Christ Preaching in the Spirit World [Kristo Nagsangyaw didto sa Kalibotan sa Espiritu], ni Robert T. Barrett

Nobyembre 20–26

1 ug 2 Pedro

“Napuno Kamo Pag-ayo sa Kalipay nga Dili Malitok sa Pulong”

Sugdi ang imong pagtuon sa 1 ug 2 Pedro pinaagi sa pag-ampo. Hinumdomi nga ang imong labing maayo nga pagpangandam sa pagtudlo moabot pinaagi sa imong mga kasinatian sa personal ug pamilya nga pagtuon.

Dapita ang Pagpaambit

Ipakita ang hulagway ni Pedro diha sa latid niini nga semana sa Dali, Sunod Kanako—Alang sa mga Indibidwal ug mga Pamilya, ug dapita ang mga bata sa pagsulti kanimo og butang nga ilang nahibaloan mahitungod kang Pedro. Pahinumdomi sila nga si Pedro mao ang lider sa Simbahan human nabanhaw si Jesus, ug ipasabot nga ang 1 Pedro ug 2 Pedro mao ang mga sulat gikan niya ngadto sa mga miyembro sa Simbahan sa iyang panahon.

Itudlo ang Doktrina: Mas Gagmay nga mga Bata

1 Pedro 1:6–7; 3:14

Mahimo akong maglipay bisan sa lisod nga mga panahon.

Ikonsiderar kon unsaon nimo sa pagtudlo niini nga mga bersikulo sa paagi nga makatabang sa mga bata nga modangop sa Manluluwas kon mag-atubang sila og kalisdanan.

Posible nga mga Kalihokan

• Tabangi ang mga bata nga maghunahuna og mga ehemplo sa lisod nga mga butang nga nasinati ni Jesus, sama sa gibugalbugalan o gibiaybiay. Ipasabot nga kitang tanan adunay lisod nga mga panahon sa atong kinabuhi. Basaha og dungan ang 1 Pedro 1:6–7; 3:14, ug ipaambit ang usa ka kasinatian sa dihang nag-atubang ka og “[pagsulay] sa i[m]ong pagtuo” ug ang Manluluwas mitabang kanimo nga makakaplag og kalipay. O mahimo nimong ipaambit ang pag-ampo ni Propeta Joseph Smith diha sa Bilanggoan sa Liberty ug ang kahupayan nga gihatag sa Dios kaniya (tan-awa sa Doktrina ug mga Pakigsaad 121:1–8; 123:17).

Joseph Smith in Liberty Jail [Si Joseph Smith sa Bilanggoan sa Liberty], ni Greg K. Olsen

• Ipakita ang usa ka hulagway nga nagpakita ni Jesus ug sa ubang mga tawo (ang Libro sa mga Hulagway sa Ebanghelyo adunay daghan; mao usab ang Dali, Sunod Kanako—Alang sa mga Indibidwal ug mga Pamilya). Hangyoa ang mga bata sa pagpangita kang Jesus diha sa hulagway. Pagpamatuod nga kon mangita kita sa Manluluwas, makatabang Siya kanato nga makakaplag og kalipay sa atong kinabuhi.

1 Pedro 2:9–12

Gusto sa Langitnong Amahan nga mahimo akong ehemplo ngadto sa uban.

Si Pedro nagtudlo nga kita “katawhan sa Dios” ug nga ang atong maayo nga mga buhat “magdayeg … sa Dios.”

Posible nga mga Kalihokan

• Paghulagway og mga butang nga lahi kaayo sa ilang palibot, o ipakita ang mga hulagway niana nga mga butang. Pananglitan, ang usa ka templo lahi kaayo kay sa mga gambalay sa palibot niini o ang usa ka bukid tataw kaayo ibabaw sa walog. Ipasabot nga kon motuman kita sa mga sugo, makita kita nga lahi ug ang ubang mga tawo makakita sa atong mga ehemplo. Paghisgot og pipila ka “maayong buhat” nga imong nakita nga gibuhat sa mga bata. Ipasabot nga ang mga maayong buhat nga sama niini “magdayeg … sa Dios”—makatabang kini sa uban nga mobati og dugang nga gugma alang sa Dios ug tinguha nga moserbisyo Kaniya.

