Mga Tubag gikan sa mga Lider sa Simbahan
Unsaon sa Pagdapit ang Espiritu Santo
Ni Presidente Henry B. Eyring
Unang Magtatambag sa Unang Kapangulohan
Gikan sa debosyonal sa Brigham Young University–Idaho nga gihatag niadtong Enero 25, 2005.
Usa sa mga paagi nga akong mahibaloan nga mibati ko sa impluwensya sa Espiritu Santo mao nga mobati ko sa kahayag ug malipayon ko. Kon ang Espiritu Santo daw layo kanako, mobati ko’g kangitngit ug dili ko malipayon. Gibati na nako kana nga paghinay ug ang pagdagayday sa kahayag ug kalipay sa akong kinabuhi ug kamo usab.
Ganahan ko nga mobati niana nga kahayag ug ganahan kong magmalipayon. Wala kinahanglana nga maghulat pa ko og mga kasamok ug pagsulay aron magtinguha kong matabangan sa Espiritu Santo. Ako mahimong mopili sa paghinumdom kon unsay pagbati niana nga panag-uban, ug kon mahitabo man kana, gusto ko nga madawat og usab kana nga panalangin sa tibuok nakong kinabuhi.
Kon magtinguha kita sa Espiritu Santo ug sa kalinaw sa hunahuna ug katagbawan nga moabut gumikan niini, nahibalo na kita unsay buhaton. Kita Nangamuyo sa Dios niini pinaagi sa hugot nga pagtuo. Nagkinahanglan kini og pag-ampo inubanan sa pagtuo aron maangkon ang pagpakig-uban sa Espiritu Santo. Kana nga pagtuo mao nga ang Dios nga Amahan, ang Tiglalang sa tanang butang, buhi ug gusto nga makabaton kita sa Espiritu Santo ug gusto nga ipadala kanato ang Maghuhupay. Nagkinahanglan og pagtuo nga si Jesus mao ang Kristo ug nga Siya miula sa atong mga sala ug mibugto sa mga gapos sa kamatayon. Uban niana nga pagtuo kita moduol sa atong Amahan sa balaan nga pagtahud ug uban sa pagsalig nga Siya motubag. Uban niana nga pagtuo kita motapos sa atong pag-ampo pinaagi sa pangalan ni Jesukristo isip tinuod Niyang mga disipulo, masaligon nga ang tinuoray natong paghinulsol, ang atong bunyag pinaagi sa Iyang mga sulugoon, ug ang matinud-anon natong pagserbiyso alang sa Iyang kawsa naghimo natong lunsay ug limpyo ug takus sa panalangin nga maoy atong gitinguha, ang pakig-uban sa Espiritu Santo.