Septyembre 18–24

2 Mga Taga-Corinto 8–13

“Ang Dios Nahigugma sa Malipayong Tighatag”

Ang imong labing maayo nga mga ideya sa pagtudlo sa mga bata sa imong klase moabot samtang mainampoon ka nga magtuon sa 2 Mga Taga-Corinto 8–13 nga maghunahuna kanila. Dugang nga mga ideya sa pagtudlo makita dinhi niini nga latid.

Dapita ang Pagpaambit

Usa ka maayong paagi aron madapit ang pag-inambitay tali sa mga bata mao ang pagpahinumdom kanila sa usa ka butang nga imong gidapit kanila nga buhaton sa miaging leksiyon. Hangyoa sila sa pagpaambit sa ilang mga kasinatian.

Itudlo ang Doktrina: Mas Gagmay nga mga Bata

2 Mga Taga-Corinto 9:6–7

Malipayon akong makahatag ngadto sa mga tawo nga nanginahanglan.

Maayo kanunay ang pagserbisyo sa uban, apan mas maayo ang malipayon nga pagserbisyo. Hunahunaa kon unsay makadasig sa matag bata nga mahimong “malipayong tighatag.”

Posible nga mga Kalihokan

• Dapita ang mga bata sa pagsulti og balik sa pulongan nga “Ang Dios nahigugma sa malipayong tighatag” (2 Mga Taga-Corinto 9:7). Unsa ang gipasabot nga mahimong “malipayong tighatag”? Ipakita ang hulagway sa usa ka malipayong nawong ug sa usa ka subo nga nawong, ug pangutan-a ang mga bata kon hain ang makita nga sama sa usa ka malipayong tighatag.

• Kantaha og dungan ang usa ka awit mahitungod sa serbisyo, sama sa “Kon Kita Motabang” (Songbook sa mga Bata, 108B), sa pipila ka higayon. Sa unang higayon, hangyoa ang mga bata nga malipayong mokanta; dayon hangyoa sila sa pagkanta sa awit nga dunay lainlaing emosyon o mga kinaiya, sama sa masulub-on, gikapoy, nasuko, o nahadlok. Pahinumdomi ang mga bata nga gusto sa Langitnong Amahan nga malipayon kitang motabang sa uban. Dayon kantaha pag-usab ang awit sa malipayong paagi.

• Tabangi ang mga bata sa paghimo og mga hulagway sa nagpahiyom nga mga nawong ug sa nagmug-ot nga mga nawong. Hangyoa sila sa pag-isa sa ilang nagpahiyom nga mga hulagway kon makadungog sila sa mga pulong nga pahiyom o pahiyomi samtang manganta sila sa “Mga Pahiy[o]m” (Songbook sa mga Bata, 128). Mahimo nilang buhaton ang samang butang sa ilang nagmug-ot nga mga hulagway ug sa mga pulong nga nagkusmod ug kusmoran. Tabangi ang mga bata sa pag-ila kon hain nga nawong ang malipayon ug hain ang dili. Ipasabot nga usa ka paagi nga mahimong malipayon ug moserbisyo sa uban mao ang pagpahiyom ug ang pagtabang sa uban nga mopahiyom.

• Pagplano og kalihokan sa klase nga moserbisyo sa usa ka tawo, sama sa usa ka bata nga wala motambong sa Primary o sa usa ka sakop sa ward o silingan nga nanginahanglan. Mahimo kamong magplano sa pagbisita sa balay niini nga tawo, magsulat og mabination nga mga sulat o magdrowing og mga hulagway, o maghimo og lamiang pagkaon nga ikapaambit.

• Dapita ang matag bata nga magplano og usa ka buhat sa malipayon nga pagserbisyo alang sa usa ka sakop sa iyang pamilya. Atol sa leksiyon sunod semana, hangyoa sila sa pagpaambit kon unsay ilang gibuhat.

