Oktubre 9–15

Mga Taga-Filipos; Mga Taga-Colosas

“May Kalig-on Ako sa Pagsagubang sa Tanan tungod sa Gahom nga Gihatag Kanako ni Kristo”

Basaha ang Mga Taga-Filipos ug Mga Taga-Colosas, nga maghunahuna sa mga bata nga imong tudloan. Pagtinguha og inspirasyon kon unsaon sa pagtudlo kanila sa mga baroganan niini nga mga sulat.

Dapita ang Pagpaambit

Pangutan-a ang mga bata unsay ilang gibuhat niining miagi nga semana sa paglihok sa usa ka butang nga ilang nakat-onan sa klase sa miaging semana. Sama pananglit, giunsa nila pagtabang sa usa ka tawo nga nagkinahanglan og higala?

Itudlo ang Doktrina: Mas Gagmay nga mga Bata

Mga Taga-Filipos 1:3–4; Mga Taga-Colosas 1:3, 9

Ang mga lider sa Simbahan nahigugma kanako ug nag-ampo alang kanako.

Kanunay nga gisugdan ni Pablo ang iyang mga sulat pinaagi sa pagpahayag og gugma alang sa mga miyembro sa Simbahan ug sa pagsulti kanila nga nag-ampo siya alang kanila. Ikonsiderar kon sa unsang paagi nimo matabangan ang mga bata nga makasabot nga ang ilang mga lider sa Simbahan nahigugma kanila.

Posible nga mga Kalihokan

• Basaha og kusog ang Mga Taga-Filipos 1:3–4 ug ang Mga Taga-Colosas 1:3, 9, ug hangyoa ang mga bata sa pagkyugpos sa ilang mga bukton ug sa pagduko sa ilang ulo matag higayon nga makadungog sila sa mga pulong nga mag-ampo, nag-ampo, ug pag-ampo. Ipasabot nga si Apostol Pablo nag-ampo alang sa mga miyembro sa Simbahan, sama nga ang atong mga lider sa Simbahan nag-ampo alang kanato karon.

• Ipakita ang usa ka hulagway ni Jesukristo, ug basaha ang pipila ka bersikulo sa kasulatan nga naghulagway Kaniya nga nag-ampo alang sa usa ka tawo (tan-awa sa Lucas 22:32; 3 Nephi 19:21, 23). Unsa ang gipangayo ni Jesus sa dihang nag-ampo Siya alang sa uban?

• Tabangi ang mga bata sa pagngalan og pipila sa ilang mga lider sa Simbahan, sama sa presidente sa Primary, sa bishop, ug sa Presidente sa Simbahan. Ipasabot nga kini nga mga lider mohangyo sa Langitnong Amahan sa pagpanalangin sa mga bata ug sa pagtabang kanila sa pagpuyo nga matarong. Ikonsiderar ang pagsulti sa mga bata kon unsay imong isulti kon mag-ampo ka alang kanila.

Mga Taga-Filipos 4:4, 8

Mahimo akong maglipay diha sa Ginoo.

Giawhag ni Pablo ang mga Santos sa paglipay—bisan og nag-atubang sila og lisod nga mga pagsulay ug si Pablo mismo anaa sa bilanggoan. Unsaon nimo pagtabang sa mga bata nga makasabot nga ang pagsunod ni Jesukristo magdala og kalipay?

Posible nga mga Kalihokan

• Hangyoa ang mga bata sa pagpaminaw sa gisubli nga pulong samtang imong basahon ang Mga Taga-Filipos 4:4. Hangyoa ang mga bata sa pagpakita diha kanimo kon unsay ilang buhaton kon sila maglipay. Sultihi ang mga bata kon nganong “[n]aglipay [ka] … diha sa Ginoo”—nganong malipayon ka tungod ni Jesukristo. Tugoti ang mga bata sa pagpaambit kon unsay ilang gibati mahitungod ni Jesus.

• Ipakita ang mga butang o mga hulagway nga nagrepresentar sa mga butang nga motabang kanimo sa “paglipay … diha sa Ginoo” (Mga Taga-Filipos 4:4), sama sa Iyang mga nilalang, usa ka templo, Iyang Pagkabanhaw, o usa ka pamilya. Papuli-puliha ang mga bata sa pagpili og usa ka litrato o mga butang, ug dayon sultihi sila nganong makalipay kini kanimo. Dapita sila sa pagpaambit og mga butang nga makatabang kanila nga maglipay diha sa Ginoo.

