“Oktubre 23–29. 1 ug 2 Timoteo; Tito; Filemon: ‘Himoa hinuon ang Imong Kaugalingon nga Panig-ingnan sa mga Magtutuo,’” Dali, Sunod Kanako—Alang sa Primary: Bag-ong Tugon 2023 (2021)
“Oktubre 23–29. 1 ug 2 Timoteo; Tito; Filemon,” Dali, Sunod Kanako—Alang sa Primary: 2023
Oktubre 23–29
1 ug 2 Timoteo; Tito; Filemon
“Himoa hinuon ang Imong Kaugalingon nga Panig-ingnan sa mga Magtutuo”
Gitudlo ni Pablo nga ang “kasulatan gisulat alang sa pagtudlo … unsaon pagkinabuhi nga matarong” (2 Timoteo 3:16). Samtang magtuon ka niini nga mga sulat, pamalandongi kon sa unsang paagi nga kini makadasig sa mga bata nga magkinabuhi nga matarong.
Dapita ang Pagpaambit
Hangyoa ang mga bata sa paghisgot mahitungod sa usa ka tawo kinsa usa ka maayo nga “panig-ingnan sa mga magtutuo” ngadto kanila. Unsa ang ilang gibuhat aron mahimo nga maayo nga mga ehemplo sa uban?
Itudlo ang Doktrina: Mas Gagmay nga mga Bata
Ang mga bishop mangulo sa ward isip mga sulugoon sa Dios.
Mitudlo si Pablo kang Timoteo ug Tito mahitungod sa kaimportante sa mga bishop. Unsaon nimo pagtudlo ang mga bata unsa ang ginabuhat sa bishop? (Ang presidente sa branch susama sa usa ka bishop.)
Posible nga mga Kalihokan
-
Pagdrowing og yano nga hulagway sa inyong bishop diha sa pisara. Hangyoa ang mga bata sa pagngalan og pipila ka butang nga ilang nasayran mahitungod sa bishop. Sama sa unsa siya? Unsa ang iyang ginabuhat? Giunsa niya sa pagpanalangin ang ward? (Makakita ka og pipila ka kinaiya sa usa ka bishop diha sa 1 Timoteo 3:1–2 ug Tito 1:7–9.) Samtang mopaambit ang mga bata sa ilang mga ideya, isulat kini diha sa ginunting nga mga papel ug ipabutang kini sa mga bata diha sa pisara tupad sa drowing.
-
Isulat ang mga katungdanan sa usa ka bishop diha sa mga piraso sa papel—sama sa pagtabang sa mga bata ug kabatan-onan sa ward, pagdawat sa ikapulo ug mga halad sa puasa, paghatag og mga calling, pag-interbiyo sa mga miyembro, ug pagtabang niadtong nanginahanglan. Ibutang kini nga mga piraso sa papel sulod sa usa ka panaksan, ug dapita ang matag bata sa pagkuha og usa. Dayon tabangi ang bata sa pagdrama-drama niini nga mga katungdanan uban kanimo. Ipaambit ang imong pagpamatuod nga ang inyong bishop gitawag sa Dios.
-
Dapita ang mga bata sa pagdrowing og hulagway sa bishop nga nagserbisyo sa mga miyembro sa ward. Isugyot nga ilang ihatag ang ilang mga drowing ngadto kaniya aron sa pagpasalamat kaniya. Unsa ang atong mabuhat aron sa pagtabang kaniya?
“Ayaw itugot nga tamayon ka tungod sa imong pagkabatan-on. Himoa hinuon ang imong kaugalingon nga panig-ingnan sa mga magtutuo” (1 Timoteo 4:12).
Mamahimo akong “panig-ingnan sa mga magtutuo.”
Unsay imong mabuhat aron sa pagdasig sa mga bata nga mahimong “[mga] panig-ingnan sa mga magtutuo”?
Posible nga mga Kalihokan
-
Kantaha uban sa mga bata ang “Sunda Ko Ninyo” (Songbook sa mga Bata, 146). Hangyoa ang mga bata sa pagsunod sa imong ehemplo pinaagi sa pagbuhat sa mga aksiyon nga imong buhaton. Papuli-puliha ang mga bata sa pagpangulo sa tibuok klase sa pagsunod sa ilang mga aksiyon. Basaha ang 1 Timoteo 4:12, ug pangutan-a ang mga bata kon unsay ilang mabuhat aron mahimong maayo nga mga ehemplo ngadto sa uban.
