Ang Paagi sa Pagpalupad og Eroplano
Ang eroplano makatudlo kaninyo og daghan mahitungod sa pagkamasulundon, pagpadayag, ug espirituhanong direksyon.
Duha ka Pwersa
Sa dihang nagtrabaho ko isip usa ka mekaniko sa eroplano, akong nakat-unan nga, aron mapalupad ang eroplano, ang eroplano nagkinahanglan og duha ka pwersa:
-
Moduot, o momentum sa pagdagan, sa gikusgon nga igong makamugna og pagsalta. Ang pagduot mobuntog sa kahinay nga makapugong sa pag-abante.
-
Pagsalta, mamugna pinaagi sa kusog nga hangin agi sa ibabaw ug ubos sa pako (gitawag og baruganan ni Bernoulli). Ang pagsalta mobuntog sa gravity, nga maoy mobira sa eroplano balik sa yuta.
Pagkoriher sa Rota
Siyempre, adunay daghan kaayong butang nga naglihok kon naglupad ang eroplano. Apan ang kadaghanan niini naglambigit sa dugang duha ka mga sistema.
-
Ang himan sa pagnabigar makatabang sa piloto nga magsubay ang eroplano sa rota. Naglakip kini sa mga gauge ug mga dial diha sa cockpit, apan naglakip usab og radar beacons, ug makakontak sa mga flight tower.
-
Ang mga kontrol sa paglupad mopahigayon sa pag-usab sa direksyon. Naglakip kini sa mga rudder [mga flap sa ikog sa eroplano], mga aileron ug mga trim tab [gamay nga flap diha sa mga pako], dagkong mga flap ug mga spoiler, mga slat, ug mga stabilizer. Kini makapahimo sa eroplano nga motuyok, mosaka, mo-dive, mobali, ug hinayng motugpa sa yuta kon panahon na sa pagtugpa.
Maayong Pagpahibalo
Ang piloto nag-agad sa mga tripolante nga anaa sa yuta. Ang mga tripolante moandam sa eroplano sa paglupad, mogiya sa aircraft ug mohimo sa mga inspeksyon sa dili pa ug sa human sa paglupad, ug mohimo o morekomendar og maintenance. Ang mga tripulante ang responsable pagpreserbar sa kondisyon ug kahilwasan sa eroplano.
Unsa ang Kalabutan niini diha Kanimo
Paghimo og pipila ka yanong mga pagkumpara, ug makakaplag kamo og makapadasig nga pagkasusama tali sa mga baruganan sa paglupad ug ang mga baruganan sa ebanghelyo.
Espirituhanon nga Pagsalta
Ang pagkamasulundon sa mga balaod ug mga ordinansa sa ebanghelyo makapalig-on sa gikusgon. Naghatag kini og espirituhanong pagduot nga makamugna og espirituhanong pagsalta. Kini makapahimo natong magpadayon sa unahan. Kini makapahimo nato nga mopatigbabaw sa kalibutan, diin kita makakita og klaro kon unsaon sa pagbalik ngadto sa atong Langitnong Amahan.
Pagkoriher sa Rota
Human kamo nabunyagan, nadawat ninyo ang Espiritu Santo, ang labing maayo sa tanan nga mga himan sa espirituhanong pagnabigar. Samtang kamo magpadayon diha sa pagkamasulundon, ang hinay nga hinagawhaw nga tingog makahatag og makanunayon nga pag-aghat mahitungod sa unsay buhaton, kon asa paingon ug unsaon sa pagbuhat. Kon kamo maminaw pag-ayo, mogiya kini kaninyo.
Apan naa ra kaninyo sa paggamit sa mga pamaagi nga gihatag sa Ginoo aron makoriher ang inyong agianan. Kini naglakip sa mga checkpoint—kamo nag-ampo ba sa kanunay, nagsiksik sa mga kasulatan, nagtambong sa miting, nag-andam sa pag-adto sa templo? Ug kini naglakip sa paghinulsol, nga makapahimo kaninyo sa paghimo og dagko ug ginagmay nga kausaban sa espirituhanong mga kinaiya, gitas-on ug direksyon.
Espirituhanong Pamatuod
Sama sa usa ka piloto, kinahanglang mosalig sa inyong espirituhanong mga tripolante sa yuta. Ang inyong tripolante naglakip sa inyong mga ginikanan, mga lider sa Young Men o Young Women, ang inyong bishop ug iyang mga magtatambag, mga home teacher, magtutudlo sa seminary, ug matarung nga mga higala. Hunahunaa ang mga pag-interbyu kanila sama sa pag-usisa sa dili pa ang paglupad ug paghuman sa paglupad. Sama sa eroplano nga regular nga gisusi ang kada interval, kamo adunay mga oportunidad sa pagmatuod sa inyong kaandam sa pagpalupad sa eroplano atol sa regular nga naiskedyul nga mga interbyu. Ang Inyong espirituhanon nga mga tripulante sa yuta makatabang kaninyo sa pagtimbang-timbang sa inyong mga abilidad, pag-andam sa imong mga plano sa paglupad, ug motambag kaninyo mahitungod sa gikusgon sa espirituhanong hangin ug potensyal sa kasamok. Ang piho nga mga kalihukan, sama sa pag-adto sa templo, magkinahanglan og beripikasyon nga kamo mahimo nang maka-takeoff. Ang mga pakigpulong sa kinatibuk-ang komperensya nahisama sa pagdungog sa flight controller kinsa makakita sa tanang eroplano sa usa ka higayon ug mohatag og instruksyon sa pagnabigar sa layo pa. Ang kamasulundon sa tambag makatabang kaninyo nga makamaniubra og klaro sa potensyal nga kakuyaw.
Andam sa Paglupad
Sa espirituhanong bahin, kita angayng makalupad. Kita mga anak sa atong Langitnong Amahan, ug gusto Niya nga maabut nato ang kinatas-an sa pagkaespirituhanon. Isip Iyang mga anak, kinahanglan makab-ot nato ang labing taas nga pagkamatarung uban sa Iyang tabang, kita mahimong kanunayng magmalamboon.