“Septyembre 4–10. 1 Mga Taga-Corinto 14–16: ‘Ang Dios Dili Dios sa Kaguliyang kondili sa Kalinaw,’” Dali, Sunod Kanako—Alang sa Primary: Bag-ong Tugon 2023 (2022)
“Septyembre 4–10. 1 Mga Taga-Corinto 14–16,” Dali, Sunod Kanako—Alang sa Primary: 2023
Septyembre 4–10
1 Mga Taga-Corinto 14–16
“Ang Dios Dili Dios sa Kaguliyang kondili sa Kalinaw”
Samtang imong basahon ang 1 Mga Taga-Corinto 14–16, ang Espiritu Santo motabang kanimo nga masayod kon unsay itudlo sa mga bata sa imong klase. Rebyoha kini nga latid alang sa dugang nga mga ideya.
Dapita ang Pagpaambit
Mahimo nimong sugdan ang leksiyon niini nga semana pinaagi sa pagbasa og kusog sa 1 Mga Taga-Corinto 14:26. Ipasabot nga kon moanhi kita sa simbahan, makahatag kita og kaayohan (o makapalig-on ug makatabang) sa uban kon ipaambit nato kon unsay atong nakat-onan. Pangutan-a ang mga bata kon unsay ilang mapaambit aron sa paghatag og kaayohan sa usa ka tawo diha sa klase karon.
Itudlo ang Doktrina: Mas Gagmay nga mga Bata
Makapuyo ako uban sa Langitnong Amahan human sa akong kamatayon tungod kay nabanhaw si Jesukristo.
Unsaon nimo pagtudlo ang mga bata nga tungod kay si Jesukristo nabanhaw kita mabuhi pag-usab?
Posible nga mga Kalihokan
-
Sublia sa pipila ka higayon uban sa mga bata ang mosunod nga pulongan: “Banhawon usab ang tanan tungod sa ilang pagkahiusa kang Kristo” (1 Mga Taga-Corinto 15:22). Ipakita ang usa ka hulagway sa nabanhaw nga Manluluwas (tan-awa sa latid niini nga semana diha sa Dali, Sunod Kanako—Alang sa mga Indibidwal ug mga Pamilya). Ipasabot nga kitang tanan mamatay sa umaabot nga adlaw, apan tungod kay si Jesus nabanhaw, kitang tanan mabuhi pag-usab human sa atong kamatayon.
-
Ipakita sa mga bata ang usa dyaket, nga nagrepresentar sa atong pisikal nga mga lawas. Kon kita buhi pa, ang atong mga espiritu anaa sulod sa atong mga lawas, ug ang atong mga lawas makalihok (isul-ob ang dyaket). Kon mamatay kita, ang atong mga espiritu mobiya sa atong pisikal nga mga lawas, ug ang atong mga lawas dili na makalihok (huboa ang dyaket ug ibutang kini sa lamesa o sa lingkoranan aron morepresentar sa usa ka lawas nga wala ang iyang espiritu). Kon kita mabanhaw, ang atong mga espiritu mobalik ngadto sa atong mga lawas (isul-ob og balik ang dyaket), ug dili na gayod kini magkabulag pag-usab. Papuli-puliha ang mga bata sa pagsul-ob sa dyaket ug sa paghubo niini samtang ang laing bata mopasabot sa unsay mahitabo kon kita mabanhaw.
Mahimo akong mabunyagan alang sa mga tawo nga namatay na.
Samtang ang mga bata mangandam alang sa ilang kaugalingon nga mga bunyag, hunahunaa kon sa unsang paagi nimo sila matabangan nga magmahinamon usab sa oportunidad nga mabunyagan alang sa mga patay.
Posible nga mga Kalihokan
-
Tabangi ang mga bata sa paghunahuna og mga butang nga dili nila mabuhat alang sa ilang kaugalingon. Kinsa ang motabang kanila sa pagbuhat niini nga mga butang? Ipakita ang hulagway sa usa sa imong mga katigulangan kinsa namatay nga wala mabunyagi. Sultihi ang mga bata mahitungod niini nga tawo, ug ipasabot nga kini nga tawo nagkinahanglan sa atong tabang aron mabunyagan.
