miting sa sakramento

Agosto 28–Septiyembre 3

1 Mga Taga-Corinto 8–13

“Kamo ang Lawas ni Kristo”

Samtang ikaw magbasa sa mainampoong paagi sa 1 Mga Taga-Corinto 8–13, ang Espiritu Santo mahimong mosulti kanimo sa malinawon nga mga paagi (tan-awa sa 1 Mga Hari 19:11–12). Ang pagrekord niini nga mga panghunahuna motabang kanimo sa paghinumdom sa mga pagbati ug mga hunahuna nga ikaw aduna sa panahon sa imong pagtuon.

I-rekord ang Imong mga Panghunahuna

Sa panahon ni Pablo, ang Corinto mao ang usa ka mauswagong sentro sa patigayon uban sa mga lumulupyo gikan sa tibuok gingharian sa Roma. Tungod sa daghang nagkalainlaing mga kultura ug mga relihiyon diha sa siyudad, ang mga miyembro sa Simbahan sa Corinto naglisod sa pagpabilin sa panaghiusa, busa si Pablo naninguha sa pagtabang kanila nga makakaplag og panaghiusa diha sa ilang pagtuo ni Kristo. Kini nga panaghiusa kinahanglang mas labaw pa kay sa malinawon lamang nga panag-uban og puyo; si Pablo wala lamang maghangyo kanila sa pagbale-wala sa mga kalainan sa usag usa. Hinoon, mitudlo siya nga kon ikaw mopasakop sa Simbahan ni Jesukristo, ikaw “nabunyagan ngadto sa usa ka lawas,” ug ang matag bahin sa lawas gikinahanglan (1 Mga Taga-Corinto 12:13). Kon ang usa ka miyembro mawala, sama kini nga nawad-an og tiil o bukton, ug ang lawas, mas huyang isip resulta. Kon ang usa ka miyembro nag-antos, kinahanglan kitang tanan mobati niini ug mobuhat sa atong bahin sa paghupay niini. Niini nga matang sa panaghiusa, ang mga kalainan wala lamang giila apan gikahinangop, tungod kay kon wala ang mga miyembro nga nagkalainlain og mga gasa ug mga abilidad, ang lawas mahimong limitado. Busa kon ikaw mobati nga kanunay kang komportable diha sa Simbahan o nakita ang imong kaugalingon nga naghunahuna kon ikaw sa tinuod nahiapil ba, ang mensahe ni Pablo nganha kanimo mao nga ang panaghiusa dili ang pagkaparehas. Ikaw nagkinahanglan sa imong isig ka Santos, ug ang imong isig ka Santos nagkinahanglan kanimo.

icon sa personal nga pagtuon

Mga Ideya alang sa Personal nga Pagtuon sa Kasulatan

1 Mga Taga-Corinto 10:1–13

Ang Dios naghatag og paagi sa paglikay sa tintasyon.

Ang espirituhanon nga mga kasinatian, bisan ang mga milagroso, dili makapalingkawas kanato gikan sa mga tintasyon nga “maantos sa tawo” (1 Mga Taga-Corinto 10:13). Kana mahimo nga usa ka rason nga gisulat ni Pablo ang mahitungod kon giunsa pagpakigbisog sa mga Israelite sa panahon ni Moises ang tintasyon, bisan og sila misaksi og dagkong mga milagro (tan-awa sa Exodo 13:21; 14:13–31). Samtang ikaw nagbasa sa 1 Mga Taga-Corinto 10:1–13, unsa nga mga pasidaan ang nasinati sa mga Israelite nga ingon og magamit nganha kanimo? Unsa nga mga matang sa “pag-eskapo” gikan sa tintasyon ang gihatag sa Langitnong Amahan nganha kanimo? (tan-awa usab sa Alma 13:27–30; 3 Nephi 18:18–19).

1 Mga Taga-Corinto 10:16–17; 11:16–30

Ang sakramento naghiusa kanato isip mga miyembro sa Simbahan ni Kristo.