• Basaha og dungan ang Mga Taga-Filipos 4:8, ug tabangi ang mga bata sa paghunahuna og mga butang nga mohaom sa mga deskripsiyon diha sa bersikulo (tan-awa usab ang Mga Artikulo sa Hugot nga Pagtuo 1:13). Dapita ang mga bata sa pagdrowing og mga hulagway niini nga mga butang.

Mga Taga-Colosas 1:23; 2:6–7

Ang akong hugot nga pagtuo kinahanglang “nakagamot” diha ni Jesukristo.

Kon ang mga bata makatukod sa ilang kinabuhi ug sa ilang hugot nga pagtuo diha sa Manluluwas, makasugakod sila sa mga kalisod sa kinabuhi.

Posible nga mga Kalihokan

• Ipakita ang litrato sa usa ka punoan sa kahoy gikan sa latid niini nga semana diha sa Dali, Sunod Kanako—Alang sa mga Indibidwal ug mga Pamilya samtang imong basahon ang importanteng mga pulong gikan sa Mga Taga-Colosas 1:23; 2:6–7. Unsa ang mahitabo niini nga kahoy kon dunay moabot nga unos ug ang kahoy walay lig-on nga mga gamot? Pabaroga ang mga bata ug magpakaaron-ingnon nga usa ka kahoy nga dunay huyang nga mga gamot panahon sa unos ug dayon usa ka kahoy nga dunay lig-ong mga gamot. Pagpamatuod nga ang hugot nga pagtuo diha sa Manluluwas makatabang kanato nga mahisama sa kahoy nga dunay lig-ong mga gamot. Dayon makasugakod kita sa espirituhanon nga mga “unos,” sama sa mga tintasyon ug malisod nga mga panahon.

• Dapita ang usa ka bata sa pagdrowing og kahoy diha sa pisara. Hangyoa ang mga bata sa pagngalan og pipila ka butang nga ilang mabuhat aron mahimong “nakagamot” diha ni Jesukristo. Sa matag higayon nga ang usa ka bata mongalan og usa ka butang, dapita siya sa pagdugang og usa ka gamot diha sa gidrowing.

Itudlo ang Doktrina: Mas Magulang nga mga Bata

Mga Taga-Filipos 4:4–13

Kon duna akoy hugot nga pagtuo kang Jesukristo, mahimo akong malipayon bisan sa lisod nga mga panahon.

Si Pablo nag-antos og daghang pagsulay, apan nagmalipayon siya tungod kay aduna siyay hugot nga pagtuo diha ni Jesukristo.

Posible nga mga Kalihokan

• Hangyoa ang mga bata sa paghanduraw nga anaa sila sa bilanggoan, sama ni Apostol Pablo sa dihang mihimo siya sa Sulat ngadto sa Mga Taga-Filipos. Basaha ang Mga Taga-Filipos 4:4–13 uban sa mga bata ug hangyoa sila sa pagpangita sa mga pulong nga “paglipay,” “kalinaw,” “pagkatagbaw.” Nganong nakahimo man si Pablo nga maglipay ug mobati og kalinaw bisan sa bilanggoan? Tabangi ang mga bata sa pagpangita sa mga pulong nga “Ginoo,” “Dios,” ug “Kristo” diha sa mga bersikulo. Tabangi sila nga makasabot nga ang hugot nga pagtuo ni Pablo diha ni Jesukristo nakahimong posible aron maglipay siya.

• Dapita ang mga bata sa pagtabang nimo sa pagkompleto sa mga kapahayag sama sa mosunod: “Mahimong maanaa ako sa kangitngit ug makakita gihapon sa mga butang kon ako adunay . Mahimong maanaa ako sa gawas sa usa ka init nga adlaw ug mobati gihapon og kabugnaw kon ako adunay . Mahimong maanaa ako sa lisod nga mga panahon ug makakaplag gihapon og kalipay kon ako .” Unsay gisugyot sa Mga Taga-Filipos 4:4–13 nga atong mabuhat aron makakaplag og kalipay? Dapita ang mga bata sa pagpaambit og pipila ka himno o mga kasulatan mahitungod ni Jesus nga makatabang kanila nga mobati og hingpit nga kalipay atol sa malisod nga mga panahon.

