“Agosto 21–27. 1 Mga Taga-Corinto 1–7: ‘Mausa Unta Hinoon Kamo,’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2023 (2022)
“Agosto 21–27. 1 Mga Taga-Corinto 1–7,” Dali, Sunod Kanako—Alang sa mga Indibidwal ug mga Pamilya: 2023
Corinth, Southern Greece, the Forum and Civic Center [Corinto, Habagatang Gresya, ang Forum ug Sentro nga Gambalay,, pinintal ni Balage Balogh Balogh/www.ArchaeologyIllustrated.com
Agosto 21–27
1 Mga Taga-Corinto 1–7
“Mausa Unta Hinoon Kamo”
I-rekord ang imong mga panghunahuna samtang ikaw magbasa sa 1 Mga Taga-Corinto 1–7. Kini nga mga panghunahuna mahimong maglakip sa mga pag-aghat sa pagtuon og dugang nga ideya, nga ipakigbahin ngadto sa uban sa mga butang nga imong nakat-onan, o sa paghimo og mga kausaban sa imong kinabuhi.
I-rekord ang Imong mga Panghunahuna
Sa mga bulan nga gigahin ni Pablo sa Corinto, “daghan sa mga taga-Corinto nga naminaw [kaniya] mituo, ug gibautismohan” (Mga Buhat 18:8). Busa nakapaguol tingali alang ni Pablo nga makadungog, pipila ka tuig lamang ang milabay, nga dihay “pagkabahinbahin” ug “panaglalisay” sa mga Santos sa Corinto ug nga sa iyang pagkawala misugod sila sa pagpatalinghog sa “kaalam nga iya sa kalib[o]tan” (1 Mga Taga-Corinto 1:10–11, 20). Agig tubag, gisulat ni Pablo ang sulat nga karon gitawag nato nga 1 Mga Taga-Corinto. Puno kini sa talagsaong doktrina, ug gani sa samang higayon, si Pablo ingon og nahigawad nga ang mga Santos dili andam sa pagdawat sa tanang doktrina nga iyang gusto nga ihatag ngadto kanila. “Ako, mga igsoon, dili makahimo sa pagsulti kaninyo ingon sa paagi sa pagsulti ko ngadto sa mga tawo nga espirituhanon,” nasubo siya, “sanglit kamo kalibutanon pa man gihapon” (1 Mga Taga-Corinto 3:1–3). Samtang kita mangandam sa pagbasa sa mga pulong ni Pablo, tingali makatabang ang pagsusi sa atong kaugalingong pagkaandam sa pagdawat sa kamatuoran—lakip sa atong pagkaandam sa pagpatalinghog sa Espiritu ug pagpaningkamot alang sa panaghiusa uban sa atong mga pamilya, uban sa atong isig ka Santos, ug uban sa Dios.
Mga Ideya alang sa Personal nga Pagtuon sa Kasulatan
1 Mga Taga-Corinto 1:10–17; 3:1–11
Ang mga miyembro sa Simbahan ni Kristo naningkamot nga magkahiusa.
Wala kita makahibalo sa tanang detalye mahitungod sa kakulang sa panaghiusa taliwala sa mga Santos nga taga-Corinto, apan nakahibalo kita mahitungod sa kakulang sa panaghiusa sa atong kaugalingong mga relasyon. Paghunahuna og usa ka relasyon sa imong kinabuhi nga makabenepisyo gikan sa dakong panaghiusa; dayon pangitaa unsa ang gitudlo ni Pablo diha sa 1 Mga Taga-Corinto 1:10–17; 3:1–11 mahitungod sa kakulang sa panaghiusa sa mga Santos nga taga-Corinto. Unsa nga mga panabot ang imong makuha mahitungod kon unsaon sa pagpalambo og dakong panaghiusa ngadto sa uban?
Tan-awa usab sa Mosiah 18:21; 4 Nephi 1:15–17; Doktrina ug mga Pakigsaad 38:23–27; 105:1–5; Gospel Topics, “Unity,” topics.ChurchofJesusChrist.org.
Aron sa pagtuman sa buhat sa Dios, nagkinahanglan ako sa kaalam sa Dios.
Samtang kini maayo—gani giawhag—sa pagpangita og kaalam bisan asa nato kini makaplagan (tan-awa sa 2 Nephi 9:29; Doktrina ug mga Pakigsaad 88:118), si Pablo mihatag og pipila ka bug-at og pinulongan nga mga pahimatngon mahitungod sa sayop nga kaalam sa tawo, nga iyang gitawag og “ang kaalam niini nga kalib[o]tan.” Samtang ikaw magbasa sa 1 Mga Taga-Corinto 1:17–25, palandonga unsa kaha ang gipasabot niini nga hugpong sa mga pulong. Unsa kaha ang gipasabot ni Pablo sa pinaagi sa “kaalam sa Dios”? Ngano nga nagkinahanglan kita sa kaalam sa Dios sa pagtuman sa buhat sa Dios?
Sa imong mga paningkamot sa pagtuman sa imong mga responsibilidad sa pagtuman sa buhat sa Dios, ikaw nakasinati na ba sa “kahadlok, ug … hilabihan nga pagkurog” nga gibati ni Pablo sa dihang mitudlo siya sa mga Santos nga taga-Corinto? (1 Taga-Corinto 2:3). Unsay imong nakita sa 1 Mga Taga-Corinto 2:1–5 nga nakahatag kanimo og kaisog? Hunahunaa unsaon nimo sa pagpakita nga ikaw misalig sa “gah[o]m sa Dios” labaw kay “sa kaalam sa mga tawo.”