Bisan tuod ang sakramento naglakip og usa ka personal nga pasalig tali kanimo ug sa Ginoo, kini usa usab ka kasinatian nga ikaw nakigbahin sa uban. Hapit kanunay kita nag-ambit og dungan sa sakramento, isip usa ka lawas sa mga Santos. Basaha unsa ang gitudlo ni Pablo mahitungod sa sakramento, ug hunahunaa kon sa unsa nga paagi kining sagrado nga ordinansa makatabang og “daghan” nga mahimong “usa” diha ni Kristo (1 Mga Taga-Corinto 10:17). Sa unsa nga paagi nga ang pag-ambit sa sakramento nagtabang kanimo nga mobati og mas duol ngadto ni Kristo ug sa ubang mga tumutuo? Giunsa niini nga mga bersikulo pag-impluwensiya ang imong mga pagbati mahitungod sa sakramento ug sa paagi nga ikaw nag-andam alang niini?

1 Mga Taga-Corinto 11:11

Sa plano sa Dios, ang mga lalaki ug mga babaye nagkinahanglan sa usag usa.

Sa 1 Mga Taga-Corinto 11:4–15, gipasabot ni Pablo ang kultural nga mga nabatasan nga wala nato sunda karon. Hinoon, gitudlo usab ni Pablo ang usa ka importanting kamatuoran nga magamit sa kanhangtoran, makaplagan diha sa bersikulo 11. Sa imong hunahuna unsa ang gipasabot niini nga bersikulo, ug nganong kini importante? Si Elder David A. Bednar mitudlo, “Ang lalaki ug babaye gituyo aron magkat-on, maglig-on, mopanalangin, ug maghingpit sa usag usa” (“Kita Nagtuo sa Pagkaputli,” Liahona, Mayo 2013, 42). Sa unsang paagi kini nga kamatuoran kinahanglang mag-impluwensya sa kaminyoon? Sa unsa nga paagi kini kinahanglang mag-apekto sa paagi sa atong pagserbisyo diha sa Simbahan?

Tan-awa usab sa Jean B. Bingham, “Nagkahiusa sa Pagtuman sa Buhat sa Dios; Liahona, Mayo 2020, 60–63.

1 Mga Taga-Corinto 12–13

Gihatag ang espirituhanong mga gasa sa paghatag og kaayohan sa tanang anak sa Langitnong Amahan.

Ang lista sa espirituhanong mga gasa sa 1 Mga Taga-Corinto 12–13 dili kompleto. Apan maayo kini nga dapit sa pagsugod samtang imong ilhon ug palandungon ang espirituhanong mga gasa nga gihatag sa Langitnong Amahan kanimo. Ang artikulo nga “Spiritual Gifts” sa (topics.ChurchofJesusChrist.org) mahimong motabang kanimo sa pagsabot og mas maayo niini nga mga gasa. Samtang ikaw nagbasa sa mga lista ni Pablo sa mga gasa, mahimo kang modugang og pipila nga imong namatikdan diha sa uban, sa imong kaugalingon, o sa mga tawo diha sa mga kasulatan. Kon ikaw adunay patriyarkal nga panalangin, mahimong naghisgot kini sa imong pipila ka espirituhanong mga gasa. Giunsa niini nga mga gasa pagtabang kanimo sa pagpanalangin sa uban? Hunahunaa kon sa unsang paagi matinguha nimo “pag-ayo ang labi pa ka dagkong mga hiyas” (1 Mga Taga-Corinto 12:31).

Tan-awa usab sa 1 Mga Taga-Corinto 14; Moroni 10:8–21, 30; Doktrina ug mga Pakigsaad 46:8–26; Mga Artikulo sa Hugot nga Pagtuo 1:7.

