“Hulyo 31–Agosto 6. Mga Buhat 22–28: ‘Usa ka Tigpangalagad ug Usa ka Saksi,’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2023 (2022)

“Hulyo 31–Agosto 6. Mga Buhat 22–28,” Dali, Sunod Kanako—Alang sa mga Indibidwal ug sa mga Pamilya: 2023

Imahe

Pablo diha sa bilanggoan

Hulyo 31–Agosto 6

Mga Buhat 22–28

“Usa ka Tigpangalagad ug Usa ka Saksi”

Ang mga panghunahuna gikan sa Espiritu Santo sa kasagaran hilom ug usahay dali. Ang pagrekord sa imong mga panghunahuna nagtugot kanimo sa pagpamalandong niini og mas maayo. Samtang ikaw magbasa sa Mga Buhat 22–28, isulat ang mga hunahuna ug mga pagbati nga moabot kanimo ug paggahin og panahon sa pagpamalandong niini.

I-rekord ang Imong mga Panghunahuna

“Kon kita anaa sa buluhaton sa Ginoo,” misaad si Presidente Thomas S. Monson, “may katungod kita sa panabang sa Ginoo” (“Sa Pagkat-on, sa Pagbuhat, sa Pagkahimo,” Liahona, Nob. 2008, 62). Kita walay katungod, hinoon, sa kinabuhi nga walay pagsulay ug walay kataposang sunod-sunod nga mga kalamposan. Alang sa ebidensya niini, dili na kinahanglan nga mangita pa kita og lain kay ni Pablo ang Apostol. Ang iyang sugo gikan sa Manluluwas mao ang “pagdala sa akong ngalan sa atubangan sa mga Hentil, ug sa mga hari, ug sa mga anak sa Israel” (Mga Buhat 9:15). Sa mga kapitulo 22–28 sa Mga Buhat, makita nato si Pablo nga nagsunod niini nga sugo ug nag-atubang og dakong oposisyon—mga kadena, pagkabilanggo, pisikal nga pag-abuso, pagkalunod sa barko, ug gani pag-ataki sa usa ka bitin. Apan makita usab nato nga si Jesus “mitungha kaniya, ug miingon, Sumalig ka, Pablo” (Mga Buhat 23:11). Ang mga kasinatian ni Pablo makadasig nga pahinumdom nga ang tawag sa Ginoo sa “pagpahayag sa [Iyang] ebanghelyo uban sa tingog nga mahimayaon” moabot uban niini nga saad: “Ipataas ang inyong mga kasingkasing ug pagmaya, tungod kay ako anaa sa inyong taliwala” (Doktrina ug mga Pakigsaad 29:4–5; tan-awa usab sa Mateo 28:19–20).

Imahe

icon sa personal nga pagtuon

Mga Ideya alang sa Personal nga Pagtuon sa Kasulatan

Mga Buhat 22:1–21; 26:1–29

Mga disipulo ni Jesukristo nakigbahin sa ilang mga pagpamatuod sa maisugong paagi.

Sa dihang si Pablo mihatag sa gamhanang mga pagpamatuod nga narekord diha sa Mga Buhat 22 ug 26, gibilanggo siya sa Romano nga mga sundalo. Ang mga tawo nga iyang gipakigsultihan adunay gahom sa pagsilot kaniya ngadto sa kamatayon. Apan maisugon siyang mipili sa pagsaksi ni Jesukristo ug “sa langitnong panan-awon” (Mga Buhat 26:19) nga iyang nadawat. Unsay nakadasig kanimo mahitungod sa iyang mga pulong? Hunahunaa ang mga oportunidad nga ikaw aduna sa pagpakigbahin sa imong pagpamatuod. Sama pananglit, nahibalo ba ang imong mga higala kon unsay imong gibati mahitungod ni Jesukristo? O kanus-a ang kataposang higayon nga imong gisultihan ang imong pamilya kon sa unsa nga paagi nimo naangkon ang imong pagpamatuod sa ebanghelyo?

Sa dihang ang batan-ong Joseph Smith gibiaybiay tungod sa pagsulti mahitungod sa Iyang Unang Panan-awon, nadasig siya sa paagi nga mipamatuod si Pablo sa iyang panan-awon (tan-awa sa Joseph Smith––Kasaysayan 1:24–25). Unsaon nimo sa pag-summarize kon unsay nakat-onan ni Joseph Smith gikan ni Pablo? Unsa ang imong nakat-onan gikan niining duha ka saksi ni Jesukristo?

