Gugma ug Chocolate Cake: Unsay Imong Ihatag aron Madala Sila og Balik?

Ni Devin G. Durrant

Unang Magtatambag sa Kinatibuk-ang Kapangulohan sa Sunday School

Nawad-an sa kadasig si Sister Babata Sonnenberg. Isip batan-ong inahan sa lima ka mga babayeng anak nga nanag-edad og ubos sa otso anyos, nasurprisa siya nga gitawag nga motudlo sa Sunday School sa iyang ward sa mga nanag-edad og 16 ngadto sa 17. Mga bulan ang milabay sa iyang calling, nabantayan niyang dili regular ang motambong og klase ug sa kasagaran diyutay ra. Usa ka Dominggo usa ra gyud ka batang lalaki ang mitungha sa klase. Kay sa magtudlo og usa ra ka estudyante, iyang gitipon ang iyang klase sa laing klase. Kaundangon na siya. Apan samtang namalandong ug nag-ampo siya mahitungod sa makaluya niyang sitwasyon, miabut ang inspirasyon, ug nausab ang iyang kasingkasing.

Usa ka Team nga Paningkamot

Ang iyang bana nga si Ken, maoy ward mission leader. Nadasig silang duha nga tipunon ang ilang paningkamot nga tabangan ang mga batan-on sa ward. Maghimo siya og chocolate cake, ug dapiton niya ang mga batan-on sa ward sa pag-adto sa ilang balay matag Dominggo sa gabii aron mangaon sa cake og hisgutan ang pagpangandam para sa misyon. Samtang mangaon ang mga batan-on sa iyang cake, dapiton sila ni Sister Sonnenberg para sa iyang Sunday School class.

Isip resulta niining “matam-is”, nga pagdapit, mitaas ang attendance sa Sunday School. Apan ang usa ka batan-on nga si Nate, wala madala sa kanunayng mga pagdapit. Gibati ni Sister Sonnenberg nga nawad-an siya’g usa sa iyang karnero. Ang iyang reaksyon niana nga pagbati mao ang “[pag]-adto sa pagpangita niadtong usa nga nawala, hangtud nga hikaplagan niya kini” (Lucas 15:4). Mao nga imbis mosurender kang Nate, nakahunahuna si Sister Sonnenberg og usa ka plano.

Mobisita sa mga Balay

Usa ka gabii sa Dominggo miadto siya sa balay ni Nate. Naabtan niya si Nate sa balay nga kauban sa laing sakop sa iyang klase nga wala usab motambong nianang adlawa. Miingon siya nga nangita siya kanila kay wala sila katambong sa klase ug dayon gitudloan sila sa leksyon diha-diha dayon. Ang amahan ni Nate, kinsa bag-o lang na-release sa iyang pagka-bishop sa ward, natandog sa kakugi niini nga sister. Gipadad-an niya og text message ang iyang bana nga nag-ingon: “Ken, palihug isulti sa imong asawa ang akong pasalamat. Ang pag-anhi niya diri ug pagtudlo kang Nate ug McKay usa ka dinasig.”

Bisan pa niana, nianang sunod nga Dominggo wala motambong og Sunday School si Nate. Mao nga miadto na usab si Sister Sonnenberg sa iyang balay aron maghisgot sa ebanghelyo kaniya. Nagduda si Nate nga mao gihapon ang mahitabo, mao nga mitago siya sa balay sa iyang higala. Nasakpan gihapon siya ni Sister Sonnenberg didto sa laing balay ug gitudlo ang leksyon didto.

Sa katapusan, nakahukom si Nate nga mobalik sa Sunday School class.

Unsay Hinungdan?

Nganong mibalik sa Nate?

Tungod ba kaha sa chocolate cake nga gidalit ni Sister Sonnenberg sa iyang panimalay?

Tungod ba kaha sa pagbisita nga iyang gihimo sa balay ni Nate (ug sa balay sa iyang silingan) diin didto siya nakit-i?

Tungod ba kaha sa awhag gikan sa iyang mga higala ug pamilya sa pagsimba?

O tungod ba kaha sa gugma nga iyang gibati gikan ni Sister Sonnenberg, nga iyang magtutudlo sa Sunday School?

Tingali ang tubag mao ang tanan. Tungod niining tanan nga rason ug daghan pa, nagsugod si Nate sa kanunayng pagtambong og Sunday School, kauban sa iyang mga higala.