-
Pangutan-a ang mga bata kon duna ba silay mga sakop sa pamilya kinsa nakaadto sa templo aron sa pagpahigayon og mga bunyag alang sa mga patay. Ipakita ang mga litrato sa bunyaganan sa templo. Pangutan-a ang mga bata kon nahibalo ba sila kon unsay mahitabo dinhi. Ipasabot nga diha sa templo mahimo kitang bunyagan alang sa mga tawo nga namatay nga wala mabunyagi. Dayon kadto nga mga tawo mahimong mopili kon modawat ba sa bunyag.
Gusto sa Langitnong Amahan nga mopuyo ako uban Kaniya didto sa celestial nga gingharian.
Unsaon nimo pagtudlo ang mga bata mahitungod sa celestial, terrestrial, ug telestial nga mga gingharian? Makatabang kini nga mga kalihokan.
Posible nga mga Kalihokan
-
Isulat diha sa pisara ang celestial, terrestrial, ug telestial. Tabangi ang mga bata nga makat-on sa pagsulti niini nga mga pulong.
-
Ipakita ang mga hulagway sa adlaw, bulan, ug mga bituon. Dapita ang mga bata sa paghan-ay niini gikan sa kinahayagan ngadto sa kinamenosan og kahayag. Basaha ang 1 Mga Taga-Corinto 15:40–41 ngadto sa mga bata (tan-awa usab ang Hubad ni Joseph Smith diha sa Giya ngadto sa mga Kasulatan). Ipasabot nga ang adlaw, bulan, ug mga bituon nagrepresentar sa mga gingharian nga mahimo natong mapuy-an human kita mabanhaw. Sa celestial nga gingharian, makapuyo kita uban sa Langitnong Amahan.
-
Hatagi ang mga bata og kopya sa pahina sa kalihokan niini nga semana aron koloran. Samtang nagkolor sila, ipaambit nila ang imong mga pagbati mahitungod sa Manluluwas ug sa unsay Iyang nabuhat aron sa paghimong posible alang kanato nga makapuyo pag-usab kauban ang Langitnong Amahan.
“Ang adlaw may kaugalingong katahom” (1 Mga Taga-Corinto 15:41).
Itudlo ang Doktrina: Mas Magulang nga mga Bata
Tungod ni Jesukristo ug sa Iyang Pagkabanhaw, ako mabanhaw.
Nakasabot ba ang mga bata nga imong gitudloan sa kaimportante sa Pagkabanhaw ni Jesukristo? Kini nga mga ideya tingali makatabang.
Posible nga mga Kalihokan
-
Dapita ang mga bata nga magpuli-puli sa pagbasa sa mga bersikulo diha sa 1 Mga Taga-Corinto 15:12–22, nga mangita og mga tubag sa pangutana “Unsay mahitabo kon walay pagkabanhaw?”
-
Dapita ang mga bata sa pagdrama-drama kon unsaon sa pagpasabot sa pagkabanhaw ngadto sa usa ka tawo. Alang sa mga ideya, mahimo nilang rebyohon ang usa ka awit mahitungod sa Pagkabanhaw sa Manluluwas, sama sa “Nabuhi ba Gay[o]d Pag-usab si Jesus?” (Songbook sa mga Bata, 45). Ipakigbahin ang imong pagpamatuod sa Pagkabanhaw ni Kristo.
1 Mga Taga-Corinto 15:12–13, 20–22, 29
Makapangandam ako sa pag-adto sa templo aron mabunyagan alang sa mga patay.
Ang bunyag alang sa mga patay usa ka malipayon nga buhat sa gugma alang sa atong mga katigulangan. Sa unsang paagi nimo matabangan ang mga bata nga mangandam sa pag-apil niini nga buhat?
