Mga Kasulatan: Napulo ka minutos KADA ADLAW
Mihangyo kami sa lima ka mga batan-on nga sulayan ang imbitasyon ni Elder Stevenson nga pulihan ang 10 minutos nga pag-atubang sa screen sa kada adlaw ngadto sa pagbasa sa Basahon ni Mormon.
Nakahimo ba kamo sukad og usa ka tumong sa pagtuon sa kasulatan nga sama niini? “Gikan niining adlawa, ako mag tuon sa kasulatan usa ka oras kada adlaw—ug ako kining buhaton sa hingpit.”
Kon nakahimo kamo og ingon niana nga tumong, kumusta man? Malagmit, dili kaayo maayo. Ang pagsulay sa pagpalambo og bag-ong kinaiya tinud-anay nga mahagiton, ilabi na kay usahay makahimo kita og dili katuohan nga mga tumong (sama nianang usa sa ibabaw) nga dali ra kitang kapuyon o nabug-atan.
Aron tinuoray nga makahimo og kinaiya sa pagtuon sa kasulatan, labing maayo ang magsugod sa gamay. Si Elder Gary E. Stevenson sa Korum sa Napulog Duha ka mga Apostoles mihatag og maayong sugyot: “Daghang kabatan-onan naggahin og mga pito ka oras matag adlaw sa pagtan-aw og TV, computer, ug smartphone. … Mapulihan ba ninyo ang pipila nianang inadlaw nga panahon sa pagtan-aw sa screen—ilabi na kanang gipahinungod sa social media, sa internet, sa pagdula, o telebisyon—ngadto sa pagbasa sa Basahon ni Mormon? … Bisan kon 10 minutos lang sa usa ka adlaw.”1
Mihangyo kami sa lima ka mga batan-on sa pagdawat sa imbitasyon ni Elder Stevenson. Ilang gisubay ang ilang inadlaw nga mga panahon sa screen, ug dayon ilang gipulihan ang 10 minutos niini sa pagtuon sa Basahon ni Mormon. Kumustaha kon unsay agi—tingali makapadasig sila kaninyo nga sulayan kini sa inyong kaugalingon!
Mga paghulagway pinaagi ni Iker Ayestaran
“Human sa pagtipig sa talaan sa akong panahon nga gigahin sa social media sulod sa unang semana, nakuratan ko og gamay sa gidaghanon sa higayon nga akong nagamit diha sa akong telepono. Mao kini nga siguradong maayo nga ideya alang nako ang paggamit nianang pipila ka panahon sa Basahon ni Mormon, ilabi na nga ang pagkugi og basa sa mga kasulatan dili usa sa akong mga kalig-on.
“Ang nakaapan, usa sa unang mga adlaw sa pagbasa sa akong mga kasulatan sa buntag kay dili maayo nga adlaw. Hinoon, nasayud ko nga ang pagbasa sa mga kasulatan makapalambo sa akong kinabuhi, mao nga nagpadayon ko sa pagbasa.
“Nagtuo ko nga ang labing dako nga epekto sa pagbasa sa kada adlaw mao nga nabati nako nga mas nahiangay sa espiritu. Mas sayon kaayo ang akong paghimo og desisyon. Mibati ko og mas dakong gugma alang sa mga tawo sa akong palibut ug nadugangan ang akong tinguha sa pagserbisyo. Kon mobasa ko sa akong mga kasulatan sa buntag, mas maanindot ang dagan sa adlaw. Kon mobasa ko sa gabii, maayo ang akong pagkatulog. Kusganon nakong girekomendar nga ang tanan mosulay niini. Pagkadako sa kalainan nga mahimo niini!”
Bryn C., edad 18, Utah, USA
“Kon akong subayon ang akong paggamit sa telepono, nakaamgo ko nga naggamit ko sa telepono hapit sa tibuok Dominggo. Sa akong hunahuna makaguol kana tungod kay mao unta kana ang higayon nga maningkamot ko nga maduol sa akong Manluluwas—apan nagtutok na hinoon ko sa akong screen.
“Sa akong pagsugod og basa sa akong kasulatan, mobasa ko sulod sa 10 minutos sa kada gabii sa dili pa ko matulog, nga para nako mga usa ka kapitulo sa usa ka gabii. Samtang gibuhat ko kini, namatikdan nako nga dali ra kong makatulog. Nakabantay usab ko nga makahimo nako og mas maayong desisyon sa tibuok semana, ug sa kinatibuk-an mas maayo ang akong gibati mahitungod sa akong kaugalingon.