2 Mga Taga-Corinto 12:7–10

Ang Langitnong Amahan kanunayng motubag sa mga pag-ampo apan dili kanunay sa mga paagi nga atong gidahom.

Ang kasinatian ni Pablo nga nag-ampo nga tangtangon ang iyang “tunok sa unod” nagtudlo kanato nga usahay ang Dios molig-on kanato pinaagi sa atong mga pagsulay kay sa kuhaon kini.

Posible nga mga Kalihokan

• Ipakita sa mga bata ang usa ka tanom nga dunay mga tunok (o usa ka hulagway niini). Tabangi sila sa paghunahuna kon unsa kaha ang bation nga dunay tunok nga nagtusok sa ilang panit sa dugay nga panahon. I-summarize ang 2 Mga Taga-Corinto 12:7–10 alang sa mga bata, nga magpasabot nga ang “tunok sa unod” ni Pablo usa ka pagsulay, usa ka butang nga lisod sa iyang kinabuhi. Bisan tuod si Pablo mihangyo sa Dios nga tangtangon ang pagsulay, wala kini buhata sa Dios. Hinuon, ang Dios mitudlo ni Pablo nga ang mga hagit makatabang kanato nga makat-on nga mahimong mapainubsanon ug mosalig Kaniya. Dayon ang Dios makahimo kanato nga lig-on.

• Ipamatuod nga ang Langitnong Amahan nasayod sa unsay labing maayo alang kanato, ug mohatag Siya kanato sa atong gikinahanglan, bisan kon lahi kini sa unsay atong gihunahuna nga atong gikinahanglan. Mahimo usab kang mopaambit og usa ka kasinatian sa dihang ang imong mga pag-ampo gitubag sa paagi o sa panahon nga lahi kay sa imong gidahom. Ang istorya sama sa “Ang Problema sa Diabetes” (Liahona, Sept. 2019, H4–H5) makatabang usab.

• Kantaha uban sa mga bata ang usa ka awit mahitungod sa gugma sa Langitnong Amahan, sama sa “Ampo sa Usa ka Bata” (Songbook sa mga Bata, 6–7). Pangutan-a ang mga bata kon unsay ilang isulti sa usa ka tawo nga naghunahuna kon ang Langitnong Amahan maminaw ug motubag ba sa mga pag-ampo. Kantaha pag-usab ang awit, ug itudlo ang mga linya nga naghulagway kon unsay pagbati sa Langitnong Amahan ngari kanato.

Itudlo ang Doktrina: Mas Magulang nga mga Bata

2 Mga Taga-Corinto 9:6–9

Malipayon akong makahatag ngadto sa mga tawo nga nanginahanglan.

Gusto ni Pablo nga madasig ang mga Santos sa paghatag og bahin sa ilang kaabunda aron sa pagtabang sa mga kabos. Unsaon nimo sa paggamit ang iyang mga pulong aron madasig ang mga bata sa pagserbisyo sa uban?

Posible nga mga Kalihokan

• Isulat ang mga pulong sa 2 Mga Taga-Corinto 9:7 diha sa pisara, diin blangkohan ang importanteng mga pulong. Dapita ang mga bata sa pagtag-an kon unsa ang kulang nga mga pulong. Dayon pabasaha sila sa bersikulo diha sa mga kasulatan aron matubag ang mga blangko. Unsay gipasabot nga mohatag nga “magsubo o maghunahuna nga gipugos”? Unsa ang gipasabot nga mahimong “malipayong tighatag”?

• Dapita ang mga bata sa pagtabang kanimo sa pagpangita og mga hulagway sa Manluluwas nga nagserbisyo sa uban (adunay pipila diha sa Dali, Sunod Kanako—Alang sa mga Indibidwal ug mga Pamilya). Pangutan-a sila kon unsay ilang nakita niini nga mga hulagway nga nakatabang kanila nga masayod nga si Jesus mahigugmaong miserbisyo sa uban. Paghimo og tumong isip tibuok klase sa pagtando kon ang mga sakop sa pamilya o ang uban mohangyo kanato sa pagserbisyo sa umaabot nga semana, sama sa pagtabang diha sa panimalay o sa pag-atiman sa uban.

