Balm of Gilead [Tambal sa Gilead], ni Annie Henrie

Oktubre 30–Nobyembre 5

Mga Hebreo 1–6

Jesukristo, “Tinubdan sa Dayon nga Kaluwasan”

Unsa nga mga kamatuoran ang imong nakita sa Mga Hebreo 1–6 nga nadasig ka nga itudlo sa mga bata? Pagmatngon sa mga pag-aghat sa Espiritu nga moabot samtang mangandam ka, ug seguroha nga marekord kini.

Dapita ang Pagpaambit

Gidawat ba sa mga bata ang imbitasyon sa kataposan sa leksiyon sa miaging semana nga mangita og usa ka bersikulo sa kasulatan nga mahimo nilang mapaambit? Kon mao, hatagi sila og panahon sa pagpaambit niini. Kon wala, tabangi sila sa paghunahuna og usa nga bag-o lang nilang nakat-onan gikan sa mga kasulatan nga mahimo nilang mapaambit.

Itudlo ang Doktrina: Mas Gagmay nga mga Bata

Mga Hebreo 1:1–10; 2:8–10, 17–18

Nagtuo ako ni Jesukristo.

Kini nga mga bersikulo makatabang sa mga bata nga makakat-on pa og dugang mahitungod ni Jesukristo ug mapalig-on ang ilang relasyon uban Kaniya.

Posible nga mga Kalihokan

• Pangita og pipila ka kamatuoran mahitungod ni Jesukristo diha sa Mga Hebreo 1:1–10; 2:8–10, 17–18, ug isulat kini diha sa mga piraso sa papel. Tagoi ang mga papel libot sa lawak, ug dapita ang mga bata sa pagpangita niini. Tabangi ang mga bata sa pagbasa sa mga kamatuoran nga nasulat diha sa mga papel, ug hisgoti kon unsa ang gipasabot niini nga mga kamatuoran. Kon gikinahanglan, ipasabot nga si Jesus gitawag nga Anak sa Dios tungod kay ang Langitnong Amahan mao ang amahan sa Iyang espiritu ug sa Iyang lawas.

• Ipakita ang usa ka hulagway sa Manluluwas, ug ipaambit kon nganong mapasalamaton ka alang Kaniya. Papuli-puliha ang matag bata sa pagkupot sa hulagway ug sa pagpaambit kon nganong mapasalamaton siya alang kang Jesukristo.

Mga Hebreo 3:8

Gusto sa Langitnong Amahan nga kita “[dili mopagahi sa atong] kasingkasing.”

Ang Mga Hebreo 3 naghulagway sa mga Israelita nga mipagahi sa ilang mga kasingkasing ug misalikway sa mga panalangin sa Ginoo. Kini mahimong pasidaan kanatong tanan nga dili mopagahi sa atong mga kasingkasing.

Posible nga mga Kalihokan

• Pagdala ngadto sa klase og butang nga makatuhop (sama sa usa ka espongha o labakara) ug usa ka butang nga gahi (sama sa usa ka bato). Dapita ang mga bata sa paghikap sa mga butang ug sa paghulagway kon sama sa unsa kini hikapon. Butangi og pipila ka tulo sa tubig ang matag butang, ug ipasabot nga ang tubig mas motuhop ngadto sa butang nga makatuhop kay sa bato. Ipasabot nga ang atong kasingkasing kinahanglang humok ug dili gahi aron atong madawat ang mga kamatuoran sa Langitnong Amahan ug ang Iyang gugma.

• Paggunting og porma og kasingkasing gikan sa humok nga materyal, sama sa panapton, ug sa mas gahi nga materyal, sama sa karton. Hisgoti sa mga bata ang kalainan tali sa pagbaton og humok nga kasingkasing ug pagbaton og gahi nga kasingkasing. Pagpaambit og pipila ka ehemplo gikan sa mga kasulatan sa mga tawo nga adunay humok nga mga kasingkasing o gahi nga mga kasingkasing sama ni Nephi, Laman, ug Lemuel (1 Nephi 2:16–19); ni Pablo (Mga Buhat 9:1–22); o ni Joseph Smith (Joseph Smith—Kasaysayan 1:11–20). Samtang imong ipaambit ang matag ehemplo, dapita ang mga bata sa pagtudlo ngadto sa humok nga kasingkasing o sa gahi nga kasingkasing.

