Ang nabanhaw nga Manluluwas mibisita kang Pablo diha sa bilanggoan (tan-awa sa Mga Buhat 23:11). Si Jesukristo makapalingkawas kanato gikan sa “yugo sa pagkaulipon” (Mga Taga-Galacia 5:1).

Septyembre 25–Oktubre 1

Mga Taga-Galacia

“Pagkinabuhi Kamo diha sa Espiritu”

Samtang imong basahon ang Mga Taga-Galacia, unsa ang imong mga impresyon mahitungod sa gikinahanglan nga makat-onan sa mga bata sa imong klase?

Dapita ang Pagpaambit

Hatagi ang mga bata og pipila ka minuto sa pagdrowing og usa ka butang nga ilang nakat-onan gikan sa bag-o lang nga panaghisgot sa ebanghelyo diha sa panimalay o sa simbahan. Tugoti ang mga bata sa pagpaambit sa unsay girepresentar sa matag drowing.

Itudlo ang Doktrina: Mas Gagmay nga mga Bata

Mga Taga-Galacia 5:22–23

Ang Espiritu Santo nagtabang kanako nga mobati og gugma, kalipay, ug kalinaw.

Ang gagmay nga mga bata makaila sa bunga sa Espiritu. Mag-andam kini kanila sa pagtinguha sa impluwensiya sa Espiritu Santo sa tibuok nilang kinabuhi.

Posible nga mga Kalihokan

• I-display o ipakita ang mga hulagway sa pipila ka mga matang sa bunga, ug hangyoa ang mga bata sa paghulagway kon unsay lami sa matag bunga. Ipasabot nga sama nga ang mga bunga adunay lainlaing lami, atong mabati ang Espiritu Santo sa lainlaing paagi, sama sa gugma ug kalinaw. Ihulagway ang pipila ka paagi nga imong nabati ang Espiritu Santo sa imong kinabuhi, ug tugoti ang mga bata nga magpaambit kon unsa ang ilang pagbati sa Espiritu Santo.

Ang mga bata sa tanang edad makasinati sa “bunga sa Espiritu.”

• Basaha ang Mga Taga-Galacia 5:22–23 ngadto sa mga bata, ug ipasabot ang mga pulong nga tingali dili nila pamilyar. Dapita ang matag bata sa pagpili og usa ka bunga sa Espiritu nga gihisgotan niini nga mga bersikulo, ug tabangi sila sa paghunahuna og panahon sa dihang nakasinati siya niini. Dapita ang mga bata sa pagdrowing og yano nga mga hulagway sa ilang mga kasinatian.

Mga Taga-Galacia 6:2

Gusto ni Jesukristo nga motabang ako niadtong nanginahanglan.

Ang instruksiyon diha sa Mga Taga-Galacia 6:2 susama sa pagtulon-an ni Alma diha sa Mosiah 18:8 ngadto sa mga tawo kinsa hapit na nga bunyagan. Gamita kini nga oportunidad sa pagtabang sa mga bata nga mangandam alang sa mga pakigsaad sa bunyag.

Posible nga mga Kalihokan

• Ipakita ang hulagway sa usa ka bata nga gibunyagan (sama sa Libro sa mga Hulagway sa Ebanghelyo, nu. 104). Pangutan-a ang mga bata kon unsa ang gibuhat sa bata. Ipasabot nga kon kita bunyagan, mohimo kita og mga pakigsaad, o mga saad. Basaha ang Mga Taga-Galacia 6:2 o ang Mosiah 18:8 aron sa pagtabang sa mga bata nga makakat-on sa usa sa mga butang nga atong gisaad nga buhaton: makigtambayayong sa mga alantoson sa usag usa. Dapita ang mga bata sa pagdrowing og mga hulagway sa mga paagi nga makatabang sila sa uban kinsa nagpas-an og mga alantoson.

