Ang nabanhaw nga Manluluwas miduaw ni Pablo sa bilanggoan (tan-awa sa Mga Buhat 23:11). Si Jesukristo makaluwas kanato gikan sa “yugo sa pagkaulipon” (Mga Taga-Galacia 5:1).

Septiyembre 25–October 1

Mga Taga-Galacia

“Panaggawi Kamo diha sa Espiritu”

Samtang magbasa ka sa Mga Taga-Galacia, i-rekord ang mga panghunahuna nga imong madawat. Ang pagbuhat sa ingon makatabang kanimo sa paghinumdom ug pagpamalandong niini sa umaabot.

I-rekord ang Imong mga Panghunahuna

Ang ebanghelyo ni Jesukristo nagtanyag og kagawasan gikan sa espirituhanong pagkaulipon. Apan usahay ang mga tawo kinsa nakasinati sa kagawasan sa ebanghelyo mopahilayo gikan niini ug “buot magpaulipon kanila pag-usab” (Mga Taga-Galacia 4:9). Mao kini ang gibuhat sa pipila ka mga Santos nga taga-Galacia—mipahilayo sila gikan sa kagawasan nga gitanyag ni Kristo kanila (tan-awa sa Mga Galacia 1:6). Ang Sulat ni Pablo ngadto sa mga Taga-Galacia, busa, usa ka dinalian nga tawag sa pagbalik ngadto “sa kagawasan kita gipahigawas ni Kristo” (Mga Taga-Galacia 5:1). Kini nga tawag maoy usa nga kita usab nagkinahanglan nga makadungog ug mosanong tungod kay samtang ang mga sitwasyon mausab, ang pakigbisog tali sa kagawasan ug pagkaulipon kanunay. Sama sa gitudlo ni Pablo, dili igo nga “gipangtawag ngadto sa kagawasan” (Mga Taga-Galacia 5:13); kinahanglan usab nga “managbarog nga malig-on” diha niini (Mga Taga-Galacia 5:1) pinaagi sa pagsalig diha ni Kristo.

Mga Ideya alang sa Personal nga Pagtuon sa Kasulatan

Mga Taga-Galacia 1–5

Ang balaod ni Kristo naghimo kanako nga gawasnon.

Misulat si Pablo ngadto sa mga Santos nga taga-Galacia sa dihang iyang nahibaloan nga nahisalaag sila pinaagi sa sayop nga mga pagtulon-an (tan-awa sa Mga Taga-Galacia 1:6–9). Usa niini nga mga pagtulon-an mao nga aron maluwas, ang mga Hentil kinsa midawat sa ebanghelyo kinahanglan nga magpasirkunsisyon ug maghupot sa ubang mga tradisyon sa balaod ni Moises (tan-awa sa Mga Taga-Galacia 2). Gitawag ni Pablo kini nga tradisyon og ang “yugo sa pagkaulipon” (Mga Taga-Galacia 5:1). Samtang ikaw magbasa sa tambag ni Pablo ngadto sa mga taga-Galacia, pangita og mga baroganan nga makatabang kanimo sa pagsabot kon unsa ang tinuod nga kagawasan. Makapamalandong usab ikaw unsa nga mini nga mga tradisyon o ubang mga yugo sa pagkaulipon mahimong anaa sa imong kinabuhi. Aduna bay butang nga nakapugong kanimo gikan sa pagsinati sa kagawasan nga gitanyag sa ebanghelyo? Sa unsa nga paagi si Kristo ug ang Iyang ebanghelyo “naghimo [kanimo] nga gawasnon”? (Mga Taga-Galacia 5:1).

Tan-awa usab sa 2 Nephi 2:27; 9:10–12.

Mga Taga-Galacia 3

Manununod ako sa mga panalangin nga gisaad ngadto ni Abraham.

Ang pipila sa mga Santos nga taga-Galacia nabalaka nga tungod kay sila dili literal nga mga kagikan (“kaliwat”) ni Abraham, dili sila makadawat sa mga panalangin nga gisaad ngadto ni Abraham, lakip na sa kahimayaan. Sumala sa Mga Taga-Galacia 3:7–9, 13–14, 27–29, unsa ang makasarang sa usa ka tawo nga mahimong “kaliwat ni Abraham”?

Aron makahibalo mahitungod sa mga panalangin nga gisaad ngadto ni Abraham ug sa mga panalangin nga atong mapanunod isip iyang kaliwat, tan-awa sa Giya ngadto sa mga Kasulatan, “Pakigsaad Sama Kang Abraham,” topics.Church of Jesus Christ.org. Ngano nga ang mga panalangin nga gisaad ngadto ni Abraham importante nganha kanimo?

Mga Taga-Galacia 3:6–25

Si Abraham may ebanghelyo ni Jesukristo.

Si Propeta Joseph Smith mipasabot: “Dili kita makatuo nga ang mga labing karaan sa tanang panahon walay alamag kaayo sa sistema sa langit sumala sa pagtuo sa kadaghanan, gumikan nga ang tanan sukad naluwas, naluwas pinaagi sa gah[o]m niining mahinungdanong plano sa katubsanan, ingon man usab sa wala pa ang pag-anhi ni Kristo. … Si Abraham mihalad og sakripisyo, ug bisan pa niini, ang Ebanghelyo gisangyaw ngadto kaniya” (“The Elders of the Church in Kirtland to Their Brethren Abroad,” The Evening and the Morning Star,, Mar. 1834, 143, josephsmithpapers.org). Ngano kaha nga importante alang sa mga Santos sa panahon ni Pablo nga mahibalo nga si Abraham ug ang ubang karaang mga propeta may ebanghelyo ni Jesukristo? Nganong importante alang kanimo nga mahibalo niini? (Tan-awa sa Helaman 8:13–20; Moises 5:58–59; 6:50–66.)