“Ang Dios maoy [n]agpili” ni Aaron (Mga Hebreo 5:4). Moses Calls Aaron to the Ministry [Si Moises Mitawag ni Aaron sa Pagpangalagad], ni Harry Anderson

Mga Hebreo 5:4

Ang mga naghupot sa pagkapari gitawag sa Dios.

Ang Mga Hebreo 5:4 usa ka importante nga bersikulo tungod kay nagklaro kini nga ang mga naghupot sa pagkapari kinahanglang pagatawgon sa Dios. Ingon usab niini ngadto ni bisan kinsa nga gitawag sa pagserbisyo diha sa Simbahan sa Ginoo.

Posible nga mga Kalihokan

• Basaha ang Mga Hebreo 5:4 ngadto sa mga bata. Hangyoa ang usa ka naghupot sa pagkapari sa pagpasabot kon unsa ang pagkapari. Makapaambit usab siya kon giunsa niya sa pagserbisyo sa uban samtang iyang gituman ang iyang mga katungdanan. Hangyoa usab ang usa ka sister sa ward sa pagpaambit sa iyang kasinatian nga gi-set apart alang sa usa ka calling sa Simbahan. Awhaga siya sa pagpaambit kon sa unsang paagi nga ang Ginoo mipanalangin kaniya og gahom aron sa pagtuman sa iyang calling.

• Tabangi ang mga bata sa pagsag-ulo sa mga pulongan gikan sa ikalima nga artikulo sa hugot nga pagtuo. Ipakigbahin ang imong pagpamatuod nga ang mga tawo kinsa gitawag sa paghimo sa buhat sa Dios gitawag sa Dios pinaagi sa pagpadayag.

Itudlo ang Doktrina: Mas Magulang nga mga Bata

Mga Hebreo 1:1–10; 2:8–10, 17–18

Nagtuo ako ni Jesukristo.

Ang Sulat ngadto sa mga Hebreo gisulat aron sa paglig-on sa hugot nga pagtuo sa Hebreo nga mga Santos diha ni Jesukristo. Mao usab ang mahimo niini diha sa mga bata nga imong gitudloan.

Posible nga mga Kalihokan

• Sangoni ang matag bata og pipila ka bersikulo diha sa Mga Hebreo 1:1–10; 2:8–10, 17–18, ug dapita ang mga bata sa pagpangita og mga kamatuoran mahitungod ni Jesukristo diha niana nga mga bersikulo. Ipaambit o ipasulat kanila diha sa pisara ang unsay ilang makit-an. Unsa pa ang atong nahibaloan mahitungod ni Jesukristo? Ang mga bata mahimong makakita og pipila ka ideya diha sa mga awit sama sa “Buhi ang Manunubos Ko, Niini Nasay[o]d Ako” (Mga Himno, nu. 80) o “Mipadala sa Bugtong Anak” (Songbook sa mga Bata, 20–21).

• Dapita ang mga bata sa pagdrowing og mga hulagway sa ilang kaugalingon uban sa ilang mga ginikanan. Hangyoa sila sa pagpaambit kon unsa ang anaa nila nga anaa usab sa ilang mga ginikanan. Ipasabot nga sa dihang ang Mga Hebreo 1:3 nag-ingon nga si Jesukristo mao ang “tukma nga hulagway sa … kinaiya [sa Dios],” nagpasabot kini nga si Jesus ug ang Langitnong Amahan adunay managsama nga mga kinaiya ug mga hiyas. Hisgoti ngadto sa mga bata kon sa unsang paagi nga ang pagsunod ni Jesukristo makapaduol kanato sa Langitnong Amahan.

Mga Hebreo 3:7–19

Aron makadawat sa giya ug mga panalangin sa Langitnong Amahan, kinahanglang kita “[dili mopagahi sa atong] kasingkasing.”

Diha sa Mga Hebreo 3, ang istorya sa mga Israelita diha sa kamingawan gigamit sa pagtudlo sa kaimportante nga dili magpagahi sa atong mga kasingkasing. Unsaon nimo paggamit niini nga istorya aron matudloan ang mga bata sa imong klase niini nga baroganan?

