Mensahe sa Visiting Teaching
Usa sa Kasingkasing
Tun-i sa mainampuong paagi kining materyal ug tinguhaa ang inspirasyon aron masayud unsay angay nga ipakigbahin. Sa unsang paagi ang pagsabut sa katuyoan sa Relief Society nag-andam sa anak nga mga babaye sa Dios alang sa mga panalangin sa kinabuhing dayon?
Nga Unta Kita Magkahiusa, ni J. Kirk Richards
“Ang Ginoo mitawag sa iyang mga katawhan og Zion, tungod kay sila usa sa kasingkasing ug usa sa hunahuna, ug nagpuyo diha sa pagkamatarung; ug walay kabus taliwala kanila’ (Moises 7:18) Sa unsang paagi nga kita mahimong usa?
Si Elder M. Russell Ballard sa Korum sa Napulog Duha ka mga Apostoles miingon: “Sa tunga-tunga sa Iningles nga pulong atonement [pag-ula] mao ang pulong nga one. Kon ang tanang katawhan nakasabut niini, wala gayud kitay bisan usa nga dili kabalak-an, bisan sa unsang edad, kaliwat, sekso, relihiyon, o sosyal o ekonomikanhong kahimtang. Maninguha kita nga mosunod sa Manluluwas ug dili gayud kita manlupig, walay pagpakabana, walay pagtahud, o dili mobati sa uban.”1
Si Presidente Henry B. Eyring, Unang Magtatambag sa Unang Kapangulohan, mitudlo: “Kon anaa sa mga tawo [ang] Espiritu, [sila] makalaum og panag-uyon. … Ang Espiritu sa Dios dili gayud magmugna og panagbingkil (tan-awa sa 3 Nephi 11:29). … Mosangput kini sa personal nga kalinaw ug pagbati nga mahiusa sa uban.”2
Namulong sa mga hagit sa pamilya, si Carole M. Stephens, kinsa miserbisyo isip Unang Magtatambag sa Kinatibuk-ang Kapangulohan sa Relief Society: “Wala ko nagpuyo nga na-diborsyo, sa kapait ug kawalay kasiguroan sa pagka-biniyaan, o sa responsibilidad mahitungod sa pagka-single nga inahan. Wala ko kasinati nga namatyan og anak, o dili manganak, o nakagusto sa sama nakong babaye. Wala ko kasulay nga giabusohan, nagbalik-balik nga balatian, o pagkaadik. Wala ko niini nga kahigayunan nga masulayan.
“… Apan pinaagi sa akong mga personal nga mga pagtesting ug mga pagsulay … mas nakaila ko sa Usa kinsa nakasabut gayud. … Agig dugang, akong nasinati ang tanang mortal nga pag-testing nga akong nahisgutan pinaagi sa akong pagka-anak, inahan, apohan, igsoon, iyaan, ug higala.
“Ang atong oportunidad isip mga anak sa Dios nga nagsunod sa pakigsaad dili lang kay ang pagkat-on gikan sa kaugalingon natong mga hagit; kondili ang maghiusa sa pagbati ug kamanggiloy-on samtang gisuportahan nato ang panglimbasug sa ubang sakop sa pamilya sa Dios, sigun sa atong gipanaad nga buhaton.”3
Dugang nga mga Kasulatan ug Impormasyon
Juan 17:20–23; Mga Taga-Efeso 4:15; Mosiah 18:21–22; 4 Nephi 1:15
Hugot nga Pagtuo Kahupayan Pamilya