“Septiyembre 4–10. 1 Mga Taga-Corinto 14–16: Ang Dios Dili Dios sa Kasamok, kondili sa Kahusay’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2023 (2022)
“Septiyembre 4–10. 1 Mga Taga-Corinto 14–16,” Dali, Sunod Kanako—Alang sa mga Indibidwal ug mga Pamilya: 2023
Septiyembre 4–10
1 Mga Taga-Corinto 14–16
“Ang Dios Dili Dios sa Kasamok, kondili sa Kahusay”
I-rekord ang imong mga panghunahuna samtang ikaw magbasa sa 1 Mga Taga-Corinto 14–16. Pag-ampo mahitungod sa unsay gitudlo sa Espiritu kanimo, ug pangutan-a ang Langitnong Amahan kon Siya aduna pa bay gusto nga imong makat-onan.
I-rekord ang Imong mga Panghunahuna
Tungod kay ang Simbahan ug ang mga doktrina niini kon itandi bag-o diha sa Corinto, masabtan nga ang mga Santos nga taga-Corinto nakasugat og kalibog. Gitudlo na ni Pablo kanila ang sukaranang kamatuoran sa ebanghelyo: “Nga si Kristo namatay tungod sa atong mga sala … ug nga siya gilubong, ug nga siya nabanhaw sa ikatulo nga adlaw” (1 Mga Taga-Corinto 15:3–4). Apan ang pipila ka mga miyembro sa wala madugay misugod sa pagtudlo nga “walay pagkabanhaw ang nangamatay” (1 Mga Taga-Corinto 15:12). Nangamuyo si Pablo kanila sa “pagkupot pag-ayo” sa mga kamatuoran nga gitudlo kanila (1 Mga Taga-Corinto 15:2). Kon makasugat kita og nagkasumpaki nga mga opinyon mahitungod sa mga kamatuoran sa ebanghelyo, kini maayo nga hinumdoman nga “ang Dios dili Dios sa kasamok, kondili sa kahusay” (1 Mga Taga-Corinto 14:33). Ang pagpaminaw ngadto sa gitudlo nga mga sulugoon sa Ginoo ug sa paghupot sa yanong mga kamatuoran nga ilang gibalik-balik sa pagtudlo makatabang kanato sa pagpangita og kalinaw ug “pagbarog nga malig-on sa inyong pagtuo” (1 Mga Taga-Corinto 16:13).
Mga Ideya alang sa Personal nga Pagtuon sa Kasulatan
Magtinguha ako sa gasa sa panagna.
Unsa ang gasa sa panagna? Abilidad ba kini sa pagtagna sa umaabot? Kini ba sa mga propeta lamang? O makahimo ba si bisan kinsa sa pagdawat niini nga gasa?
Palandonga kini nga mga pangutana samtang ikaw nagtuon sa 1 Mga Taga-Corinto 14:3, 31, 39–40. Makahimo ka usab sa pagbasa sa Pinadayag 19:10 ug sa “Pagpanagna, Panagna” sa Giya ngadto sa mga Kasulatan (scriptures.ChurchofJesusChrist.org). Gibase sa unsay imong nakat-onan, unsaon nimo sa pagpatin-aw ang gasa sa panagna? Unsa kaha ang gipasabot ni Pablo sa dihang gidapit niya ang mga taga-Corinto nga “tinguhaa ninyo sa dakong kasibot ang paghimog panagna (propesiya)”? (1 Mga Taga-Corinto 14:39). Unsaon nimo sa pagdawat niini nga pagdapit?
Tan-awa usab sa Joel 2:28–29; Alma 17:3; Doktrina ug mga Pakigsaad 11:23–28.
Unsaon sa pahayag mahitungod sa mga babaye niini nga mga bersikulo paggamit karon?
Sa panahon ni Pablo, dihay nagkalainlaing mga gipaabot mahitungod kon unsaon sa mga babaye sa pag-apil sa katilingban, lakip sa mga miting sa simbahan. Bisan unsa pa ang gipasabot sa mga pagtulon-an diha sa 1 Mga Taga-Corinto 14:34–35 sa panahon ni Pablo, kinahanglan nga kini dili pagasabton nga ang mga babaye dili makasulti ug makapangulo sa Simbahan karon. Misulti si Presidente Russell M. Nelson ngadto sa mga babaye sa Simbahan karon: “Kami … nagkinahanglan sa inyong kalig-on, sa inyong pagkakabig, sa inyong lig-on nga pagtuo, sa inyong abilidad sa pagpangulo, sa inyong kaalam, ug sa inyong mga tingog. Ang gingharian sa Dios dili ug dili mahimong kompleto kon wala ang mga babaye kinsa naghimo og sagradong mga pakigsaad ug dayon naghupot niini, mga babaye kinsa makasulti uban sa gahom ug awtoridad sa Dios!” (“Usa ka Hangyo ngadto sa Akong mga Sister,” Liahona, Nob. 2015, 96).
1 Mga Taga-Corinto 15:1–34, 53–58
Si Jesukristo nakaangkon og kadaogan ibabaw sa kamatayon.
Ang Pagkabanhaw ni Jesukristo hilabihan sa ka mahinungdanon ngadto sa Kristiyanismo, mahimong mosulti ang usa ka tawo nga kon wala kini walay Kristiyanismo—sa paggamit sa mga pulong ni Pablo, “nan kawang lamang ang among pagwali, ug kawang lamang usab diay ang inyong pagtuo” (1 Mga Taga-Corinto 15:14). Apan ang pipila sa mga Santos nga taga-Corinto nanagtudlo nga “walay pagkabanhaw sa mga nangamatay” (1 Mga Taga-Corinto 15:12). Samtang ikaw magbasa sa tubag ni Pablo sa 1 Mga Taga-Corinto 15, pamalandong sa makadiyot kon sa unsang paagi ang imong kinabuhi malahi kon ikaw dili motuo sa Pagkabanhaw (tan-awa sa 2 Nephi 9:6–19; Alma 40:19–23; Doktrina ug mga Pakigsaad 93:33–34). Unsa ang kahulogan nganha kanimo sa hugpong sa mga pulong “Kon si Kristo wala banhawa, ang inyong pagtuo wala lamay kaposlanan” (bersikulo 17).
