Pagpanalipod sa Tinuohan
Ni Elder Jörg Klebingat
Sa Seventy
Ang Ginoo nagkinahanglan og tawo nga andam ug makahimo sa pagpanalipod ni Kristo ug sa gingharian sa Dios sa mapaubsanon apan lig-on nga paagi.
Litrato gikan sa Getty Images
Sa kinabuhi nga wala pa dinhi sa yuta nakaangkon kita og kabubut-on, mga gahum sa pangatarungan, ug salabutan. Didto kita “gitawag ug giandam … sumala sa daan nga kasayuran sa Dios” ug sa sinugdanan “diha sa sama nga kahimtang” sa ilang mga kaigsoonan (Alma 13:3, 5). Adunay daghang oportunidad sa paglambo ug pagkat-on.
Hinoon, ang patas nga pag-access sa mga pagtulun-an sa mahigugmaon nga langitnong panimalay dili makahatag og samang tinguha tali kanato—ang mga espiritu nga mga anak sa Langitnong Amahan—aron maminaw, magkat-on, ug mosunod. Ang paggamit sa atong kabubut-on, sama sa atong gibuhat karon, nagkadaiya ang lebel sa atong kaikag ug tumong. Pipila kanato nagtinguha og maayo nga makat-on ug mosunod. Ang gubat sa langit nagsingabut, nangandam kita nga mouswag lapas pa sa sa atong premortal nga panimalay. Ang kamatuoran natudlo ug gisupak; mga pagpamatuod nga gipahayag ug gisaway, uban sa matag premortal nga espiritu nga nagpili kon modapig o mopahilayo sa plano sa Amahan.
Walay Magpataliwala
Sa katapusan, ang dili pagpili og habig dili usa sa opsyon niining panagbangi. Bisan karong panahona dili. Kanato nga nagsangkap og hugot nga pagtuo sa umaabut diha sa Pag-ula ni Jesukristo, kadtong nadasig pinaagi sa mga pagpamatuod sa Iyang balaan nga tahas, kadtong naghupot og espirituhanon nga kahibalo ug ang kaisug sa paggamit niini diha sa pagpanalipod sa Iyang sagradong pangalan ang nag-una nga nakigbatok dinhi niining gubat sa mga pulong. Si Juan mitudlo nga ang maisug nga mga espiritu, ug sa uban, nakabuntog ni Lucifer “pinaagi sa dugo sa Kordero, ug pinaagi sa sa pulong sa ilang pagpamatuod (Pinadayag 12:11; emphasis gidugang).
Oo, ang saad nga adunay usa ka Manluluwas nga mipaagas sa Iyang dugo didto sa Getsemani ug sa Kalbaryo ang midaog sa premortal nga gubat. Apan ang atong premortal nga kaisug ug pagpamatuod, ang atong kaandam sa pagpasabut, sa pagpangatarungan, ug pagdasig sa uban nga mga espiritu nakatabang usab nga santaon ang daghang mikuyanap nga mga bakak!
Ingon nga nakaangkon og kalampusan sa usa ka pakigbatok aron sa pagpanalipod Kaniya, kita nahimong mga saksi sa Iyang balaan nga ngalan. Tinuod gayud, ingon nga napamatud-an kanato diha sa pakig-away ug ingon nga nasiguro ang kasensiro ug kaisug, ang Ginoo sa kaulahian miingon kanato—mga sakop sa balay ni Israel—“Kamo mao ang akong mga saksi” (Isaias 43:10). Atong pangutan-on ang atong kaugalingon: Tinuod pa ba kini gihapon sa atong panahon karon?
Ang Atong Kasamtangang Gubat
Usa ka panagsumpaki sa mga hunahuna, kasingkasing, ug mga kalag sa mga anak sa atong Amahan nagdilaab pa gihapon karon agi’g pagpaabut sa Ikaduhang Pag-anhi ni Jesukristo. Samtang daghan sa kalibutan sinsero nga nakuryuso mahitungod sa mga pagtulun-an sa Simbahan, usa ka nagkalapad nga bal-ang tali sa dautan ug sa matarung ang mibulag sa usa ka kalibutan sa moral gikan sa paspas nga pagkunhod sa kamatuoran sa gipahiuli nga ebanghelyo. Kon ang dili hingpit apan naningkamot nga mga Santos kinsa nangita sa kamatuoran giakusahan nga nagsunod sa kangitngit, kon ang matam-is nilang katuyoan ug buhat ipahayag nga mapait (tan-awa sa Isaias 5:20), ikahibulong ba nga ang mabiaybiayong mga tudlo magpunting ngadto sa gipahiuli nga Simbahan sa Ginoo ug sa Iyang matinud-anon nga mga sulugoon? (Tan-awa sa 1 Nephi 8:27).