Tan-awa usab sa Doktrina ug mga Pakigsaad 1:17–28.
Nagkinahanglan ako sa Espiritu Santo aron makasabot sa mga butang sa Dios.
Kon ikaw gusto nga makakat-on og dugang mahitungod sa usa ka butang sama sa mekanismo sa sakyanan o karaang arkitektura, unsaon nimo sa pagbuhat niini? Sumala sa 1 Mga Taga-Corinto 2:9–16, sa unsa nga paagi nga ang pagkat-on “sa mga butang sa Dios” lahi gikan sa pagkat-on sa “mga butang sa tawo”? Ngano nga kinahanglan gayod nga makabaton kita sa Espiritu Santo aron makasabot sa mga butang sa Dios? Human mabasa kini nga mga bersikulo, unsay imong gibati nga kinahanglan nimong buhaton aron mas hingpit nga masabtan ang espirituhanong mga butang? Sa unsa nga paagi nga ang mga pulong ni Pablo makatabang sa usa ka tawo kinsa nakigbisog sa iyang pagpamatuod?
Ang akong lawas sagrado.
Kadaghanan sa mga tawo sa Corinto mibati nga ang sekswal nga imoralidad madawat ug nga ang ilang mga lawas gihimo una sa tanan alang sa kalipay. Sa laing mga pulong, ang Corinto dili lahi gikan sa kalibotan karon. Unsa ang gitudlo ni Pablo sa 1 Mga Taga-Corinto 6:13–20 nga makatabang kanimo sa pagpasabot ngadto sa uban ngano nga ikaw gusto nga magpuyo og putli nga kinabuhi?
Gitudlo ba ni Pablo nga mas maayo ang dili magminyo kay sa magminyo?
Daghang mga bersikulo sa 1 Mga Taga-Corinto 7 ingon og nagsugyot nga samtang ang kaminyoon madawat, ang pagpabilin nga dili minyo ug hingpit nga maglikay gikan sa sekswal nga mga relasyon gipalabi. Hinoon, sa Hubad ni Joseph Smith, 1 Mga Taga-Corinto 7:29–33 (tan-awa sa Giya ngadto sa mga Kasulatan) nagtabang kanato sa pagsabot nga si Pablo mipasabot niadtong gitawag nga mahimong full-time nga mga misyonaryo, nag-obserbar nga sila makahimo sa pagserbisyo sa Dios og mas maayo kon sila magpabilin nga dili minyo sa panahon sa ilang mga misyon. Ang Ginoo nagtudlo pinaagi sa Iyang mga sulugoon, lakip ni Pablo, nga ang kaminyoon kabahin sa Iyang mahangturong plano ug gikinahanglan alang sa kahimayaan (tan-awa sa 1 Mga Taga-Corinto 11:11; Doktrina ug mga Pakigsaad 131:1–4).
Mga Ideya alang sa Pamilya nga Pagtuon sa Kasulatan ug Home Evening
-
1 Mga Taga-Corinto 1:10–17; 3:1–11.Samtang ang mga sakop sa imong pamilya magbasa niini nga mga bersikulo, dapita sila sa pagpangita og panabot nga makatabang kanila nga mas magkahiusa.
-
1 Mga Taga-Corinto 3:1–2.Tingali mahimo nimong basahon kini nga mga bersikulo samtang nag-inom og gatas ug nagkaon og karne. Mahimo kang makatandi sa mga paagi ang mga bata nagtubo ngadto sa pagkahamtong uban sa paagi kita nagtubo sa espirituhanong paagi.
-
1 Mga Taga-Corinto 3:4–9.Gitandi ni Pablo ang iyang misyonaryo nga mga paningkamot ngadto sa pagtanom og mga liso. Unsa ang gitudlo kanato niini nga pagtandi mahitungod sa pagpakigbahin sa ebanghelyo?
-
1 Mga Taga-Corinto 6:19–20.Ang pagtandi sa atong lawas ngadto sa mga templo, sama sa gihimo ni Pablo, mahimong epektibo nga paagi sa pagtudlo mahitungod sa kasagrado sa atong mga lawas. Tingali makapakita ka og mga hulagway sa mga templo, sama niadtong nag-uban niini nga latid. Ngano nga ang mga templo sagrado? Sa unsang paagi nga ang atong mga lawas sama sa mga templo? Unsay atong mahimo sa pagtagad sa atong mga lawas nga sama sa mga templo? (Tan-awa usab ang Agosto 2020 espesyal nga edisyon sa Liahona mahitungod sa sekswalidad.)
Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.
Gisugyot nga awit: “Ang Ginoo Naghatag Kanako og Templo,” Songbook sa mga Bata, 73.
Pagpalambo sa Personal nga Pagtuon
Pagmapailubon sa imong kaugalingon. Gitudlo ni Pablo nga ang gatas mag-una sa dili pa ang karne kon kita nagkat-on sa ebanghelyo (tan-awa sa 1 Mga Taga-Corinto 3:1–2). Kon imong makaplagan nga ang pipila ka doktrina lisod masabtan karon, pagmapailubon. Salig nga ang mga tubag moabot kon magbaton ka og hugot nga pagtuo ug magkugi sa pagtuon.
Gitandi ni Pablo ang atong lawas ngadto sa kasagrado sa templo. Gikan sa wala sa ibabaw nga bahin: Curitiba Brazil Temple, Mexico City Mexico Temple, Tokyo Japan Temple, Accra Ghana Temple.