-
Pagpaambit og kasinatian sa dihang naningkamot ka nga mahimong maayo nga ehemplo sa usa ka tawo o sa dihang ang usa ka tawo nahimong maayo nga ehemplo kanimo (tingali lakip sa mga bata sa imong klase). Dapita ang mga bata nga mamahimong maayo nga mga ehemplo ngadto sa ilang mga sakop sa pamilya ug mga higala.
Ang mga kasulatan motabang nako nga makat-on sa kamatuoran.
Kon makatabang ka sa mga bata nga makakat-on sa paghigugma sa mga kasulatan, ang mga pagtulon-an diha sa mga kasulatan mopanalangin sa ilang kinabuhi sa umaabot nga katuigan.
Posible nga mga Kalihokan
-
Ipakita ang usa ka hugpong sa mga kasulatan, ug tabangi ang mga bata nga mahimong pamilyar niini pinaagi sa pagpakita kanila sa ulohan nga mga pahina sa Biblia, sa Basahon ni Mormon, sa Doktrina ug mga Pakigsaad, ug sa Perlas nga Labing Bililhon. Dapita ang usa ka bata sa paggunit niini nga mga basahon samtang imong basahon ang 2 Timoteo 3:15–17. Sultihi ang mga bata kon nganong gihigugma nimo ang mga kasulatan, ug tugoti ang mga bata nga mopahayag sa ilang mga pagbati.
-
Hangyoa ang mga bata sa paghisgot kabahin sa ilang labing bililhon nga butang. Unsay ilang gibuhat niini? Giunsa nila pagtratar niini? Papuli-puliha sila sa paghupot sa mga kasulatan ug sa mainampingong pagpakli sa mga pahina. Unsay atong gamit sa mga kasulatan? Nganong kinahanglang ampingan man nato kini? Pagpamatuod nga ang mga kasulatan naglangkob sa mga kamatuoran nga gusto sa Langitnong Amahan nga atong mahibaloan.
-
Tabangi ang mga bata sa paghimo og mga aksiyon nga mobagay sa mga awit mahitungod sa mga kasulatan, sama sa “Pagsiksik, Pamalandong, ug Pag-ampo” (Songbook sa mga Bata”, 66).
Itudlo ang Doktrina: Mas Magulang nga mga Bata
Mamahimo akong “panig-ingnan sa mga magtutuo.”
Batan-on pa si Timoteo isip lider sa Simbahan, apan gusto ni Pablo nga iyang masayran nga mamahimo gihapon siya nga usa ka ehemplo. Makadasig ka sa mga bata nga magpakita og maayo nga mga ehemplo alang niadtong naglibot kanila.
Posible nga mga Kalihokan
-
Basaha og dungan ang 1 Timoteo 4:12, ug hangyoa ang mga bata sa pagpangita og unom ka paagi nga miingon si Pablo nga mamahimo kitang “panig-ingnan sa mga magtutuo.” Ipares-pares ang mga bata, ug dapita ang matag pares sa paghunahuna og sitwasyon diin mamahimo silang ehemplo sa mga tumutuo. Hangyoa sila sa pagdrama-drama sa ilang sitwasyon alang sa tibuok klase.
-
Pangutan-a ang mga bata kon gusto ba nilang mopaambit og bisan unsa nga mga kasinatian sa dihang naningkamot sila nga mahimong maayo nga ehemplo ngadto sa uban. Sultihi sila kon sa unsang paagi sila nahimong mga ehemplo sa mga magtutuo diha kanimo ug sa unsang paagi nga imo silang nabantayan nga nahimong maayong mga ehemplo alang sa uban.
Ang mahangtoron nga mga butang mas bililhon pa kay sa kwarta.
Ang kalibotan nagbutang og taas nga prayoridad sa kwarta ug sa mga butang nga mapalit sa kwarta. Unsaon nimo nga matabangan ang mga bata nga ipabilin ang ilang pagtutok ug gugma nga nakasentro sa Langitnong Amahan ug ni Jesukristo?
