“Agosto 14–20. Mga Taga-Roma 7–16: ‘Dag-a ang Dautan pinaagi sa Maayo’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2023 (2022)
“Agosto 14–20. Mga Taga-Roma 7–16,” Dali, Sunod Kanako—Alang sa mga Indibidwal ug mga Pamilya: 2023
Agosto 14–20
Mga Taga-Roma 7–16
“Dag-a ang Dautan pinaagi sa Maayo”
Pipila lamang ka mga baroganan sa ebanghelyo sa Mga Taga-Roma 7–16 mahimong ikaapil niini nga latid, busa ayaw limitahi ang imong kaugalingon sa unsay gihisgotan dinhi. Hatagi og pagtagad ang inspirasyon nga imong madawat samtang ikaw nagtuon.
I-rekord ang Imong mga Panghunahuna
Sa iyang pag-abli sa iyang sulat ngadto sa mga taga-Roma, si Pablo mihatag og katahoran sa mga miyembro sa Simbahan pinaagi sa pagtawag kanila “og hinigugma sa Dios” kinsa “gipanagtawag aron mahimong mga balaan.” Misulti siya nga ang ilang “hugot nga pagtuo [na]dungog man sa tibuok kalibotan” (Mga Taga Roma 1:7–8). Bisan og si Pablo migahin og daghang panahon sa pagkoreksyon sa mga bakak nga mga ideya ug sayop nga mga kinaiya, ingon og gusto usab siya nga mopasalig niining bag-ong mga kinabig nga Kristiyano nga sila tinuoray nga mga Santos kinsa hinigugma sa Dios. Ang iyang malumo nga tambag nagpanalangin kanatong tanan kinsa nakigbisog sa pagbati sa gugma sa Dios ug alang kang kinsa ang pagkahimong usa ka Santos mahimong mobati nga napahilayo. Uban sa mapainubsanon nga pagbati og kalooy, giila ni Pablo nga siya mibati usahay sama sa usa ka “alaot nga tawo” (Mga Taga-Roma 7:24), apan ang ebanghelyo ni Jesukristo mihatag kaniya og gahom sa pagbuntog sa sala (tan-awa sa Hubad ni Joseph Smith, Mga Taga-Roma 7:22–27 sa [Giya ngadto sa mga Kasulatan]). Uban niana nga gahom, ang matubsanong gahom sa Manluluwas, kita “makabuntog niana nga dautan”––ang dautan dinhi sa kalibotan ug ang dautan sa atong mga kaugalingon––“uban sa maayo” (Mga Taga-Roma 12:21).
Mga Ideya alang sa Personal nga Pagtuon sa Kasulatan
Kadto kinsa nagsunod sa Espiritu makahimo nga “masigkamanununod uban kang Kristo.”
Bisan human sa pagsulod ngadto sa “kabag-o sa kinabuhi” pinaagi sa ordinansa sa bunyag (Mga Taga-Roma 6:4), tingali imong nabati ang pipila ka pakigbisog sa kaugalingon nga gihulagway ni Pablo sa Mga Taga-Roma 7––ang “nagapakig-away” tali sa kinaiyanhon nga tawo ug sa imong matarong nga mga tinguha (Mga Taga-Roma 7:23). Apan si Pablo namulong kalabot sa paglaom diha sa Mga Taga-Roma 8:23–25. Unsa ang mga rason alang niini nga paglaom ang imong nakita sa kapitulo 8? Mahimo ka usab nga mangita sa mga panalangin nga moabot gikan sa pagbaton “sa Espiritu sa Dios nga nagapuyo diha sa sulod ninyo” (Mga Taga-Roma 8:9). Unsaon nimo pagtinguha ang pakig-uban sa Espiritu Santo nga mas hingpit diha sa imong kinabuhi?
Ang gasa sa mahangturong himaya mas dili katupngan kay sa akong mga pagsulay dinhi sa yuta.
Pipila lamang ka tuig human gisulat ni Pablo kini nga epistola, giantos sa mga Santos sa Roma ang makalilisang nga pagpanggukod. Unsay imong makaplagan sa Mga Taga-Roma 8:16–39 nga mahimong nagtabang niini nga mga Santos kon moabot ang pagpanggukod? Sa unsa nga paagi kini nga mga pulong magamit nimo ug sa mga pagsulay nga imong giatubang karon?
Pangita og mga koneksyon tali niini nga mga bersikulo ug niini nga tambag gikan ni Sister Linda S. Reeves: “Wala ako masayod nganong daghan kita og mga pagsulay, apan kini ang akong personal nga gibati nga ang ganti dako kaayo, hilabihan ka mahangturon ug walay kataposan, hilabihan ka malipayon ug lapas pa sa atong panabot nga nianang adlaw sa pagganti, atong bation nga moingon ngadto sa atong maloloy-on, mahigugmaong Amahan, ‘Kadto lang ba ang tanan nga gikinahanglan?’ Ako nagtuo nga kon kada adlaw mahinumdom ug maila nato ang kadako sa gugma sa atong Langitnong Amahan ug sa atong Manluluwas alang kanato, andam kitang mobuhat sa bisan unsa aron mahibalik og usab sa Ilang presensya, gilibutan sa Ilang gugma sa kahangturan. Unsay kapuslanan … sa atong giantos dinhi kon, sa kataposan, kadtong mga pagsulay mao gayod ang mga butang nga mopasarang kanato alang sa kinabuhing dayon ug kahimayaan didto sa gingharian sa Dios uban sa atong Amahan ug Manluluwas?” (“Angayan sa Gisaad Kanato nga mga Panalangin,” Liahona, Nob. 2015, 11). Paghukom kon unsa ang imong buhaton sa “inadlaw nga paghinumdom ug pag-ila” sa gugma sa Dios alang kanimo.
