Septiyembre 18–24

2 Mga Taga-Corinto 8–13

“Ang Dios Nagahigugma sa Malipayong Maghahatag”

Ang pag-rekord og espirituhanong mga panghunahuna makatabang kanimo nga makahinumdom unsay imong nakat-onan sa panahon sa pagtuon sa kasulatan. Mahimo nimong isulat diha sa usa ka study journal, maghimo og mga mubo nga sulat sa daplin sa imong mga kasulatan, modugang og mubo nga mga sulat sa imong Gospel Library nga app, o maghimo og audio recording sa imong mga hunahuna.

I-rekord ang Imong mga Panghunahuna

Unsay imong buhaton kon ikaw makadungog nga ang kongregasyon sa mga Santos sa laing dapit naglisod sa kakabos? Mao kini ang sitwasyon nga gihulagway ni Pablo ngadto sa mga Santos nga taga-Corinto sa 2 Mga Taga-Corinto 8–9. Naglaom siya nga maawhag ang mga Santos nga taga-Corinto sa paghatag sa pipila sa ilang kabuhong ngadto sa mga Santos nga nanginahanglan. Apan lapas sa usa ka paghangyo alang sa mga paghatag, ang mga pulong ni Pablo naglakip usab og kinasingkasing nga mga kamatuoran mahitungod sa paghatag: “Ang matag usa magahatag sumala sa pagbuot sa iyang kasingkasing, dili nga nagpanuko ni ingon pinugos, kay ang Dios nagahigugma sa malipayong maghahatag” (2 Mga Taga-Corinto 9:7). Sa atong panahon, may mga Santos pa gihapon sa tibuok kalibotan kinsa nagkinahanglan og tabang. Usahay ang labing maayo natong mahimo alang kanila mao ang pagpuasa ug modonar og mga halad sa puasa. Sa ubang mga sitwasyon, ang atong paghatag mahimong direkta ug personal. Bisan unsa nga matang sa atong mga sakripisyo, mas maayo nga atong susihon ang atong mga tumong sa paghatag. Ang ato bang mga sakripisyo mga pagbati sa gugma? Human sa tanan, ang gugma mao ang makahimo sa tighatag nga malipayon.

Mga Ideya alang sa Personal nga Pagtuon sa Kasulatan

2 Mga Taga-Corinto 8:1–15; 9:5–15

Malipayon akong mopaambit unsay anaa kanako sa pagpanalangin sa kabos ug timawa.

Adunay daghang mga tawo nga nagkinahanglan sa tibuok kalibotan. Sa unsa nga paagi kita posibling makahimo og kalainan? Si Elder Jeffrey R. Holland mitanyag niini nga tambag: “Dato o kabos, kita kinahanglang mohimo ‘kutob sa atong mahimo’ kon ang uban nanginahanglan [tan-awa sa Marcos14:6, 8]. … “[Ang Dios] motabang ug mogiya kaninyo sa inyong manggiloy-ong mga buhat sa pagkadisipulo kon mahunahunaon ug mainampoon ug mangita kamo og paagi sa pagsunod sa sugo nga balik-balik Niyang gihatag kanato” (“Dili ba Kitang Tanan Makililimos?,” Liahona, Nob. 2014, 41).

Basaha ang 2 Mga Taga-Corinto 8:1–15; 9:6–15, magtimaan sa mga baroganan nga gitudlo ni Pablo mahitungod sa pag-atiman sa kabos ug sa timawa. Unsa ang nagdasig kanimo mahitungod sa tambag ni Pablo? Mahimo kang mag-ampo alang sa giya mahitungod sa unsay imong mahimo sa pagpanalangin sa usa ka tawo nga nanginahanglan. Siguroha ang pag-rekord sa bisan unsa nga mga impresyon nga imong madawat ug buhata kini.

Tan-awa usab sa Mosiah 4:16–27; Alma 34:27–29; Russell M. Nelson, “Ang Dako ug Ikaduhang Sugo,” Liahona, Nob. 2019, 96–100; Henry B. Eyring, “Dili Ba Mao Kini ang Pagpuasa nga Akong Napili?,” Liahona, Mayo 2015, 22–25.

2 Mga Taga-Corinto 11: 1– 6, 1–15; 13:5–9

“Susiha ang inyong kaugalingon, sa pagsuta kon kamo nagapadayon ba sa inyong pagtuo.”

Karon, ingon sa panahon ni Pablo, aduna niadto kinsa maninguha sa paggiya kanato palayo “gikan sa maminatud-on kang Kristo” (2 Mga Taga-Corinto 11:3). Tungod niana nga rason, kini labing mahinungdanon ang pagbuhat sa unsay gisugyot ni Pablo: “Susiha ang inyong kaugalingon, sa pagsuta kon kamo nagapadayon ba sa inyong pagtuo” (2 Mga Taga-Corinto 13:5). Ikaw makasugod niini nga proseso pinaagi sa paghunahuna mahitungod sa unsay gipasabot niini nga “nagpadayon ba sa pagtuo.” Unsaon nimo pagkahibalo nga anaa ikaw nagpadayon sa pagtuo? Pangita alang sa mga oportunidad nga ikaw kinahanglang mosusi sa imong kaugalingon.