• Kompletoha ang pahina sa kalihokan uban sa mga bata. Sa unsang paagi nga ang mga tawo nga ilang nakita sa hulagway nagdayeg sa Dios?

1 Pedro 3:18–20; 4:6

Ang mga espiritu sa kalibotan sa espiritu makakat-on mahitungod sa ebanghelyo.

Human Siya namatay, si Jesus miadto sa kalibotan sa espiritu ug mipadala sa matarong nga mga espiritu sa pagtudlo sa ubang mga espiritu kinsa wala pa makadawat sa ebanghelyo.

Posible nga mga Kalihokan

• Sultihi ang mga bata mahitungod sa usa ka tawo nga imong kaila kinsa namatay. Ipasabot nga kon ang mga tawo mamatay, ang ilang mga espiritu mobiya sa ilang mga lawas ug moadto sa kalibotan sa espiritu. Basaha ang 1 Pedro 3:19 ug ipasabot nga sa dihang namatay si Jesus, mibisita siya sa kalibotan sa espiritu. Didto, gihangyo Niya ang matarong nga mga espiritu sa pagtudlo sa ebanghelyo ngadto sa ubang mga espiritu kinsa wala pa makadawat sa ebanghelyo (tan-awa sa Doktrina ug mga Pakigsaad 138:30).

• Ipakita ang usa ka hulagway sa templo. Ipasabot ngadto sa mga bata nga kon igo na ang ilang pangidaron, makaadto sila sa templo ug mabunyagan alang sa ilang mga katigulangan nga wala mabunyagi samtang anaa pa dinhi sa yuta. Tabangi ang mga bata sa paghimo og yano nga family tree.

Itudlo ang Doktrina: Mas Magulang nga mga Bata

1 Pedro 3:12–17; 4:13–14, 16

Makakaplag ako og kalipay ug kalinaw bisan sa malisod nga mga panahon.

Ang mga bata nga imong gitudloan tingali nakasinati og pipila ka matang sa mga pagsungog-sungog o pagbugalbugal tungod sa ilang gituohan. Kini nga mga bersikulo makatabang kanila niana nga mga panahon.

Posible nga mga Kalihokan

• I-summarize ang pipila ka istorya mahitungod ni Jesus nga gilutos, o dapita ang mga bata sa pagbasa niini—tan-awa, pananglit, sa Mateo 12:9–14 o Lucas 22:47–54. Pangutan-a ang mga bata kon nakasulay na ba sila nga gisungog o gibugalbugalan tungod kay nagsunod sila sa mga pagtulon-an ni Jesukristo. Unsay gibati nila niini? Dayon basaha og dungan ang 1 Pedro 3:12–14; 4:13–14, 16, ug hangyoa ang mga bata sa pagpangita kon unsay gisulti ni Pedro mahitungod sa pag-antos “tungod sa … pagbuhat sa matarong.” Nganong mahimo gihapon kitang magmalipayon kon ang ubang tawo magbugalbugal kanato tungod sa pagbuhat sa matarong?

• Pagpaambit og kasinatian sa dihang nakakaplag ka og kalipay o kalinaw atol sa usa ka pagsulay, o ipaambit kon sa unsang paagi nga si Propeta Joseph Smith nakakaplag og kalinaw sa dihang anaa siya sa bilanggoan sa Liberty (tan-awa sa Doktrina ug mga Pakigsaad 121:1–8; 123:17). Unsaon nato nga makakaplag og kalipay ug kalinaw diha ni Kristo atol sa atong mga pagsulay?