Si Presidente Thomas S. Monson mitudlo: “Nagpuyo kita sa panahon diin gilibutan kita sa hilabihan nga may katuyoan sa pagdani kanato ngadto sa mga agianan nga magdala sa atong kalaglagan. Aron malikayan ang ingon nga mga agianan gikinahanglan ang determinasyon ug kaisug.”
Ang palabay, walay pasalig nga pagkamiyembro dili igo niining kagubot sa ulahing mga adlaw! Si President Monson mipadayon: “Sa atong pagpakabuhi matag adlaw, dili kapugngan nga ang atong pagtuo hagiton. … Aduna ba kitay moral nga kaisug sa pagbarug nga lig-on alang sa atong mga gituohan, bisan kon ang pagbuhat sa ingon nagkinahanglan nga magbarug kita nga mag-inusara?”1
Bisan pa sa permanente nga kasaba sa palibut nga naggikan sa dako ug lapad nga gambalay (tan-awa sa 1 Nephi 8:26–27), determinado ba kita sa paglakaw nga makanunayon subay sa dalan nga talagsa rang giagian?2 Andam ba kita ug makahimo sa pag-apil sa matinahuron nga mga diskusyon uban sa mga tawo kinsa adunay matinuoron nga mga pangutana? Nga dili kinahanglang mosangpot sa panagbingkil, makahimo ug andam ba kitang mohatag og katin-awan ug depensahan ang mga pagtulun-an sa gipahiuli nga Simbahan ni Jesukristo?
Nagtambag kanato nga mosupak nga dili masuk-anon, si Elder Dallin H. Oaks sa Korum sa napulog duha Ka mga apostoles mitudlo, “Bisan sa atong tinguhang magmaaghup … , kinahanglang dili nato ikumpromiso o mansahan ang atong panaad sa mga kamatuoran nga atong nasabtan.”3
Magmaisugon
Atong hunahunaon og maayo ang imbitasyon ni Presidente Monson: “Sa higayon nga kita duna nay pagpamatuod, atong responsibilidad nga mopakigbahin nianang pagpamatuod ngadto sa uban. … “Hinaut nga magmaisugon kita ug andam sa pagbarug sa unsay atong gituohan, ug kon kinahanglan kitang magbarug nga mag-inusara diha sa proseso, hinaut nga maisugon nato kanang buhaton, gilig-on sa kahibalo nga sa pagkatinuod wala kita mag-inusara kon magbarug uban sa atong Amahan sa Langit.”4
Ang pagkamiyembro lang dili makapahimo dayon sa tawo nga usa ka maisugon nga saksi kang Kristo ug sa Iyang gipahiuli nga Simbahan. Ang Ginoo mitudlo kanato sa pagpasanag sa atong kahayag pinaagi sa pagsunod sa ebanghelyo, bisan pa niana ang pipila ka mga miyembro naghupot sa ilang pagkamiyembro sa sekreto pinaagi sa pagbutang sa ilang kahayag ilawom sa gantangan. Ang uban motubag og panagsa sa mga pangutana sa ebanghelyo apan nagduha-duha sa pagpamatuod ug sa pagdapit. Apan ang uban tinuod gayud nga nangita og mga oportunidad sa pagpakigbahin sa ebanghelyo ug andam nga mobuhat sa ingon. Pipila man kanato ang aktibo, maisugon tigpanalipod sa hugot nga pagtuo?
Aron mahuptan ug madaug pag-usab ang gubat sa mga pulong sa panahon karon, ang Ginoo nagkinahanglan og tawo nga andam ug mapaubsanon apan lig-on nga manalipod ni Kristo, Iyang buhing mga pagpadayag, ni Propeta Joseph Smith, sa Basahon ni Mormon, ug sa mga sumbanan sa Simbahan. Nagkinahanglan Siya og tawo nga “andam kanunay sa pagtubag kang bisan kinsa nga mangutana … sa hinungdan sa paglaum nga anaa kaninyo” (1 Pedro 3:15). Nagkinahanglan Siya og panon sa tinuod nga mga Santos sa Ulahing mga Adlaw nga andam, diha sa usa ka diwa sa kaaghup ug gugma, sa pagpamatuod sa kamatuoran kon ang bisan unsang aspeto sa gipahiuli nga ebanghelyo gihagit!