Isip kabahin sa imong pagsusi, mahimo usab ikaw nga mamalandong sa hugpong sa mga pulong “ang maminatud-on ni Kristo” (2 Mga Taga-Corinto 11:3). Giunsa nimo sa pagkakaplag ang ka maminatud-on ni Kristo ug sa Iyang ebanghelyo? Unsaon kaha nga ang imong hunahuna mahimong “malimbongan niana [nga] ka maminatud-on”? Unsang makatabang nga mga tambag ang imong makaplagan diha sa 2 Mga Taga-Corinto 11:1–6, 13–15?

Hunahunaa usab kini nga tambag gikan ni Presidente Dieter F. Uchtdorf: “Kon kamo naghunahuna nga ang ebanghelyo wala kaayo makahatag og benepisyo kaninyo, ako modapit kaninyo sa pag-atras, pagtan-aw sa inyong kinabuhi gikan sa mas taas nga ang-ang, ug ipasayon ang inyong pamaagi ngadto sa pagkadisipulo. Hatagi og gibug-aton ang sukaranang mga doktrina, mga baroganan, ug ang paggamit sa ebanghelyo. Mosaad ko nga ang Dios mogiya ug mopanalangin kaninyo sa inyong dalan padulong sa makatagbaw nga kinabuhi, ug ang ebanghelyo siguradong mas makahatag og benepisyo kaninyo” (“Nakabenepisyo Kaayo Kini!,” Liahona, Nob. 2015, 22).

2 Mga Taga-Corinto 12:5–10

Ang grasya sa Manluluwas igo na sa pagtabang kanako nga makakaplag og kalig-on diha sa akong kahuyang.

Wala kita mahibalo kon unsa nga “tunok dinhi sa lawas” ang anaa ni Pablo, apan kitang tanan adunay atong kaugalingong mga tunok nga kita manghinaot nga kuhaon sa Dios gikan sa atong mga kinabuhi. Paghunahuna mahitungod sa imong mga tunok samtang ikaw nagbasa sa 2 Mga Taga-Corinto 12:5–10, ug pamalandonga kon unsa ang imong nakat-onan mahitungod ni Jesukristo niini nga mga bersikulo. Unsa ang gitudlo ni Pablo dinhi niini nga mga bersikulo mahitungod sa mga pagsulay ug kahuyang? Unsa ang gipasabot niini nganha kanimo nga ang “grasya sa Dios igo” alang kanimo?

Tan-awa usab sa Mosiah 23:21–24; 24:10–15; Ether 12:27; Moroni 10:32–33.

Mga Ideya alang sa Pamilya nga Pagtuon sa Kasulatan ug Home Evening

2 Mga Taga-Corinto 8–9.Unsa ang atong makaplagan niini nga mga kapitulo nga nagdasig kanato sa pagkab-ot ngadto sa mga kabos ug sa uban nga nanginahanglan? Tingali kini ang maayong panahon sa pagplano og usa ka buhat sa pagserbisyo isip pamilya alang sa usa ka tawo nga nanginahanglan.

2 Mga Taga-Corinto 9:6–7.Ang imo bang pamilya nakaila og usa ka tawo kinsa mahulagway nga “usa ka malipayong maghahatag”? Unsaon nato paghimo sa atong pagserbisyo ngadto sa uban nga mas malipayon? Ang batan-ong mga sakop sa pamilya makahimo og mga tsapa nga nag-ingon “Ako usa ka malipayong maghahatag.” Mahimo nimong iganti ang mga tsapa ngadto sa mga sakop sa pamilya sa panahon nga imo silang makita nga nagserbisyo sa usag usa nga malipayon.

2 Mga Taga-Corinto 10:3–7.Unsaon nimo sa pagtudlo ang imong pamilya mahitungod sa “pakiggubat” batok sa pagkadautan? Ang imo bang pamilya ganahan nga magtukod og paril o kota gamit ang mga lingkoranan ug mga habol? Kini mosangpot ngadto sa panaghisgotan mahitungod kon unsaon sa pagsalikway sa mga butang nga mopahilayo kanato gikan sa Dios ug unsaon sa “[pagdala] ngadto sa pagkabihag sa tanang panghunahuna aron kini magmasinugtanon kang Kristo.” Unsa ang espirituhanong “mga hinagiban” nga atong magamit sa pagpugong sa atong mga hunahuna? (tan-awa sa Mga Taga-Efeso 6:11–18).

2 Mga Taga-Corinto 11:3.Unsay mahimo sa imong pamilya sa pagtutok pa og dugang diha “sa ka maminatud-on ni Kristo”?

Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga awit: “Sulti sa Gamay nga Sapa, ‘Hatag’,” Songbook sa mga Bata,, 88.

Pagpalambo sa Personal nga Pagtuon

I-rekord ang mga Panghunahuna. Si Elder Richard G. Scott miingon: “Ang kahibalo nga mainampingon nga gi-rekord maoy usa ka kahibalo nga magamit sa panahon sa panginahanglan. … Ang [pagrekord sa espirituhanong direksyon] nagpalambo sa kalagmitan sa inyong pagdawat og dugang nga kahayag” (“Acquiring Spiritual Knowledge,” Ensign, Nob. 1993, 88; tan-awa usab sa Pagtudlo sumala sa Pamaagi sa Manluluwas, 12, 30).

“Ang matag usa magahatag sumala sa pagbuot sa iyang kasingkasing, dili nga magapanuko ni ingon nga pinugos, kay ang Dios nagahigugma sa malipayong maghahatag” (2 Mga Taga-Corinto 9:7).