Basaha Lang ug Mag-ampo
Dihang 17 anyos ko, giingnan ko sa akong higalang babaye nga Mormon siya. Nianang higayuna wala koy ideya unsa kanang Mormon. Ang akong mga ginikanan wala magpasimba kanako, mao nga wala kaayo koy nahibaloan mahitungod sa Biblia o mahitungod sa Dios, wala pud koy hilig niini. Gisultihan nako ang akong higala, “Kon ugaling may gusto man kong mahibaloan bahin niini, ako ray bahala.”
Nakita nga wala kaayo koy gana sa Simbahan, gihatagan lang ko niya og Basahon ni Mormon. Dayon gihangyo ko niya sa pagbasa ug mag-ampo bahin niini. Wala ko niya pugsa o wala sab siya malain nga dili ko gustong makadungog mahitungod sa Simbahan. Ang gusto ra gyud niya nga ako mobasa ug mag-ampo.
Sa wala madugay nianang gabhiona dihang giabli nako ang basahon, nakita nako ang iyang pagpamatuod diha sa atubangan. Samtang nagbasa ko sa iyang pagpamatuod, akong gibati nga kinahanglan kong makakat-on pa og dugang mahitungod niini nga basahon. Mao nga nagsugod ko sa 1 Nephi. Dili ko makahunong sa pagbasa. Gusto pa kong makahibalo og daghan.
Sa wala madugay, mitambong ko og family home evening uban sa iyang pamilya diin ila kong gitudloan mahitungod sa ebanghelyo ni Jesukristo. Bisan og wala koy nahibaloan mahitungod sa ebanghelyo, ang tanan daw adunay kahulugan. Dihang nadugangan ang akong nakat-unan, ang akong kinaiya mahitungod sa simbahan, sa Dios, ug kang Jesukristo nausab. Niining panahona sa akong kinabuhi gusto kong mobuhat sa unsay gustong ipabuhat kanako sa Dios. Wala madugay gitudloan ko sa mga misyonaryo ug gibunyagan ug gikumpirmahan ko nga miyembro sa Simbahan ni Jesukristo sa mga Santos sa Ulahing mga Adlaw.
Ang Basahon ni Mormon nakapausab sa akong kinabuhi. Kon hinumduman nako ang nangagi, akong nakita sa unsang paagiha ang Espiritu Santo mitabang aron mas maganahan pa ko sa pagkat-on. Ang ebanghelyo nakatabang nga akong mahibaloan kon si kinsa ako, diin ko gikan, ug kon asa ang akong padulngan kon magmatinud-anon ko. Mapasalamaton ko sa akong higala kinsa mipakigbahin niini kanako ug mipakita kanako nga ang tinuod nga higala mopakigbahin sa mga kamatuoran sa ebanghelyo.