Ang Ehemplo ni Kapitan Moroni
Kon gibati ninyo nga dili sarang isip usa ka maisug nga tigpanalipod sa kamatuoran sa atong panahon, wala kamo mag-inusara. Kadaghanan kanato gibati og ingon nianang paagi. Apan adunay mga yanong mga butang nga atong mahimo aron makabaton og abilidad ug kamasaligon.
Sa Basahon ni Mormon, atong makat-unan nga si Kapitan Moroni “[mi]andam sa mga hunahuna sa mga katawhan nga magmatinud-anon ngadto sa Ginoo nga ilang Dios” (Alma 48:7). Nakaamgo siya nga ang unang linya sa panalipod usa ka kinabuhi nga natukod sa pundasyon sa personal nga kamasulundon. Dugang pa, siya “mitukod og mga gagmay nga kota, … mibutang og mga bungdo sa yuta … , ug usab mitukod og mga paril nga mga bato aron moliyok kanila sa palibut” (bersikulo 8). Dili lamang siya mikuha og pipila ka klaro nga mapanalipdanon angay nga buhaton, apan siya usab maayo kaayong nakapalig-on sa “ilang mahuyang nga mga kota” (bersikulo 9). Ang iyang mapanagan-on nga estratehiya malampuson kaayo nga ang iyang mga kaaway “nahibulong sa hilabihan” (Alma 49:5) ug dili makahimo sa ilang dautan nga mga laraw.
Mahimong makapangutana mo, “Aduna bay tawo nga sama nako ka huyang nga mahimong maisug nga tigpanalipod ni Kristo ug sa Iyang gipahiuli nga ebanghelyo?” Ang inyong gituohan nga kahuyang mahimong mapalig-on kon inyong dawaton kanang tanan nga pasiunang gipangayo sa Ginoo nga mao ang “[inyong] mga kasingkasing ug usa ka andam nga hunahuna” (D&P 64:34). Gigasahan og maisugon nga espiritu, ang “ordinaryo” nga mga tawo sa kalibutan mao ang iyang paborito nga mga bag-ong gitawag nga mga miyembro. Hinumdumi nga sa “gagmay kaayo nga mga paagi,” Siya mahimuot nga “molibog sa maalamon” (tan-awa sa Alma 37:6, 7). Kon andam kamo sa pagpakigbahin ug sa pagpanalipud sa gipahiuli nga ebanghelyo ug sa mga lider sa simbahan ug mga doktrina, mahimo ninyong ikonsiderar ang mosunod nga mga sugyot.
1. Sayri kon si kinsa ug unsa ang panalipdan. Ang lig-on nga estratehiya sa pagpanalipod mao ang pundasyon sa lig-on nga opensiba. Samtang kamo dili epektibong manalipod nianang butang nga wala o gamay ra ang inyong nahibaloan, kamo dili makapanalipod niini kon kamo walay pagpakabana. Sama sa usa ka sinuholan nga magbalantay, kinsa gisuholan aron sa pag-atiman sa karnero, mosibug o mopahawa sa unang timailhan sa problema, mao nga kamo dili makapugong og dugay sa inyong depensa hangtud nga makaangkon kamo og espiritwal nga kalig-on nga ang inyong kawsa mao ang angay ug tinuod. Sa pagsaksi ug pagpanalipod kang Kristo ug sa Iyang Simbahan, kinahanglan nakahibalo kamo nga Siya buhi ug nga kini mao ang Iyang gipahiuli nga Simbahan!
Kadtong makaila ug nagsunod sa ebanghelyo mapuno sa salabutan ug usa ka nagdilaab nga kalig-on gikan sa katakus ug personal nga kasinatian. Sila ang mas andam sa pagsaksi sa kamatuoran kay sa niadtong nakahatag og pagtagad lamang kon unsaon sa paghatag sa mga tubag.