• Tabangi ang mga bata sa pag-adorno og gagmay nga mga bato. Ipasabot nga kini “mga bato sa pagserbisyo” nga ilang madala diha sa ilang mga bulsa niini nga semana aron sa pagtabang kanila nga makahinumdom nga malipayong moserbisyo sa uban.

• Kantaha og dungan ang usa ka awit mahitungod sa pagserbisyo, sama sa “Makalingaw nga Buhaton” (Songbook sa mga Bata, 129B). Tabangi ang mga bata sa paghunahuna og bag-o nga mga bersikulo ngadto sa awit nga naghulagway og nagkalainlain nga paagi sa pagserbisyo sa uban.

2 Mga Taga-Corinto 12:7–10

Ang Langitnong Amahan kanunay nga motubag sa mga pag-ampo, apan dili Siya kanunay mohatag kanako sa tanan nga akong gipangayo.

Mihangyo si Pablo sa Dios nga tangtangon ang iyang kahuyang, apan nasayod ang Dios nga ang kahuyang ni Pablo mohimo kaniya nga mapainubsanon ug ang Dios makalig-on kaniya.

Posible nga mga Kalihokan

• Dapita ang mga bata sa pagtandi sa 2 Mga Taga-Corinto 12:9–10 ug Ether 12:27. Unsa nga mga pulong o mga pulongan ang gisubli? Unsa ang gitudlo niini nga mga bersikulo? (Mahimong kinahanglan nimong ipasabot nga gikumparar ni Pablo ang iyang hagit ngadto sa usa ka tunok sa iyang panit.) Unsa ang gitudlo sa Dios kang Pablo mahitungod sa mga pagsulay?

• Dapita ang mga bata sa paglista og pipila ka pagsulay sa kinabuhi sa mga tawo. Tabangi sila sa pagkonsiderar kon sa unsang paagi ang usa ka tawo makakat-on gikan niini nga mga pagsulay ug mapanalanginan pinaagi niini.

• Basaha ngadto sa mga bata ang “Ang Problema sa Diabetes” (Liahona, Sept. 2019, H4–H5). Hangyoa ang mga bata sa pagpaambit og mga kasinatian sa dihang nag-ampo sila alang sa usa ka butang ug wala makadawat niini. Hangyoa sila sa pagpaambit kon unsa ang ilang nakat-onan gikan sa ilang mga kasinatian. Tingali aduna kay kaugalingong mga kasinatian nga mapaambit usab. Ipaambit ang imong pagpamatuod nga ang Langitnong Amahan kanunay nga motubag sa atong mga pag-ampo sa paagi ug sa panahon nga makapanalangin kanato sa hilabihan.

Awhaga ang Pagkat-on diha sa Panimalay

Dapita ang mga bata nga magmahimong malipayong mga tighatag diha sa ilang mga panimalay niini nga semana ug sa pagtambong sa klase sa sunod semana nga andam nga mo-report kon giunsa nila pagserbisyo ang usa ka tawo nga nanginahanglan.

Pagpalambo sa Atong Pagtudlo

Idumala ang mga kasamok uban sa gugma. “Usahay ang usa ka bata molihok sa mga paagi nga makasamok sa pagkat-on sa uban diha sa klase. Kon mahitabo kini, pagmapail[o]bon, mahigugmaon, ug masinabtanon kabahin sa mga hagit nga tingali giatubang sa bata. … Kon ang bata nga maoy hinungdan sa kasamok adunay espesyal nga mga panginahanglan, pakigsulti sa ward o stake disability specialist o bisitaha ang [disabilities.ChurchofJesusChrist.org] aron masayran kon unsaon nga mas maayong matubag kadto nga mga panginahanglan” (Pagtudlo sumala sa Pamaagi sa Manluluwas, 26).