Tan-awa usab sa Mga Pagtulun-an sa mga Presidente sa Simbahan: Joseph Smith (2007), 53–66.

Mga Taga-Galacia 5:13–26; 6:7–10

Kon ako “managgawi sa Espiritu,” makadawat ako sa “bunga sa Espiritu.”

Ang pagtuon niini nga mga bersikulo makatabang kanimo sa pagtimbang-timbang kon unsa ka kahingpit nga naglakaw diha sa Espiritu. Nagsinati ba ikaw sa bunga sa Espiritu nga gihisgotan sa mga bersikulo 22–23? Unsang uban nga bunga, o mga resulta, sa espirituhanong pagpuyo ang imong namatikdan? Palandonga unsay imong gikinahanglan nga buhaton sa pag-ugmad sa hingpit niini nga bunga. Sa unsa nga paagi kaha nga ang pag-ugmad niini nga bunga makapalambo sa importante nga mga relasyon sa imong kinabuhi?

Kinahanglan nga magtinguha ako sa “bunga sa Espiritu” sa akong kinabuhi.

Kon ikaw naninguha sa paglakaw diha sa Espiritu apan ang imong mga paningkamot wala ingon og namunga sa gisaad nga bunga, basaha ang Mga Taga-Galacia 6:7–10. Unsa nga mensahe sa imong paminaw aduna ang Ginoo alang kanimo dinhi niini nga mga bersikulo?

Tan-awa usab sa Alma 32:28, 41–43; Doktrina ug mga Pakigsaad 64:32–34.

Mga Ideya alang sa Pamilya nga Pagtuon sa Kasulatan ug Home Evening

Mga Taga-Galacia 3:11.Unsay gipasabot sa “mabuhi pinaagi sa pagtuo”? Sa unsa nga paagi kita nagpuyo pinaagi sa pagtuo isip usa ka pamilya?

Mga Taga-Galacia 4:1–7.Mahimo nimong ipaila ang Mga Taga-Galacia 4 pinaagi sa paghisgot sa mga kalainan tali sa mga sulugoon sa hari ug sa iyang mga anak. Unsa nga mga oportunidad o kalagmitan ang anaa sa anak sa hari nga wala sa usa ka sulugoon? Hunahunaa kini samtang magbasa kamo og dungan sa mga bersikulo 1–7. Unsa ang gitudlo niini nga mga bersikulo mahitungod sa atong relasyon ngadto sa Langitnong Amahan?

Mga Taga-Galacia 5:16–26.Hunahunaa ang paghisgot sa kalainan tali sa ”buhat sa unod” ug ang “bunga sa Espiritu.” Sa pagdugang og kalingawan sa inyong panaghisgot, ang imong pamilya makabutang og mga ngalan sa lainlaing mga bunga nga gigamit ni Pablo sa paghulagway sa bunga sa Espiritu. Dayon ang matag sakop sa pamilya makapili og usa, mopatin-aw niini, ug mohisgot mahitungod sa usa ka tawo kinsa nagpakita og maayong ehemplo niana nga bunga. Makagiya kini ngadto sa usa ka panaghisgot mahitungod sa mga paagi nga ang imong pamilya makadapit sa Espiritu nganha sa imong panimalay ug makaugmad niini nga bunga. Human sa panaghisgot, mahimo nga dungan ninyong kalingawan ang usa ka fruit salad.

Mga Taga-Galacia 6:1–2.Tingali adunay mga panahon nga usa ka tawo sa imong pamilya “mahiligas ngadto sa kalapasan.” Unsa nga tambag ang imong nakita sa Mga Taga-Galacia 6:1–2 mahitungod sa unsay buhaton sa maong sitwasyon?

Mga Taga-Galacia 6:7–10.Kon ang imong pamilya sukad nakatanom og dungan, mahimo nimong gamiton kana nga kasinatian sa paghulagway sa baroganan “kay bisan unsay igapugas sa tawo, mao usab kana ang iyang pagaanihon” (bersikulo 7). O mahimo kang mangutana sa mga sakop sa pamilya mahitungod sa ilang paborito nga mga bunga o mga utanon ug maghisgot mahitungod kon unsay kinahanglanon aron motubo ang tanom nga makahatag niana nga pagkaon. (Tan-awa ang hulagway sa kataposan niini nga latid.) Dayon mahisgotan nimo ang mahitungod sa mga panalangin nga gilaoman sa imong pamilya nga madawat ug unsaon sa “pag-ani” niadto nga mga panalangin.

Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga awit: “Tudloi Ko Paglakaw sa Kahayag,” Songbook sa mga Bata,, 70–71.

Pagpalambo sa Atong Pagtudlo

Tabangi ang imong pamilya nga ipahisama ang mga kasulatan ngadto sa ilang mga kaugalingon. Si Nephi miingon, “Kay ako mipahisama sa tanan nga mga kasulatan ngari kanato, nga kini unta mahimo alang sa atong kaayohan ug sa atong pagkat-on” (1 Nephi 19:23). Aron matabangan ang imong pamilya sa pagbuhat niini, mahimong dapiton nimo sila sa pagpamalandong sa mga panahon sa dihang nakasinati sila sa bunga sa Espiritu nga gihulagway sa Mga Taga-Galacia 5:22–23. (Tan-awa sa Pagtudlo sumala sa Pamaagi sa Manluluwas, 21.)

Gitudlo ni Pablo nga kon kita maglakaw diha sa Espiritu, masinati nato ang “bunga sa Espiritu” sa atong mga kinabuhi.