Unsa ang gipasabot ni Pablo sa “gikabut-an nang daan,” “gipili,” ug “giila nang daan”?
Gigamit ni Pablo ang mga pulong “gikabut-an nang daan,” “gipili,” ug “giila nang daan” sa pagtudlo nga sa wala pa kini nga kinabuhi, ang Dios mipili og pipila sa Iyang mga anak nga mahimong kabahin sa Israel, ang Iyang mga tawo sa pakigsaad. Kini mipasabot nga sila modawat og espesyal nga mga panalangin ug mga responsibilidad aron sila makapanalangin sa tanang mga katawhan sa kalibotan (tan-awa sa Giya ngadto sa mga Kasulatan, “Pagpili,” scriptures.ChurchofJesusChrist.org). Bisan pa niana, gihatagan og gibug-aton ni Pablo sa Mga Taga-Roma 9–11 nga tanang mga anak sa Dios makahimo nga Iyang mga katawhan sa pakigsaad, ug tanan kita makadawat og kinabuhing dayon sa samang paagi––pinaagi sa hugot nga pagtuo diha ni Jesukristo ug pagkamasulundon sa Iyang mga sugo.
Tan-awa usab sa Mga Taga-Efeso 1:3–4; 1 Pedro 1:2; Alma 13:1–5; “Foreordination,” topics.ChurchofJesusChrist.org.
Gidapit ako ni Pablo nga mahimong tinuod nga Santos ug sumusunod ni Jesukristo.
Ang kataposang lima ka kapitulo sa Mga Taga-Roma naglakip og dinosena nga piho nga mga panudlo mahitungod sa pagpuyo isip mga Santos. Usa ka paagi sa pagtuon niini nga mga panudlo mao ang pagpangita alang sa mga hisgotanan nga gibalik. Unsaon nimo sa pag-summarize ang tambag ni Pablo?
Mahimong dili ka makagamit sa tanan dayon niini nga tambag, apan ang Espiritu makatabang kanimo sa pagkakaplag og usa o duha ka baroganan nga ikaw makasugod sa pagbuhat karon. Ipaambit ang imong mga tinguha ngadto sa imong Langitnong Amahan pinaagi sa pag-ampo, ug pangayo sa Iyang tabang.
Mga Ideya alang sa Pamilya nga Pagtuon sa Kasulatan ug Home Evening
-
Mga Taga-Roma 8:31–39.Unsa ang atong makaplagan sa Mga Taga-Roma 8:31–39 nga nagtudlo kon sa unsang paagi ang Langitnong Amahan ug si Jesus mobati kanato? Kanus-a kita mibati sa gugma sa Dios?
Sa paghulagway sa mga bersikulo 38–39, ang mga sakop sa pamilya makakaplag og mga ehemplo sa mga butang nga, sama kanato ug sa gugma sa Dios, dili magkabulag.
Si Elder Wilford W. Andersen mitudlo, “Ang musika sa ebanghelyo mao ang [usa] ka malipayong espirituhanon nga pagbati.”
-
Mga Taga-Roma 8:31–32.Ang mensahe ni Elder Wilford W. Andersen sa “Ang Musika sa Ebanghelyo” (Liahona, Mayo 2015, 54–56; tan-awa usab ang video sa ChurchofJesusChrist.org) makatabang sa paghulagway unsa ang gitudlo ni Pablo mahitungod sa balaod, mga buhat, ug hugot nga pagtuo. Human maghisgot sa iyang pamulong, ang imong pamilya makasulay sa pagsayaw nga may musika o wala. Sa unsang paagi ang hugot nga pagtuo makatabang kanato sa pagsinati sa hingpit nga kalipay sa ebanghelyo?
-
Mga Taga-Roma 10:17.Sulati ang pipila ka mga baso sa tubig og mga tinubdan sa mga pulong sa Dios (sama sa mga kasulatan, personal nga pagpadayag, ug kinatibuk-ang komperensiya). Paghisgot kon sa unsang paagi ang pulong sa Dios makadugang sa atong hugot nga pagtuo samtang imong ibu-bu ang matag baso ngadto sa usa ka sudlanan nga gibutangan og ngalan “Hugot nga Pagtuo.”
-
Mga Taga-Roma 12.Unsa ang gipasabot sa paghimo sa atong kaugalingon nga “usa ka halad nga buhi, balaan, hinangponon sa Dios”? (bersikulo 1).
-
Mga Taga-Roma 14:13–21.Ang imong pamilya mahimong makakuha og kaayohan gikan sa pagtuon sa tambag ni Pablo mahitungod sa paghukom ug pakiglalis kabahin sa personal nga mga pagpili. Tingali ikaw makahimo sa paghisgot og angay nga mga paagi sa pagtubag kon ang ubang mga tawo, lakip ang mga sakop sa imong pamilya, maghimo og mga pagpili nga lahi sa imo. Sa unsang paagi nga atong “kab-uton ang makaamot sa pagdinaitay”? (bersikulo 19).
Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.
Gisugyot nga awit: “Gibati Ko ang Gugma sa Akong Manluluwas,” Songbook sa mga Bata, 30.
Pagpalambo sa Atong Pagtudlo
Tugoti ang mga bata nga mopahayag sa ilang pagkamamugnaon. “Kon imong dapiton ang mga bata sa pagmugna og usa ka butang nga may kalabutan ngadto sa usa ka baroganan sa ebanghelyo, imo silang gitabangan nga mas makasabot sa baroganan. … Tugoti sila sa paghimo, pagdrowing, pagkolor, pagsulat, ug pagmugna” (Pagtudlo sumala sa Pamaagi sa Manluluwas, 25).
Abide with Me [Ubani Ako], ni Del Parson