Posible nga mga Kalihokan

• Hangyoa ang mga bata sa paghunahuna og mga butang nga gahi ug humok. (Kon mahimo, pagdala og pipila ka ehemplo nga ipakita ngadto nila.) Basaha og dungan ang Mga Hebreo 3:8. Unsay buot ipasabot nga magbaton og gahi nga kasingkasing? Nganong gusto man sa Dios nga humok ang atong kasingkasing?

• Sa imong kaugalingong mga pulong, ipaambit ang istorya sa mga Israelita nga mipagahi sa ilang kasingkasing batok sa Ginoo diha sa kamingawan (tan-awa sa Numeros 14:1–12; Mga Hebreo 3:7–19). Ipadrama-drama sa mga bata ang istorya. Unsa ang mahitabo kon magpagahi kita sa atong kasingkasing batok sa Ginoo ug sa Iyang ebanghelyo?

• Dapita ang mga bata sa pagbasa sa Mateo 13:15; Mga Hebreo 3:15; Mosiah 11:29; ug Moises 6:27. Hangyoa sila sa pagdrowing sa pisara sa mga parte sa lawas nga gihisgotan niini nga mga bersikulo. Unsay buot ipasabot nga adunay bungol nga mga dalunggan, buta nga mga mata, ug gahi nga mga kasingkasing sa espirituwal nga paagi? Sa unsang paagi nga kita makaseguro nga ang atong mga dalunggan, mga mata, ug mga kasingkasing andam sa pagdawat sa tingog sa Espiritu?

Mga Hebreo 5:1–4

Ang mga naghupot sa pagkapari gitawag sa Dios.

Ang Mga Hebreo 5 naghatag og oportunidad sa paghisgot kon unsa ang pagkapari—ang gahom ug awtoridad sa paglihok diha sa ngalan sa Dios—ug sa unsang paagi kini madawat.

Posible nga mga Kalihokan

• Ipakita ang litrato nga si Moises Mihatag ni Aaron sa [Pagkapari] (Libro sa mga Hulagway sa Ebanghelyo, nu. 15) samtang ang usa ka bata mobasa sa Mga Hebreo 5:4. Ipasabot nga ang Aaronic nga Pagkapari gipangalan kang Aaron. Tabangi ang mga bata sa paghunahuna sa mga katungdanan nga buhaton sa mga naghupot sa Aaronic nga Pagkapari (sama sa pagbunyag, pagpanalangin ug pagpasa sa sakramento, ug pagdapit sa uban nga moduol kang Kristo; tan-awa sa Doktrina ug mga Pakigsaad 20:46–48, 59).

• Tabangi ang mga bata sa paghunahuna og lainlaing paagi diin ang mga tawo modawat og awtoridad. Sama pananglit, sa unsang paagi modawat og awtoridad ang usa ka magtutudlo, doktor, o politikal nga lider? Sa unsang paagi mohatag ang Dios sa Iyang awtoridad? Dapita ang mga bata sa paghunahuna mahitungod niini nga pangutana samtang mobasa sila sa Mga Hebreo 5:4 ug sa ikalima nga artikulo sa hugot nga pagtuo. Tabangi ang mga bata nga maghunahuna sa mga tawo diha sa ward kinsa adunay awtoridad gikan sa Dios—lakip sa mga naghupot sa pagkapari, ingon man sa mga lalaki ug mga babaye nga gi-set apart aron moserbisyo diha sa piho nga mga calling.

Awhaga ang Pagkat-on diha sa Panimalay

Dapita ang mga bata sa pagpaambit og kasulatan, awit, o kalihokan nga ilang nakat-onan sa klase karon ngadto sa ilang mga pamilya alang sa family home evening.

Pagpalambo sa Atong Pagtudlo

Ang mga bata makaila sa impluwensiya sa Espiritu. Tudloi ang mga bata nga ang mga pagbati sa kalinaw, gugma, ug kainit nga anaa kanila kon maghisgot o magkanta sila mahitungod ni Jesukristo ug sa Iyang ebanghelyo nagagikan sa Espiritu Santo.