Ang Sumpay sa Sugilanon

Tuguti nga akong idugang ang sumpay sa sugilanon. Tungod sa gibati ni Nate mahitungod sa iyang magtutudlo sa Sunday School, wala niya palabya nga palitan niya og chocolate ang iyang magtutudlo dihang nagkita sila sa mall. Si Sister Sonnenberg, kinsa mipakita kaniya sa dako kaayong gugma, nakadawat sa iyang gugma.

Human niana sa wala madugay, niadtong Septyembre 2015, nakompleto ni Nate ang iyang application para sa misyon ug karon nagserbisyo sa Mississippi Jackson Mission.

Ang ubang mga miyembro nga naglisud sa pagtambong og Sunday School mihukom usab nga magmisyon. Lima ka young men ug tulo ka young women nga mitambong sa Sunday school class ni Sister Sonnenberg nga nanag-edad og 16‑17 atol sa iyang panahon isip teacher nakaserbisyo, o nagserbisyo og mga misyon, ug daghan pa ang nagplanong moserbisyo.

Pagtabang Niadtong Wala Motambong

“Higugmaa ang Imong mga Gitudloan,” bahin 1 Pagtudlo sumala sa Pamaagi sa Manluluwas, naglakip og usa ka hilisgutan nga giulohan og “Pagtabang Niadtong Wala Motambong.” Ang ulohan nag-ingon: “Ang pagtabang sa dili kaayo aktibong mga miyembro dili lamang katungdanan sa usa ka home teacher, usa ka visiting teacher, o usa ka lider sa priesthood o auxiliary—ang mga magtutudlo makatabang usab niini nga buhat. Ang pagtudlo sobra pa kay sa pagpresentar og usa ka leksyon sa Dominggo. Naglakip kini sa pagpangalagad uban sa gugma ug pagtabang sa uban aron madawat ang mga panalangin sa ebanghelyo, ug kini nga tabang sa kanunay mao gayud ang gikinahanglan sa usa ka dili kaayo aktibo nga sakop sa klase. Kitang tanan kinahanglan nga magtinabangay sa pagtabang niadtong mga nanlimbasug, ug isip usa ka magtutudlo mahimong anaa ka sa talagsaon nga posisyon aron motabang.”¹

Namatngunan ni Sister Sonnenberg ang lahi niyang sitwasyon sa pagtabang sa mga sakop sa iyang klase. Napanalanginan siya og sinemanang oportunidad sa pagtandog sa ilang mga kasingkasing, ug determinado siya nga mobuhat niini—sa iyang classroom o sa ilang panimalay. Dayag lang, ang tanang magtutudlo tingali dili makabisita sa mga panimalay niadtong dili makatambong matag semana, dili usab posible nga kanunay kining mahimo, apan sa kanunay duna kitay mahimo, bisan gamay ra, sa pagpakita og gugma niadtong anaa sa atong pangatungdanan. Hinumdumi ang mga pulong ni propeta Alma: “Pinaagi sa gagmay ug yano nga mga butang ang mga dagko nga butang ipahinabo” (Alma 37:6).

Pagdapit uban sa Gugma

Ang seksyon nga “Pagdapit uban sa Gugma” dinhi sa mao gihapong topic sa diskusyon naglakip niini nga panglantaw: “Ang sinsero nga pagpadayag sa Kristohanong gugma adunay dakong gahum sa pagpahumok sa mga kasingkasing sa mga sakop sa klase nga nanlimbasug sa ebanghelyo. Kasagaran kini nga mga indibidwal nagkinahanglan lamang nga masayud nga sila gikinahanglan ug gihigugma.”²

Isip resulta sa mga paningkamot ni Sister Sonnenberg nga matabangan si Nate, gibati ni Nate nga siya gikinahanglan ug gihigugma. Isip mga full-time nga misyonaryo, si Nate ug ang iyang mga classmate karon duna nay oportunidad aron matabangan nga mobati ang uban sa mao gihapon nga Kristohanong paghigugma. Pagkadakong panalangin nga ilang mahinumduman ug masunod ang ehemplo sa ilang mga magtutudlo sa Sunday School.

Hangtud nga Imong Makit-an Kana nga Nawala

Isip Kinatibuk-ang Kapangulohan sa Sunday School, mapasalamaton kami sa mga magtutudlo sa Sunday School sa tibuok kalibutan kinsa, sa lain-laing paagi, midapit sa mga sakop sa ilang klase sa pagduol kang Kristo. Manghinaot kami nga ang Ginoo manalangin sa inyong mga paningkamot sa paghigugma sa inyong mga gitudloan ug, tungod niana nga gugma, “moadto sa pagpangita niadtong usa nga nawala, hangtud nga hikaplagan [ninyo] kini”—sama sa Iyang gibuhat atol sa Iyang mortal nga pangalagad.