• Basaha ngadto sa mga bata kini nga pulongan gikan sa Mga Taga-Galacia 6:2: “Pagtinabangay kamo sa pagpas-an sa inyong mga alant[o]son.” Aron sa paghulagway kon unsay gipasabot niini, hatagi ang usa sa mga bata og bug-at nga butang nga bitbiton. Dayon paghangyo og usa ka boluntaryo nga motabang sa bata sa pagbitbit sa butang. Ipasabot sa mga bata nga daghang butang ang mabati nga sama sa usa ka palas-anon, sama sa pagkasakit o pagbati nga magul-anon o nag-inusara. Unsay atong mabuhat aron sa pagtabang sa usa ka tawo nga anaa niini nga matang sa palas-anon?

Mga Taga-Galacia 6:7–9

Ang atong mga lihok, maayo ug daotan, adunay mga sangpotanan.

Pinaagi sa pagtudlo nga atong maani kon unsay atong gipugas, sama sa gipasabot diha sa Mga Taga-Galacia 6:7–9, matudloan nimo ang mga bata sa paghunahuna sa mga sangpotanan sa ilang mga aksiyon.

Posible nga mga Kalihokan

• Ipakita ang usa ka liso ug usa ka utanon. Basaha ang Mga Taga-Galacia 6:7–9 ngadto sa mga bata. Hangyoa ang mga bata nga magpakaaron-ingnon nga nagtanom og liso kon madungog nila ang pulong nga pugas. Hangyoa sila nga magpakaaron-ingnon nga nangutlo og utanon gikan sa usa ka tanom kon madungog nila ang pulong nga ani.

• Ipakita sa mga bata ang pipila ka matang sa mga utanon, ug tabangi sila sa pagpangita sa mga liso sa matag usa. Ibutang ang mga liso sa usa ka sudlanan, ug papuli-puliha ang mga bata sa pagpili og usa ug sa pagsulti kon unsa nga utanon ang motubo kon ila kining itanom. Tabangi sila nga makakita nga sama nga ang mga liso nga atong itanom motino sa utanon nga atong makuha, ang mga pagpili nga atong gihimo motino sa mga sangpotanan ug mga panalangin nga atong madawat sa kaulahian.

• Paghimo og linya diha sa salog gamit ang tape. Pagbutang og usa ka malipayon nga nawong ug usa ka subo nga nawong sa isigka tumoy sa linya. Dapita ang usa ka bata diha sa tunga-tunga sa linya, ug tabangi ang ubang mga bata sa paghunahuna sa mga pagpili nga mosangpot sa kalipay o kasubo. Alang sa matag pagpili, hangyoa ang bata sa tunga sa paglakang paingon sa malipayon nga bahin o sa masulub-on nga bahin. Balika ang kalihokan sa pipila ka higayon, ug papuli-puliha ang ubang mga bata sa pagbarog diha sa tape.

Itudlo ang Doktrina: Mas Magulang nga mga Bata

Mga Taga-Galacia 3:26–28

Ang pagpabunyag mohimo kanato nga “nahiusa … kang Kristo.”

Gitudloan ni Pablo ang mga Santos sa Galacia nga sa dihang sila nabunyagan sila mahimong “nahiusa … kang Kristo Jesus.” Unsaon nimo pagtabang ang mga bata nga maninguha sa pagkahiusa nga gihulagway diha sa Mga Taga-Galacia 3:26–28?

Posible nga mga Kalihokan

• Dapita ang mga bata sa pagbasa sa Mga Taga-Galacia 3:26–28 nga maghunahuna niini nga pangutana: Unsay mahitabo kon mabunyagan ako? Mahimo nimong tutokan ang mga pulongan sama sa “nakaambit … sa kinaiya ni Kristo” o “nahiusa … kang Kristo.” Unsa kaha ang gipasabot niini nga mga pulongan? Sa unsang paagi nga ang “nakaambit … sa kinaiya ni Kristo” susama sa pagdala sa Iyang ngalan sa atong kaugalingon? (tan-awa sa Doktrina ug mga Pakigsaad 20:75–79). Unsa ang atong mabuhat aron sa pagpakita sa uban nga atong gidala ang Iyang ngalan sa atong kaugalingon?

• Basaha og dungan ang Mga Taga-Galacia 3:28, ug tinoa ang pipila sa mga paagi nga ang mga tawo miila sa ilang kaugalingon sa dihang nabunyagan sila sa panahon ni Pablo. Tabangi ang mga bata sa pagngalan sa pipila ka paagi nga sila miila sa ilang kaugalingon karon. Unsa ang gipaningkamotan ni Pablo sa pagtudlo kanato kabahin kon sa unsang paagi nga kita motan-aw sa usag usa kon kita nabunyagan?

