Mga Tingog sa mga Santos sa Ulahing mga Adlaw
Ang Manluluwas: Ang Perpekto nga Doktor
Paghulagway ni Joshua Dennis
Isip usa ka doktor, kausa duna koy usa ka pasyente nga miduol nako human sa naandan nga pagtesting sa dugo kay wala sa normal ang sukod. Sa mga adlaw tali sa iyang pagtesting ug sa among panag-istoryahanay, mibasa siya sa internet mahitungod sa unsay gipasabut sa mga resulta. Sa dihang nagkita kami, naguol siya ug nabalaka. Naningkamot ko sa pagpasabut sa mga resulta, apan nabalaka gihapon siya.
“Ayaw og kabalaka kon unsay nahimong sayop,” giingnan nako siya. Ako kanang trabaho! Maong nia ko dinhi. Nagtuon ko pag-ayo aron masayud kon unsa ang buhaton mahitungod niini. Masulbad ra nato kini, ug kon sundon nimo ang akong mga instruksyon, makahibalo ka unsaon nga mamaayo ka pag-usab. Salig kanako ug tuguti ko nga maoy maningkamot unsay buhaton sa medikal nga paagi. Dayon ikaw maka-focus sa imong tanang mga kusog nga mamaayo.”
Nakatabang kini sa pagpakalma sa iyang mga kahadlok. Nagplano mi nga maghimo og dugang nga mga pagtesting, ug misaad ko nga maghiusa mi sa pagpaningkamot.
Paglabay sa mga bulan, nakasinati ko og kagubot sa akong kinabuhi. Na-pressure sa trabaho, adunay umaabut nga anak, ug ang umaabut nga pagbalhin nakapabug-at nako. Nakaplagan nako ang akong kaugalingon nga nasagmuyo, nabalaka ug nahadlok.
Kinasingkasing ako nga nag-ampo mahitungod sa akong mga kabalaka, mga sala, ug kasagmuyo. Samtang ako nag-ampo, ang Espiritu mipamatuod sa kaimportante sa Manluluwas sa akong kinabuhi. Ingon og Siya ang nakigsulti nako:
“Ayaw og kabalaka mahitungod sa tanan nga mga butang nga mahitabo. Mao kana ang akong trabaho! Maong nia ko dinhi. Giantus nako ang tanan aron masayud kon unsa ang buhaton mahitungod niini. Pagbaton og hugot nga pagtuo ngari kanako, ug masulbad ra nato kini. Kon sundon nimo ang akong mga instruksyon, mamaayo ka pag-usab. Salig kanako ug tuguti ko nga modala sa espirituhanong mga palas-anon. Dayon imong ma-focus ang imong tanang mga paningkamot nga mahimong pinakamaayo sa imong kaugalingon.”
Sa pagkaamgo niini, ang akong kabalaka, gibati nga sala, ug kasagmuyo nawala. Ang hugot nga pagtuo diha Kaniya mikuha sa dili mabungahon nga mga pagbati nga mibabag sa akong paglambo. Ako maka-focus sa mga butang nga akong makontrolar. Makasunod ko sa ebanghelyo ug makadangup sa Manluluwas sa akong mga hagit.
Sa samang paagi nga ang usa ka doktor mogiya kanato ngadto sa pagkahingpit sa pisikal, ang Manluluwas, kinsa mao ang perpekto nga Doktor, makakuha sa palas-anon sa kaulaw, kabalaka, pagbati nga sad-an, ug gani mga pagbati sa kahigawad ug kabalaka ug mopakita kanato sa dalan sa espirituhanong paagi nga mamaayo pag-usab. Mao kana ang Iyang trabaho, ug Siya mohimo niini sa hingpit.