Mga Taga-Filipos 4:8

Ako “[makapuno sa akong] hunahuna” sa mga butang nga matinud-anon, matinuoron, ug putli.

Ang mga bata kasagaran mabantang sa mga butang nga daotan ug law-ay. Makatabang ka kanila sa pagtinguha sa mga butang nga makapadasig ug mahiyason.

Posible nga mga Kalihokan

• Hangyoa ang usa ka bata sa pagbasa og kusog sa Mga Taga-Filipos 4:8 samtang ang uban mangita og mga pulong sa Mga Artikulo sa Hugot nga Pagtuo 1:13 nga pareha o susama. Pagdapit og usa ka estudyante sa pagsulat niini nga mga pulong diha sa pisara. Pangutan-a ang mga bata kon unsay gipasabot sa mga pulong, ug tabangi sila sa paghatag og kahulogan niini kon gikinahanglan. Nganong kinahanglan man nga atong “pun-[on] ang [atong] hunahuna” niini nga mga butang? Sa unsang paagi kita “[m]aninguha sa pagpangita” niini?

• Hangyoa ang mga bata sa pagngalan og mga butang nga mohaom sa mga deskripsiyon diha sa Mga Taga-Filipos 4:8. Dapita sila sa paghimo og lista niini nga semana sa bisan unsa nga ilang nabantayan nga mohaom niini nga mga deskripsiyon. Awhaga sila sa pagdala sa ilang mga lista ngadto sa Primary sa sunod semana ug sa pagpaambit kon unsay ilang nakit-an.

Mga Taga-Colosas 1:23; 2:6–7

Ang akong hugot nga pagtuo kinahanglang “nakagamot” diha ni Jesukristo.

Mosulay si Satanas sa pagpahuyang sa atong hugot nga pagtuo pinaagi sa mga tintasyon ug sayop nga mga doktrina. Unsaon nimo sa pagdasig ang mga bata sa paglig-on sa ilang hugot nga pagtuo diha sa Manluluwas aron sila “dili matarog sa paglaom … sa ebanghelyo”? (Mga Taga-Colosas 1:23).

Posible nga mga Kalihokan

• Dapita ang mga bata sa pagdrowing og mga hulagway nga nagrepresentar sa mga kamatuoran nga ilang nakit-an diha sa Mga Taga-Colosas 1:23; 2:6–7. Tugoti sila sa pagpaambit sa ilang mga hulagway diha sa klase ug sa pagpasabot sa mga kamatuoran nga girepresentar sa ilang mga hulagway.

• Unsa ang pipila ka tintasyon ug sayop nga mga doktrina sa kalibotan karon nga makapahuyang sa atong hugot nga pagtuo? Awhaga ang mga bata sa pagsulat og usa ka butang nga ilang mabuhat aron sa paglig-on sa ilang hugot nga pagtuo aron sila “nakagamot” (Mga Taga-Colosas 2:7) diha ni Jesukristo. Hangyoa sila sa pag-display niini sa usa ka dapit diin makita nila kini matag adlaw.

Awhaga ang Pagkat-on diha sa Panimalay

Dapita ang mga bata sa pagpaambit ngadto sa ilang mga pamilya sa unsay ilang nakat-onan mahitungod kang Jesukristo. Mahimo nilang gamiton ang pahina sa kalihokan niini nga semana o usa ka kasulatan nga ilang nabasa atol sa klase karon.

Pagpalambo sa Atong Pagtudlo

Ang mga bata kuryoso ug makat-on pinaagi sa bag-o ug nagkalainlain nga kasinatian. Gamita ang mga kalihokan nga makatabang sa mga bata nga maglihok-lihok, mogamit sa tanan nilang mga balatian, magsusi-susi, ug mosulay og bag-ong mga butang. Ang mga sugyot diha sa “Pagtubag sa mga Panginahanglan sa Mas Gagmay nga mga Bata” sa sinugdanan niini nga kapanguhaan makatabang. (Tan-awa usab sa Pagtudlo sumala sa Pamaagi sa Manluluwas, 25–26.)