Kini takos usab nga hinumdoman nga gipasabot ni Pablo ang bunyag sa mga patay isip ebidensiya alang sa pagkatinuod sa pagkabanhaw (tan-awa sa 1 Mga Taga-Corinto 15:29). Giunsa sa buhat sa templo ug family history paglig-on sa imong hugot nga pagtuo diha sa doktrina sa pagkabanhaw?
Tan-awa usab sa Doktrina ug mga Pakigsaad 138:11–37.
Ang nabanhaw nga mga lawas lahi gikan sa mortal nga mga lawas.
Nakahunahuna ba ikaw kon sama sa unsa ang nabanhaw nga lawas? Sumala sa 1 Mga Taga-Corinto 15:35, ang pipila sa mga taga-Corinto naghunahuna sa samang butang. Basaha ang tubag ni Pablo sa mga bersikulo 36–54, ug timan-i ang mga pulong ug hugpong sa mga pulong nga naghulagway sa mga kalainan tali sa mortal nga mga lawas ug nabanhaw nga mga lawas. Samtang ikaw nagbuhat, mahimo nimong itandi ang mga bersikulo 40–42 ngadto sa Doktrina ug mga Pakigsaad 76:50–112. Unsa ang gidugang niini nga pagpadayag ngadto ni Propeta Joseph Smith diha sa imong pagsabot? (tan-awa usab sa Hubad ni Joseph Smith, 1 Mga Taga-Corinto 15:40 [sa 1 Mga Taga-Corinto 15:40, footnote a]). Nganong kini nga mga kamatuoran bililhon nganha kanimo?
Tan-awa usab sa Lucas 24:39; Alma 11:43–45; Doktrina ug mga Pakigsaad 88:14–33.
“Lain ang kasanag sa adlaw” (1 Mga Taga-Corinto 15:41).
Mga Ideya alang sa Pamilya nga Pagtuon sa Kasulatan ug Home Evening
-
1 Mga Taga-Corinto 15:29.Atong makat-onan gikan sa bersikulo 29 nga ang karaang mga Kristiyanos miapil sa mga bunyag alang sa mga patay, sama sa atong gibuhat karon. Unsaon nato sa pagpasabot ngadto sa uban kon nganong kita gibunyagan alang sa atong mga katigulangan? Unsa ang atong gibuhat isip usa ka pamilya sa paghatag og mga ordinansa sa templo alang sa atong namatay nga mga katigulangan kinsa nagkinahanglan niini? Makakaplag ka og mas daghan pa nga mga kapangohaan niini nga hisgotanan diha sa Gospel Topics nga artikulo “Bunyag alang sa mga Patay, Mga” (topics.ChurchofJesusChrist.org) ug diha sa FamilySearch.org.
-
1 Mga Taga-Corinto 15:35–54.Unsa nga mga butang o mga hulagway ang imong mapakita aron matabangan ang imong pamilya sa pagsabot sa pipila ka termino nga gigamit ni Pablo sa paghulagway kon sa unsa nga paagi ang mortal nga mga lawas lahi gikan sa nabanhaw nga mga lawas? Sama pananglit, sa pagpakita sa kalainan tali sa madunot ug dili madunot (tan-awa sa mga bersikulo 52–54) mahimong mopakita ka og metal nga gitaya ug metal nga dili motaya. O mahimo nimong itandi ang butang nga huyang uban sa butang nga lig-on (tan-awa sa bersikulo 43).
-
1 Mga Taga-Corinto 15:55–57.Usa ka panaghisgotan mahitungod niini nga mga bersikulo mahimong ilabi ka makahuluganon kon ang imong pamilya nakahibalo og usa ka tawo kinsa namatay. Ang mga sakop sa pamilya makahatag og pagpamatuod kon giunsa ni Jesukristo pagkuha “ang ikot sa kamatayon” (bersikulo 56).
-
1 Mga Taga-Corinto 16:13.Aron matabangan ang mga sakop sa imong pamilya nga makasabot niini nga bersikulo, makadrowing ka og lingin diha sa yuta ug sugoa ang usa ka sakop sa pamilya nga “magbarog nga malig-on” sa sulod niini nga ang iyang mga mata nagpiyong. Dayon ang uban makasulay sa pagduot o pagbitad kaniya gikan sa lingin. Unsa nga kalainan ang mahimo niini kon ang tawo diha sa lingin nagbuka sa iyang mga mata ug “makabantay”? Unsa ang atong mahimo nga “magbarog nga malig-on” kon kita gitintal sa paghimo og ngil-ad nga mga pagpili?
Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.
Gisugyot nga himno: “Siya Nabanhaw!,” Mga Himno, nu. 118.
Pagpalambo sa Personal nga Pagtuon
Pangita og mga sundanan. Diha sa mga kasulatan makita nato ang mga sundanan nga nagpakita kon sa unsa nga paagi ang Ginoo naghimo sa Iyang buhat. Unsa nga mga sundanan ang imong nakita sa 1 Mga Taga-Corinto 14 nga nagtabang kanato sa pagsabot kon unsaon sa paglig-on sa usag usa?
Why Weepest Thou [Nganong Naghilak Ka], © Simon Dewey 2021. Gigamit nga may pagtugot gikan sa Altus Fine Art/www.altusfineart.com