Dili Magdula og Kalayo!
Ni Jean B. Bingham
Kinatibuk-ang Presidente sa Relief Society
“Sunda ang kasugoan! May kalinaw ug dunay kaluwasan” (Songbook sa mga Bata, 68).
Sa dihang nagdako ko, usa sa akong mga trabaho mao ang pagdaob sa mga basura. Akong pundukon ang mga basura gikan sa balay. Ibutang nako kini sa dakong baril nga nahimutang sa luyo sa balay. Dayon dagkutan nako sa posporo ug ihulog kini sa baril.
Usa ka adlaw kini hangin kaayo, ug ang mga posporo dili makasiga. Mihukom ko sa paghimo og sulo gamit ang pamantalaan. Nagtuo ko nga kining kalayo igo rang makapasiga sa basura. Nakahinumdom ko nga dili maayo ang magdula og kalayo, apan akong gibaliwala ang gibati nga pasidaan. Gilukot nako ang pipila ka mga pamantalaan nga naporma og cone, giduslitan kini sa posporo, ug gihulog kini didto sa baril.
Woosh! Ang kusog nga hangin nga mipaulbo sa nagkayo nga pamantalaan, ug ang basura dali kaayong misiga. Miulbo ang kalayo paingon sa akong nawong. Maayo gani nga ang akong buhok gibugkos nga usa ka ponytail. Apan ang akong bangs nasunog nga nanuskig ang mubo nga nahabilin! Ang akong mga pilok wala na, ug ingon man ang akong mga kilay. Paspas kaayo ang nahitabo!
Kadto mileksyon kanako: kon kamo magdula og makuyaw nga butang, mahimong masakitan kamo! Ang atong mga ginikanan ug ang Espiritu Santo nagpasidaan kanato nga likayan ang makuyaw nga mga butang sama sa pornograpiya ug mga druga. Kon kita mopili sa pagbaliwala sa mga pasidaan, adunay mga sangputanan.
Mapasalamaton ko nga ang akong buhok mitubo og balik paglabay sa panahon. Kana sama sa paghinulsol. Kon kita mohimo og sayop nga mga pagpili, kita makapili sa pag-usab. Mahimo kitang mapasaylo tungod sa Pag-ula ni Jesukristo. Bisan unsa pa kita kabatan-on o katigulang, ang atong Manluluwas anaa kanunay sa pagtabang kanato. Kita mobati og kalinaw pag-usab, sama sa adlaw nga kita gibunyagan.
Ang Langitnong Amahan mihatag kanato og mga sugo tungod kay Siya nahigugma kanato. Gusto Niyang manalipod ug motabang kanato. Pagkanindot nga gasa nga nahatag sa Langitnong Amahan ug Iyang Anak si Jesukristo!