Hangtud Kita Magkita Pag-usab
Ang Basahon ni Mormon: Tinuoray nga usa ka Milagro
Gikan sa “It Was a Miracle!” Ensign, Nob. 1977, 11–13.
Gikan sa sinugdanan hangtud sa katapusan, ang Basahon ni Mormon usa ka pagpadayag, usa ka dinasig nga hubad, ang buhat sa Dios ug dili sa bisan kinsa nga tawo.
Ang kolor sa background gikan sa Getty Images
Ako … mopamatuod sa balaan nga tawag ni Propeta Joseph Smith ug … mopahayag sa akong hugot nga pagtuo sa milagro diin ang Basahon ni Mormon gihubad ug gimantala. …
Sa ika-22 nga adlaw sa Septyembre 1823, duol sa Palmyra, New York, usa ka anghel sa Dios mipadayag sa nahimutangan niini ngadto sa [usa ka disesiyete] anyos nga batang lalaki nga ginganlan og Joseph Smith. …
… Atong hunahunaon sa makadiyot ang aktwal nga paghubad niini nga rekord. Si Joseph Smith miingon nga iya kining gibuhat pinaagi sa gasa ug gahum sa Dios. … Ingon nga walay kinaadman nianang panahona sa iyang kinabuhi, mao lamang kanang paagiha nga iya kanang mahimo. …
… Sa unsang paagi nga ang mga kritiko [nianang higayuna] nakaingon man nga si Joseph Smith, sa iyang kabatan-onan, edukado kaayo nga siya makahimo o tinuyo nga mokuha og mga tudling gikan sa Biblia ug sa hanas nga paagi morag gipagawas nga kabahin kini sa manuskrito sa Basahon ni Mormon?
Ang iyang inahan miingon nga nianang puntoha sa sayong bahin sa iyang kinabuhi wala pa gani siya makahuman pagbasa sa Biblia. Nan giunsa niya pagpili og maayo ang pinili nga mga tudling ug mihugpong niini ngadto sa Basahon ni Mormon sa hilabihan ka tukma ug hanas nga paagi?
Kay wala makahuman pagbasa sa Biblia sa iyang unang mga katuigan, siya walay igong kahibalo sa paghimo sa maong buhat sa pag-edit bisan kon siya hanas pa sa pagsulat o pag-edit, walay usa sa maong mga kahanas ang iyang naangkon sa ingon ka sayo sa kinabuhi.
[Apan] ang Basahon ni Mormon usa ka literaryo ug relihiyoso nga obra maestra, ug sobra pa gani sa gihambin nga mga paglaum o abilidad sa bisan unsang batang mag-uuma. …
Basaha, pananglit, ang uban sa maanindot nga mga wali sa Manluluwas diha niana nga basahon. Timan-i nga ang Ginoo mikutlo sa mga propeta sa Biblia. Makasulti ba kita nga ang walay kabangkaagan nga si Joseph Smith adunay kaisug o kahanas sa pagsulat og usab sa mga wali sa Manluluwas ug misukip sa mga tudling [sa Biblia] diha niini, nga naghunahuna sa pagpalambo sa unsay gisulti ni Jesus?
… [Si Joseph Smith] … wala mousab sa buhat ni Mormon, sa mga wali ni Jesus, sa talagsaong panalipod ni Abinadi, o sa mga sinulat ni Malaquias o Isaias. Siya usa gayud ka tighubad, dili usa ka editor o usa ka kompositor; ni siya usa ka kawatan nga mikopya sa buhat sa ubang tawo. …
Gikan sa sinugdanan hangtud sa katapusan, ang Basahon ni Mormon usa ka pagpadayag, usa ka dinasig nga hubad, ang buhat sa Dios ug dili sa bisan kinsa nga tawo. Gikan sa sinugdanan hangtud sa katapusan kini tinuod.