“Mapasalamaton ko nga nadawat nako kini nga imbitasyon, ug nagplano ko sa pagpadayon sa pagbasa sulod sa 10 minutos sa usa ka adlaw ug mag-ampo ko kada gabii.”
Ryan E., edad 16, Alabama, USA
“Sa pagkatinuod wala nako hunahunaa nga anaa ko sa social media nga ingon kadugay hangtud akong gisubay ang akong paggamit, ug diha nako nakaamgo kon unsa ka dako ang panahon sa akong kinabuhi ang gigamit sa social media.
“Sa higayon nga misugod ko sa pagpukos sa pagbasa sa mga kasulatan kada adlaw, nabati nako ang kahinam sa pagbasa sa Basahon ni Mormon, ug gusto nakong makat-on gikan niini. Samtang nagbasa ko sulod sa 10 minutos kada adlaw, nag-anam ko og kainteresado sa mga estorya. Mga katunga na ang akong nahuman nga nakahukom ko nga, sa dili pa ko mobasa, mag-ampo ko nga makaplagan nako ang mga tubag sa akong mga pangutana, ug wala mapakyas nga nadawat nako ang mga tubag pinaagi sa Espiritu Santo.
“Ako nasayud nga ang Dios nakigsulti kanato pinaagi sa mga kasulatan ug nga ang Basahon ni Mormon laing tugon ni Jesukristo. Tinud-anay nga makapanalangin kini sa atong kinabuhi pinaagi sa kinasingkasing ug mainampoong pagtuon. Mapasalamaton kaayo ako alang sa oportunidad sa pag-apil niini, ug dapiton ko ang tanan sa pagbuhat sa ingon. Kadto usa ka makapausab sa kinabuhi nga kasinatian.”
Sydney B., edad 16, Arizona, USA
“Wala pa nako gisubay ang panahon nga akong nagahin, naghunahuna ko nga maglisud ko sa paghunong ug mobasa sa mga kasulatan—apan human nakaamgo kon unsa ka dako sa panahon nga akong nagahin sa social media, ang pagkuha og 10 minutos sayon ra kaayo! Makabasa ko sa tingpaniudto o sa dili pa magsugod ang seminary.
“Human ko makabasa sa mga kasulatan, mas nakamatngon ko nga kon unsay akong kahimtang diha sa social media. Kon makasugat ko og butang nga ngil-ad, uban sa ngil-ad nga pinulongan o negatibong mensahe, mabantayan nako kini ug maningkamot sa paglikay niini nga mas labaw pa kay sa una. Nakamatikod usab ko nga mas sinsero ang akong mga pag-ampo ug nadawat nako ang mas daghang tubag niini. Mao gayud kini ang butang nga akong gilauman nga magpadayon pa og dugay!”
Izzie J., edad 16, California, USA
“Bisan tuod nakalimot ko sa pagbasa og pipila ka higayon, sa kinatibuk-an nagmalampuson kini. Nakaamgo ko nga sa wala pa ko misugod sa imbitasyon ni Elder Stevenson, sa tinuoray ako nakabasa lang gyud og mga 3 ka minutos matag gabii, ug pinaagi sa pagdugang sa akong pagbasa ngadto sa 10 minutos matag gabii, nakita nako ang kalainan sa akong kinabuhi. Sa dihang nagbasa na ko, akong gibati nga mas nahiangay sa Espiritu ug akong mabati ang mga panalangin sa espirituhanong proteksyon sa matag adlaw. Sa samang paagi nga lisud magbasa human sa dugayng panahon nga wala makabasa sa mga kasulatan, sa higayon nga nagsugod na ko sa pagbasa dili na ko makaundang.
“Akong namatikdan nga alang kanako, kon magbasa ko sa mga kasulatan sa dili pa matulog, kasagaran makatulog ra ko o walay daghang makuha sa akong gibasa. Epektibo kaayo ang pagbasa mabuntag o pagkahuman sa klase.
“Nalingaw kaayo ko nga magbuhat niini ug mohagit sa tanan nga sulayan kini.”
Rachel A., age 15, Colorado, USA