Posible nga mga Kalihokan
-
Basaha ang 1 Mga Taga-Corinto 15:29. Unsa man ang gibuhat sa mga Santos sa panahon ni Pablo nga gibuhat usab nato karon? Pangutan-a ang mga bata nganong bunyagan kita alang sa mga patay. Kon gikinahanglan, ipasabot nga daghan sa atong mga katigulangan walay oportunidad nga mabunyagan ug makompirmahan niini nga kinabuhi. Diha sa templo, mahimo kitang mabunyagan ug makompirmahan alang kanila.
-
Pipila ka adlaw sa dili pa magklase, hangyoa ang usa ka ginikanan sa usa sa mga bata nga tabangan ang iyang anak nga motambong sa klase nga andam sa pagpaambit sa usa ka family tree o sa pagsaysay og usa ka istorya mahitungod sa usa ka katigulangan. Mahimo usab kang magpaambit mahitungod sa imong mga katigulangan.
-
Dapita ang usa ka sakop sa bishopric o usa ka batan-on sa inyong ward sa pagpaambit og pipila ka butang nga mabuhat sa mga bata aron mahimong andam sa pagsulod sa templo. Hangyoa ang mga bata sa pagdugang sa ilang mga ideya. Dapita sila sa paghimo og tumong nga moadto sa templo ugma damlag.
Human ako mabanhaw, makapuyo ako sa celestial nga gingharian.
Aron sa pagtudlo sa mga taga-Corinto mahitungod sa mga lawas nga atong madawat sa Pagkabanhaw, mihisgot si Pablo og tulo ka ang-ang sa himaya: celestial, terrestrial, ug telestial.
Posible nga mga Kalihokan
-
Basaha ang 1 Mga Taga-Corinto 15:40–41 ug dapita ang usa ka bata sa pagdrowing og adlaw, bulan, ug bituon diha sa pisara. Hangyoa ang mga sakop sa klase sa pag-ila kon unsa nga matang sa nabanhaw nga lawas ang girepresentar sa matag drowing.
-
Kantaha og dungan ang usa ka awit nga may kalabotan niini nga hilisgotan, sama sa “Ang Ginoo Naghatag Kanako og Templo” (Songbook sa mga Bata, 73). Unsa ang gitudlo sa awit kanato mahitungod sa pagpangandam nga mopuyo diha sa celestial nga himaya?
-
Ipasabot nga adunay panan-awon si Joseph Smith diin nakakita siya og tulo ka gingharian nga mitakdo sa mga matang sa lawas nga gihulagway ni Pablo. Tabangi ang mga bata sa pagpangita sa mga pulongan gikan sa Doktrina ug mga Pakigsaad 76:50–53, 70; 76:71–79; 76:81–82 nga naghulagway niining tulo ka gingharian.
Awhaga ang Pagkat-on diha sa Panimalay
Dapita ang mga bata sa paghangyo sa ilang mga ginikanan nga sultihan sila og usa ka istorya mahitungod sa usa sa ilang mga katigulangan. Mahimo nilang ipaambit ang istorya diha sa klase sa sunod semana.
Pagpalambo sa Atong Pagtudlo
Awhaga ang mga bata sa pagpangutana. “Paningkam[o]ti nga makita ang … mga pangutana [sa mga bata] isip mga oportunidad, dili nga makabalda o mga babag sa imong leks[i]yon. … Ang ingon nga mga pangutana maghatag kanimo og bililhon nga mga panab[o]t kon unsay gihunahuna sa mga bata, unsay ilang mga kabalaka, ug unsay ilang mga reaks[i]yon sa mga butang nga ilang nakat-[o]nan. Tabangi sila nga makakita nga ang mga tubag sa ilang mga pangutana makita diha sa mga kasulatan ug sa mga pulong sa buhing mga propeta” (Pagtudlo sumala sa Pamaagi sa Manluluwas, 25).