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Home Evening

1 Mga Taga-Corinto 9:24–27.Tungod kay gitandi ni Pablo ang pagpuyo sa ebanghelyo ngadto sa lumba sa dagan, makahimo kamo og pamilya nga lumba sa dagan sa paghulagway sa iyang punto. Gantihi og korona ang tanan nga makahuman sa lumba, ug hisgoti kon giunsa sa tanan kinsa nagmakugihon sa pagsunod ni Jesukristo niini nga kinabuhi pagdaog sa “dili madunot” nga ganti (1 Mga Taga-Corinto 9:25; tan-awa usab sa 2 Timoteo 4:7–8). Unsa ang buhaton sa usa ka maglulumba sa dagan sa pag-andam alang sa usa ka lumba? Unsa ang atong mahimo sa pag-andam sa pagbalik ngadto sa Langitnong Amahan?

mga maglulumba sa dagan anaa sa dalan sa lumbaanan og dagan

Gitandi ni Pablo ang pagpuyo sa ebanghelyo ngadto sa lumba sa pagdagan.

1 Mga Taga-Corinto 12:1–11.Human mabasa og dungan kini nga mga bersikulo, hunahunaa ang paghatag sa tanan og piraso sa papel nga adunay pangalan sa laing sakop sa pamilya diha sa ibabaw. Hangyoa ang tanan sa paglista sa espirituhanong mga gasa nga ilang namatikdan nga anaa niana nga tawo. Dayon ikaw makapalibot sa mga papel hangtod ang tanan dihay higayon sa pagsulat mahitungod sa mga gasa sa matag sakop sa pamilya.

1 Mga Taga-Corinto 12:3.Ngano nga ang Espiritu Santo gikinahanglan sa pag-angkon og pagpamatuod kalabot ni Jesukristo? Unsay atong mahimo sa pagdapit sa Espiritu Santo sa paglig-on sa atong mga pagpamatuod Kaniya?

1 Mga Taga-Corinto 12:12–27.Ang pag-agid-agid ni Pablo sa usa ka lawas mahimong usa ka halandumon nga paagi sa paghisgot sa panaghiusa sa pamilya. Sama pananglit, ang mga sakop sa pamilya makasulay sa pagdrowing og lawas nga adunay mga mata o mga dunggan lamang (tan-awa sa bersikulo 17). Unsa ang gisugyot niini nga mga bersikulo mahitungod kon unsaon nato pagtagad ang usag usa isip mga sakop sa pamilya?

1 Mga Taga-Corinto 13:4–8.Ang katin-awan ni Pablo sa gugmang putli tingali mahimong makapadasig nga sanglitanan alang sa imong pamilya. Makapabuhat ka sa matag sakop sa pamilya sa pagtuon og usa ka hugpong sa mga pulong diha sa mga bersikulo 4–8 ug tudloan ang nahibilin sa pamilya kon unsa ang gipasabot gamit ang mga katin-awan, mga ehemplo, ug personal nga mga kasinatian. Sa unsa nga paagi nga ang Manluluwas usa ka ehemplo niini nga mga hiyas? Makadungan kamo sa paghimo og mga poster alang sa matag usa niini nga mga hugpong sa mga pulong ug ipakita kini sa tibuok ninyong balay. Pagmamugnaon!

Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga awit: “Ang Gugma Gipamulong Dinhi,” Songbook sa mga Bata, 75.

Pagpalambo sa Atong Pagtudlo

I-display ang usa ka kasulatan. I-display ang usa ka bersikulo nga imong nakita nga makahuluganon diha sa usa ka dapit diin ang mga sakop sa pamilya makakita niini sa kanunay. Dapita ang ubang mga sakop sa pamilya sa pagpuli-puli sa pagpili og kasulatan nga ipakita.

miting sa sakramento

“Ang pan nga atong gipikaspikas, dili ba kini ang pagpakig-ambit sa lawas ni Kristo? Sanglit usa man lamang ka buok ang pan, kita usab usa lamang ka lawas” (1 Mga Taga-Corinto 10:16–17).