigan, apan sa wala damha kanunay mi nga magkakita pag-usab. Sa dihang mga tin-edyer na mi, nahimo na usab kaming suod nga higala.
Anthony:
Akong nakita nga lahi si Cayo sa akong ubang mga higala. Kitang tanan makahimo og dili maayong mga butang samtang nagdako, apan si Cayo nakatabang nako sa pagpili sa maayo nga dalan.
Cayo:
Si Anthony nagsugod sa pag-adto sa simbahan uban sa akong pamilya. Dayon ang mga butang natural lang nga nahitabo, ang mga misyonaryo migahin og daghang panahon uban namo, ug si Anthony nahimo nang pamilyar sa Simbahan. Nahibalo na siya kon unsa ang pag-ampo, nahibalo na siya sa mga himno, nahibalo siya nianang tanan—dili lang siya miyembro.
Anthony:
Gikan sa edad nga 8 ngadto sa edad nga 18, naghunahuna ko og kadaghan bahin sa pagpabunyag. Apan milungtad og dugay tungod kay duna pa koy daghang butang nga kinahanglan nakong usbon sa akong kinabuhi, bisan og naningkamot ko nga magpuyo sa matarung nga mga baruganan.
Sa edad nga 18, akong nahimamat ang mga misyonaryo didto sa panimalay ni Cayo. Ang mga misyonaryo mitudlo kanako sa mga leksyon sa pag-andam kanako alang sa bunyag. Mitabang sila kanako, ug ang ilang mensahe nakatandog sa akong kasingkasing. Atol niining panahona, ang akong inahan ug ang akong manghud nga babaye gipaila-ila ngadto sa mga misyonaryo. Nabunyagan sila pipila ka bulan sa wala pa ko mabunyagi. Nabunyagan ko niadtong Marso 10, 2007.
Cayo:
Mikabat og dugay gyung panahon, sobra sa 10 ka tuig, apan sa katapusan nabunyagan ra siya.
Makapainteresado nga makita kon giunsa paghimo sa Ginoo ang mga butang. Human niana, nagmisyon ko sa France ug nagsinulatay mi sa usag usa. Karon magkabulag mi tungod kay si Anthony bag-o lang nahimong usa ka gendarme [pulis], ug mobiya siya aron magtrabaho sulod sa duha ngadto sa lima ka tuig didto sa Guyana, apan sigurado ko nga magpabilin ang among komunikasyon.
Anthony:
Sukad ko namiyembro sa Simbahan, akong gibuhat unsay gikinahanglan aron magpabilin diha sa higpit nga dalan ug sa pagpakigbahin sa ebanghelyo niadtong naglibut kanako. Usa kini ka butang nga yano ra kaayo, apan ang ebanghelyo mahimong lisud alang sa uban sa pagdawat ug pagsunod. Isip mga miyembro sa Simbahan, tinuoray nga lahi kita sa uban.
Ang ubang mga sakop sa akong pamilya naglisud sa pagsabut nganong ang akong inahan, ang akong igsoong babaye, ug ako mangandam para mosimba matag Dominggo. Magsul-ob ko sa akong amerikana ug mobiya sa alas 8:30 aron maanaa sa simbahan sa alas 9:00, ug kasagaran magpabilin hangtud sa alas 3:00 sa hapon tungod sa akong calling. Malingaw ko nga makig-istorya sa ubang mga miyembro ug mahibalo kon unsay nahitabo sa ilang kinabuhi. Ganahan ko nga makaapil uban sa mga miyembro; talagsaon kini. Importante nga dunay mga tawo sa atong palibut nga mga miyembro, nga dunay panaghiusa, ug mobati nga kita naglig-on sa usag usa.
Cayo:
Mituo ko nga ang Ginoo naghimo sa tanan kutob sa Iyang mahimo aron kita magbag-o sa tinuoray, sa matinuoron, ug sa matinud-anong paagi. Ang pagkahimong Santos sa Ulahing mga Adlaw ug disipulo ni Kristo dili lang usa ka butang sa pagdesisyon nga mosunod sa piho nga gituohan; kini mao ang pagpakita og dakong kausaban sa atong kaugalingon. Akong nakita kana nga kausaban diha ni Anthony.
Anthony:
Ang pagkasayud nga duna koy usa ka Langitnong Amahan nakahupay kanako. Nakahupay usab kini kanako nga masayud nga Siya mipadala sa Iyang Anak, si Jesukristo, aron mamatay alang kanato—alang kanako.
Apan, bisan unsa pa man, ako nasayud nga kini tinuod. Nasayud usab ako nga ang mga kasulatan tinuod. Ang Basahon ni Mormon tinuod. Kombinsido ako niini. Ang Simbahan tinuod. Kita dunay usa ka tinuod nga propeta, si Thomas S. Monson. Ang Napulog Duha ka mga Apostoles tinuoray nga gitawag sa Dios.
Usa kana ka butang nga wala nako masabti kaniadto, ug ako nagtuo nga, bisan karon, wala ako hingpit nga makasabut niini. Hilabihan kini ka gamhanan ug ka talagsaon isip usa ka emosyon.
Sila si Cayo Sopi (sa wala) ug Anthony Linat (sa tuo) naglakaw agi sa ilang kasilinganan gawas sa siyudad sa Paris, France. Managhigala na sila sukad pa sa pagkabata.
“Samtang mas nagkasuod pa mi nga managhigala, akong nakita nga lahi si Cayo sa akong ubang mga higala,” nahinumdom si Anthony. Paglabay sa panahon, ang ehemplo ni Cayo nakatabang ni Anthony nga mahimong mas interesado sa gipahiuli nga ebanghelyo.
Sila si Cayo ug Anthony nagplano nga magpabiling dunay komunikasyon human nga si Anthony mibalhin ngadto sa Guyana.
“Sukad ko namiyembro sa Simbahan,” miingon si Anthony, “akong gibuhat unsay gikinahanglan aron magpabilin diha sa higpit nga dalan ug sa pagpakigbahin sa ebanghelyo niadtong naglibut kanako.” Ang pagpakigbahin sa ebanghelyo “usa ka butang nga yano ra kaayo,” miingon siya.
Nagpabilin si Cayo nga mapasalamaton sa oportunidad nga nakahimo siya sa pagpakigbahin sa ebanghelyo ngadto sa iyang higala. “Mituo ko nga ang Ginoo naghimo sa tanan kutob sa Iyang mahimo aron kita magbag-o sa tinuoray, sa matinuoron, ug sa matinud-anong paagi,” si Cayo miingon. “Akong nakita kana nga kausaban diha ni Anthony.”
Miingon si Anthony nga ang pagkakaplag sa ebanghelyo nahimong panalangin sa iyang kinabuhi. “Ang pagkasayud nga duna koy usa ka Langitnong Amahan nakahupay kanako,” miingon siya. “Nakahupay usab kini kanako nga masayud nga Siya mipadala sa Iyang Anak, si Jesukristo.”
“Makapainteresado nga makita kon giunsa paghimo sa Ginoo ang mga butang,” miingon si Cayo. Mikabat kini og sobra sa 10 ka tuig aron mabunyagan si Anthony, apan nianang panahona, si Anthony nakaangkon og lig-on nga pagpamatuod.