1 Pedro 3:15

Mahimong andam ako kanunay nga mopaambit sa ebanghelyo.

Ang mga bata nga imong gitudloan makabaton og daghang oportunidad sa tibuok nilang kinabuhi sa pagtubag og mga pangutana gikan sa ubang tawo kabahin sa ilang gituohan. Ikonsiderar unsay imong mahimo sa pagtabang kanila nga “[maka]pangandam … kanunay [sa] pagtubag.”

Posible nga mga Kalihokan

• Hisgoti ang usa ka panahon sa dihang dunay nangutana nimo mahitungod sa Simbahan, ug ihulagway kon gibati ba nimo nga andam sa pagtubag. Hangyoa ang mga bata sa paghisgot kabahin sa bisan unsang panahon sa dihang dunay mga tawo nga nangutana kanila mahitungod sa Simbahan. Basaha og dungan ang 1 Pedro 3:15. Unsaon nato pagsunod ang tambag ni Pedro niini nga bersikulo?

• Tabangi ang mga bata nga maghunahuna og pipila ka mahimong ipangutana sa mga tawo mahitungod ni Jesukristo o sa Iyang Simbahan. Papuli-puliha ang mga bata sa pagpasabot kon unsaon nila sa pagtubag niini nga mga pangutana aron mahimo silang “andam … kanunay.” Ang mga Artikulo sa Hugot nga Pagtuo naghatag og yano nga mga kamatuoran nga magamit sa mga bata sa pagtubag sa mga pangutana mahitungod sa Simbahan.

1 Pedro 3:18–20; 4:6

Ang mga espiritu sa kalibotan sa espiritu makakat-on mahitungod sa ebanghelyo.

Kon ang mga matarong mamatay, moadto sila sa kalibotan sa espiritu aron sa pagtudlo sa ebanghelyo ngadto niadtong wala makadawat niini samtang dinhi pa sa yuta.

Posible nga mga Kalihokan

• Pagdrowing diha sa pisara og lingin nga adunay linya diha sa tunga. Isulat ang Paraiso sa Espiritu sa usa ka tunga sa lingin ug Bilanggoan sa Espiritu sa pikas tunga. Dapita ang usa sa mga bata sa pagbasa sa 1 Pedro 3:18–20; 4:6 (tan-awa ang 1 Pedro 4:6 sa Giya ngadto sa mga Kasulatan alang sa mga kausaban gikan sa Hubad ni Joseph Smith). Ipasabot nga sa dihang namatay si Jesus, ang Iyang espiritu miadto sa paraiso sa espiritu. Gisugo Niya ang matarong nga mga espiritu didto sa pagtudlo sa ebanghelyo ngadto sa mga espiritu nga didto sa bilanggoan sa espiritu.

• Dapita ang usa ka ginikanan o magulang sa usa sa mga bata sa pagsulti mahitungod sa pag-adto sa templo ug sa pagdawat og mga ordinansa alang sa usa sa ilang mga katigulangan.

• Tabangi ang mga bata sa paghimo og yano nga family tree.

Awhaga ang Pagkat-on diha sa Panimalay

Dapita ang mga bata sa pagpaambit sa ilang family tree ngadto sa mga sakop sa ilang pamilya ug sa pagpangayo nila og tabang sa pagdugang og mga ngalan diha niini.

Pagpalambo sa Atong Pagtudlo

Tinguhaa nga makasabot sa mga bata nga imong gitudloan. Nakaila ka sa mga bata nga imong gitudloan, busa usba ang mga ideya niini nga latid kon gikinahanglan aron matubag ang ilang mga panginahanglan. Mahimo nimong gamiton ang mga kalihokan nga gisugyot niini nga latid, dili lang kadtong gisulat alang sa grupo sa edad nga imong gitudloan. (Tan-awa sa Pagtudlo sumala sa Pamaagi sa Manluluwas, 7.)