Mga Taga-Galacia 5:16, 22–23

Kon ako “magkinabuhi … diha sa Espiritu,” makadawat ako sa “bunga sa Espiritu.”

Kon kita nabunyagan ug nakadawat sa gasa sa Espiritu Santo, mas makadawat kita sa bunga sa Espiritu sa atong kinabuhi. Unsaon nimo sa pagtabang ang mga bata nga makaila niini nga bunga sa ilang kinabuhi?

Posible nga mga Kalihokan

• Hatagi ang matag bata og usa ka piraso nga papel (mahimo nimong putlon ang papel ngadto sa mga porma og bunga), ug hangyoa ang mga bata sa pagpangita og usa ka “bunga sa Espiritu” nga gilista diha sa Mga Taga-Galacia 5:22–23. Dapita sila sa pagsulat sa usa sa mga bunga sa usa ka habig sa ilang papel ug usa ka pulong nga nagpasabot sa sukwahi niini diha sa pikas nga habig. (Tabangi sila nga makasabot sa mga pulong nga dili nila pamilyar.) Dapita sila sa pagpaambit sa ilang mga bunga diha sa klase. Unsa ang atong mabuhat aron mag-uban kanato kanunay ang Espiritu Santo?

• Dapita ang mga bata sa pagbasa mahitungod sa bunga sa Espiritu diha sa Mga Taga-Galacia 5:22–23 ug sa pagsulat o sa pagdrowing og hulagway sa usa ka panahon sa dihang gibati nila ang usa niadto nga mga bunga. Hangyoa sila sa pagpaambit sa ilang istorya o hulagway ngadto sa laing tawo diha sa klase. Nganong ang bunga usa ka maayong paagi sa pagtabang kanato nga makasabot kon sa unsang paagi ang Espiritu nag-impluwensiya kanato?

Mga Taga-Galacia 6:7–9

Ang atong mga lihok, maayo ug daotan, adunay mga sangpotanan.

Tabangi ang mga bata nga makasabot nga ang mga sangpotanan sa atong kinaiya usahay moabot dihadiha dayon ug usahay “sa tukma nga panahon” (bersikulo 9).

Posible nga mga Kalihokan

• Basaha og dungan ang Mga Taga-Galacia 6:7–9. Paghatag og lista sa mga aksiyon (o mga liso nga atong “gipugas”) ug mga sangpotanan (o ang bunga nga atong “anihon”). Hangyoa ang mga bata sa pagpares sa mga aksiyon ngadto sa ilang mga sangpotanan.

• Dapita ang mga bata sa paglista sa pipila sa mga panalangin nga ilang gilaoman nga madawat gikan sa Langitnong Amahan. Tabangi sila sa paghunahuna sa “mga liso” nga kinahanglan nilang ipugas aron “makaani” niini nga mga panalangin.

Awhaga ang Pagkat-on diha sa Panimalay

Tabangi ang mga bata nga mangita og mga paagi nga magamit ngadto sa ilang inadlaw-adlaw nga mga kinabuhi ang mga kamatuoran nga ilang nakat-onan karon. Sama pananglit, mahimo nimo silang dapiton sa pagbantay sa maayo nga mga sangpotanan, o “bunga”, nga moabot tungod sa maayo nga mga desisyon nga ilang gihimo.

Pagpalambo sa Atong Pagtudlo

Ipahaom ang mga kalihokan sa edad sa mga bata. Hatagi ang mga bata og mga oportunidad sa pag-apil, apan hinumdomi nga ang ilang abilidad sa pagbuhat niini magkalahi sumala sa ilang edad ug kahingkod. Ang mas gagmay nga mga bata tingali magkinahanglan og dugang nga giya ug direksiyon. Samtang magkahingkod sila, ang mga bata mas daghan na og matampo ug mahimong mas maayo sa pagpaambit sa ilang mga hunahuna. (Tan-awa sa Pagtudlo sumala sa Pamaagi sa Manluluwas, 25–26.)