2. Timbang-timbanga ang kalig-on sa inyong mga kota. Sunda ang Ehemplo ni Kapitan Moroni. Matinuoron nga motimbang-timbang sa kalig-on ug kahuyang sa imong pagsabut sa ebanghelyo. Inyo bang gipakita ang maayong ehemplo pinaagi sa pagsunod sa usa ka Kristohanon nga kinabuhi? Inyo bang nakaplagan ang mga tubag sa mga pangutana pinaagi sa pagsiksik sa mga kasulatan? Komportable ba kamo sa paghatag sa inyong pagpamatuod? Makatubag ba kamo sa mga pangutana kalabut sa mga doktrina ug mga pagtulun-an sa Simbahan, bisan og ang pipila nga mas lisud ipasabut, pinaagi sa paggamit sa mga kasulatan? Andam ba kamo sa pag-ingon, “wala ko masayud, apan akong sutaon”, o tudloan ang tawo sa dapit asa sila makakaplag sa mga tubag? Makatabang kaha ang pagkugi sa pagtuon aron kamo makaangkon og kamasaligon ug kaisug nga inyong gitinguha?5
3. Lig-una ang inyong mga kota. Uban sa usa ka pag-assess sa inyong mga “kota” sa doktrina sa dili pa ninyo, sugdan ang pagtutok, sa taas og tagal nga pagtuon sa tumong sa paghimo sa huyang nga mga butang nga mahimong lig-on nganha kaninyo (tan-awa sa Ether 12:27). Tubaga ang pangamuyo ni Moises, “Hinaut unta nga ang tibuok nga katawhan sa Ginoo mga manalagna, nga igabutang sa Ginoo ang iyang Espiritu sa ibabaw nila!” (Numeros 11:29). Ipadayon ang pagpangayo sa Ginoo diha sa pag-ampo nga sa matag ginagmayng paningkamot nga inyong gihimo sa matag adlaw, Siya mohatag og abunda nga espirituhanon nga panalipod diha kaninyo.
Mainampoong balik-balikon ang pagbasa sa kasulatan. Dili basta lang mobasa sa mga pamilyar nga mga istorya. Pagbusog diha niini. Ikonsiderar ang padayon nga pagtuon sa doktrina nga mga sulat ug ipadayon ang pagdugang niini. Alang sa matag hilisgutan, ikonsiderar ang pag-ila ug dayon pagmemorya sa han-ay nga paagi ang pipila sa mga kasulatan aron makatabang kini sa kaugalingong hunahuna ug mga pagtudlo. Samtang si Elder Richard G. Scott (1928–2015) sa Korum sa Napulog Duha ka mga Apostoles mitudlo, “kon ang mga kasulatan gigamit sa ingon nga ang Ginoo misugo sa pagrekord niini, kini adunay natural nga gahum nga dili masulti kon usbon sa pagkasulti.”6
Ikonsiderar ang pagmemorya og pipila ka mga kinutlo sa mga propeta ug apostoles. Ang Espiritu Santo sa kasagaran ang “magatudlo … magapahinumdom” kadto lang nga inyong unang gibutang diha (tan-awa sa Juan 14:26). Ang tinuod nga doktrinal nga kahibalo nga nakasentro kang Kristo inubanan sa “ang espada sa [Iyang] Espiritu” (D&P 27:18) mao ang labing dakong pagpalig-on ug hinagiban sa opensiba nga inyong gipanag-iya.
4. Bansaya! Ang full-time nga misyonaryo sa Simbahan giawhag sa pag-role play sa mga sitwasyon diin sila mismo ang makakaplag sa ilang kaugalingon. Tungod kay kamo mahimong hangyoon nga panalipdan ang Simbahan o sa pagpasabut sa doktrina niini sa labing wala damha nga mga panahon o mga dapit, ikonsiderar ang pagsunod sa ehemplo sa mga misyonaryo sa pag-andam sa imong kaugalingon sa espirituhanon nga paagi sa dili pa ang natural nga panag-istoryahanay (tan-awa sa Moises 3:5, 7). I-role-play sa dili pa kamo mahimutang sa mga sirkumstanya diin kamo nagtudlo o nanalipod sa sumbanan sa ebanghelyo. Kon mag-inusara o uban sa pamilya o mga higala, pangutana og hinimo himo nga mga pangutana ug dayon tubaga sila! Samtang kamo mahimong mas andam, kamo “nag-anam sa pagkalig-on” sa inyong pagsalig isip usa ka saksi ni Kristo (tan-awa sa Helaman 3:35). Sugdi uban sa mubo ug yano nga mga tubag. Kini mahimong igo kaayo sa kadaghanan sa mga sitwasyon. Apan mahimo usab ninyong mas mapalig-on ang inyong mga depensa pinaagi sa pagtuon sa may kalabutan nga mga kasulatan ug sa pag-konektar sa nagkalain-laing mga doktrina.