Posible nga mga Kalihokan
-
Dapita ang mga bata sa paghisgot kon unsa ang ilang paliton kon aduna sila sa tanang kwarta sa kalibotan. Basaha ang 1 Timoteo 6:7–12 ngadto sa mga bata, ug hangyoa sila sa pag-summarize sa unsay gitudlo ni Pablo kang Timoteo mahitungod sa kwarta. Dayon dapita ang mga bata sa pagbasa og usab sa mga bersikulo 11–12, nga mangita sa mga butang nga gihisgotan ni Pablo nga mas bililhon kay sa kwarta.
-
Ipakita ang mga hulagway sa kalibotanon nga mga butang (sama sa kwarta, mga dulaan, o kalingawan) ug sa mahangtoron nga mga butang (sama sa mga pamilya o mga templo). Dapita ang mga bata sa paghan-ay sa mga hulagway ngadto sa duha ka pundok—mga butang nga makapaduol nato kang Kristo ug mga butang nga mahimong makapalinga kanato gikan ni Kristo kon higugmaon nato kini labaw pa kay sa atong paghigugma Kaniya. Nganong “ang pagkamahigugmaon sa salapi maoy tinubdan sa tanang pagkadaotan”? Sa unsang paagi nga ang pagtutok kang Jesukristo mohimo kanato nga malipayon?
Ang Langitnong Amahan mihatag kanato og mga kasulatan aron sa pagtabang kanato nga mahibalo sa kamatuoran gikan sa sayop.
Samtang imong tudloan ang mga bata mahitungod sa mga kasulatan, pangita og mga paagi sa pag-awhag kanila nga makaangkon og ilang kaugalingong gamhanan nga mga kasinatian sa pulong sa Dios.
Posible nga mga Kalihokan
-
Dapita ang mga bata sa pagbasa sa 2 Timoteo 3:15–17. Ipakita ang mga litrato nga naghulagway og istorya gikan sa matag usa sa upat ka sumbanan nga mga kasulatan, ug dapita ang pipila ka bata sa pagpili og litrato ug sa pagsaysay sa istorya. (Makakita ka og mga litrato diha sa Libro sa mga Hulagway sa Ebanghelyo ug diha sa mga materyal sa Dali, Sunod Kanako.) Hangyoa ang mga bata sa pagpaambit og bisan unsa nga ilang nahibaloan mahitungod niana nga basahon sa kasulatan. Sa unsang paagi nga ang mga kasulatan “nakahatag [kanato og] kaalam ug naghatod [kanato] ngadto sa kaluwasan”?
-
Pagpaambit og paborito nga tudling sa kasulatan o usa ka kasinatian sa dihang ang mga kasulatan nakatabang sa paglig-on sa imong hugot nga pagtuo diha sa Langitnong Amahan ug ni Jesukristo. Dapita ang mga bata sa pagpaambit og usa ka paborito nga bersikulo o ilang kaugalingon nga kasinatian.
-
Hangyoa ang usa ka bata sa pagbasa sa Moroni 10:4–5. Unsa ang gisaad ni Moroni niini nga mga bersikulo? Pangutan-a ang mga bata kon sa unsang paagi nga sila nakaangkon og pagpamatuod nga ang mga kasulatan tinuod. Dapita sila nga makanunayong mobasa o maminaw sa mga kasulatan ug mangutana sa Dios kon tinuod ba kini.
Awhaga ang Pagkat-on diha sa Panimalay
Dapita ang mga bata sa pagpaambit ngadto sa ilang mga pamilya kon unsay ilang nakat-onan mahitungod sa mga kasulatan ug sa pagpangita og usa ka bersikulo sa kasulatan nga ilang mapaambit sa klase sunod semana (uban sa tabang sa ilang mga ginikanan, kon gikinahanglan).
Pagpalambo sa Atong Pagtudlo
Ipahiangay ang mga kalihokan aron matubag ang mga panginahanglan. Imbes nga motan-aw niini nga mga latid isip mga instruksiyon nga kinahanglan nimong sundon, gamita kini isip usa ka tinubdan sa mga ideya nga makaawhag sa imong kaugalingong inspirasyon samtang mamalandong ka sa mga panginahanglan sa mga bata nga imong gitudloan. Mahimo nimong mapahiangay ang mga kalihokan aron sa pagtudlo og mga bata sa bisan unsang edad.