5. Pangita og mga oportunidad. Ingon nga naandam ang inyong kaugalingon, pag-ampo alang sa mga oportunidad sa mapaubsanon apan masaligon nga ipakigbahin ug, kon gikinahanglan, pagpanalipod sa ebanghelyo. Hinumdumi, ang “pagkawala sa kadasig dili ang pagkawala sa kahusto apan ang pagkawala sa kaisug.”7 Pag-ampo nga inyong higugmaon ang mga anak sa Langitnong Amahan miyembro o dili miyembro sa Simbahan nga mopakigbahin sa husto ug mopanalipud sa mga sumbanan sa ebanghelyo. Pag-ampo nga kamo dili gayud makasinati nga mobaliwala o modawat sa mga doktrina nga makapalibog, apan uban sa hugot nga pagtuo maningkamot sa pagbuntog niini.
Hinumdumi nga bisan ang usa ka bata mahimong usa ka tigpanalipod ni Kristo diha sa lugar nga dulaanan pinaagi sa paghatag og yano nga pagpamatuod; dili kinahanglan nga mahimo kamong eskolar sa ebanghelyo aron makasaksi sa kamatuoran; dili kinahanglan nga anaa ninyo ang tanang tubag; nga OK ra nga mosulti usahay nga, “wala ko kahibalo” o “kini nga mga misteryo wala pa hingpit ipahibalo ngari kanako; busa ako magpugong” (Alma 37:11). Ang dili “maulaw sa ebanghelyo ni Jesukristo” (Mga Taga-Roma 1:16) labaw pa kay sa yanong pagbaliwala o antuson ang pagtuis sa kamatuoran ug mga bakak; nagpasabut kini sa pagkahibalo ug pagpanalipod sa mga doktrina! Busa, kon kita magpabiling magpakahilum, himoa kini dili tungod sa kahadlok apan tungod kay nagsunod kita sa pag-aghat (tan-awa, pananglit, Alma 30:29).
Mobarug isip usa ka Aktibo nga mga Saksi
Samtang kamo nagpadayon sa pagpanalipod sa ebanghelyo ni Jesukristo, “hugot nga pagtuo, paglaum, gugma nga putli ug pagmahal, uban ang bug-os nga tinguha ngadto sa himaya sa Dios, nakahimo [kaninyo] nga takus alang sa buhat” (D&P 4:5). Atong hinumduman nga si Kristo maaghup apan dili gayud huyang—nga Siya midapit apan usab mibadlong, ug nga Siya usab miingon nga “Siya nga may espiritu sa panagbingkil dili gikan kanako” (3 Nephi 11:29).
Samtang ang dautan nga kalibutan nagpadayon sa paglapas sa moral ug doktrinal nga mga sumbanan sa Dios, si Kristo nag-agad sa bisan sa labing ubos sa mga Santos nga mahimong buhi nga mga saksi sa Iyang ngalan.
Si Presidente Gordon B. Hinckley (1910–2008) mipahinumdom kanato nga “dili igo ang pagkamatarung. Kinahanglang kamo nga motampo og kaayohan alang sa usa ka butang. Kinahanglan kamo mohatag sa kaayohan sa kalibutan. Ang kalibutan kinahanglan gayud nga mahimong mas maayong dapit tungod sa inyong presensya. … Niining kalibutan nga nalukop sa mga problema, makanunayon nga nahulga sa mangitngit ug dautan nga mga hagit, ug kamo kinahanglan mopatigbabaw sa ordinaryo nga mga buhat, dili mobaliwala. Mahimo kamong moapil ug motingog uban sa kusog nga tingog alang nianang matarung.”8
Kon kamo magtinguha nga mahimong usa ka saksi sa gipahiuli nga ebanghelyo, apil sa pundok sa ulahing mga adlaw nga mga kasundalohan sa mga saksi pinaagi sa pagpasanag sa inyong kahayag! Unta ang inyong pagsunod sa ebanghelyo ug inyong pagpanalipod nianang sama nga ebanghelyo mahimong usa ka pagpakita sa inyong halawom nga pagkakabig ngadto kang Jesukristo.