Tan-awa usab sa Neil L. Andersen, “Kita Naghisgot ni Kristo,” Liahona, Nob. 2020, 88–91.

Mga Buhat 23:10–11; 27:13–25, 40–44

Ang Ginoo nagtabang niadtong kinsa naningkamot sa pagserbisyo Kaniya.

Sama nga gipakita og tataw sa pangalagad ni Pablo, ang mga kalisod sa atong mga kinabuhi dili usa ka timailhan nga ang Dios nagsupak kanato o sa buhat nga atong gihimo. Sa tinuod, usahay kini sa panahon sa mga kalisod nga atong mabati ang Iyang labing lig-on nga suporta. Tingali makapaikag ang pagribyo unsay imong nabasa karong bag-o mahitungod sa pangalagad ni Pablo ug sa paglista sa pipila sa mga butang nga iyang gilahutay (tan-awa, pananglitan, Mga Buhat 14:19–20; 16:19–27; 21:31–34; 23:10–11; 27:13–25, 40–44). Giunsa sa Ginoo pagtabang kaniya? Giunsa ka Niya pagtabang?

Mga Buhat 24:24–27; 26:1–3, 24–29; 27

Adunay kaluwasan ug kalinaw diha sa pagsunod sa mga pulong sa mga sulugoon sa Dios.

Sa tibuok niyang pangalagad, si Pablo mihatag og gamhanang pagpamatuod kabahin ni Jesukristo ug sa Iyang ebanghelyo. Daghang mga tawo midawat sa iyang saksi, apan dili ang tanan. Samtang magbasa ka sa Mga Buhat 24:24–27 ug Mga Buhat 26:1–3, 24–29, pangitaa ang mga pulong ug mga hugpong sa mga pulong nga nagpakita kon giunsa sa mosunod nga Romano nga mga tigmando sa Judea pagsumbalik ngadto sa mga pagtulon-an ni Pablo:

Felix
Festo
Haring Agripa

Samtang naglayag padulong sa Roma aron husayon ni Cesar, nanagna si Pablo sa “kadaot ug dakong kapildihan” nga mahitabo sa barko ug sa mga pasahero niini (Mga Buhat 27:10). Basaha ang kapitulo 27 sa pagsusi kon unsay reaksyon sa mga kauban ni Pablo diha sa barko sa iyang mga pasidaan. Makakita ba ikaw og bisan unsa nga leksiyon alang sa imong kaugalingon niini nga kasinatian?

Aduna ka bay reaksyon sama ni bisan kinsa niini nga mga tawo sa dihang imong nadungog ang mga pagtulon-an sa mga lider sa Simbahan? Unsa ang pipila ka posibling mga sangputanan sa ingon niini nga reaksyon? Unsay imong nakat-onan gikan niini nga mga istorya mahitungod sa pagpatalinghog sa tambag sa Ginoo pinaagi sa Iyang mga sulugoon?

Tan-awa usab sa 2 Nephi 33:1–2; D. Todd Christofferson, “Ang Tingog sa Pagpasidaan,” Liahona, May 2017, 108–11; “Sunda ang Buhi nga Propeta,” Mga Pagtulun-an sa mga Presidente sa Simbahan: Ezra Taft Benson (2014), 175–86.

Imahe

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Home Evening

Mga Buhat 24:16.Sa wala pa ang iyang pagkakabig, si Pablo adunay taas nga kasaysayan sa sayop nga binuhatan ngadto sa Dios. Apan tungod kay siya andam nga maghinulsol, nakahimo siya sa pagsulti, “Tungod niini kanunay ko gayod nga ginasingkamotan ang paghupot sa walay sambol nga kaisipan ngadto sa Dios ug sa mga tawo” (tan-awa usab sa Doktrina ug Pakigsaad 135:4–5). Unsaon nato nga mawala sa atong konsensya ang sayop nga binuhatan ngadto sa Dios ug sa uban?

Mga Buhat 26:16–18.Niini nga mga bersikulo, unsa ang gitawag sa Ginoo nga ipabuhat ni Pablo? Unsa ang atong mga oportunidad sa pagbuhat sa samang mga butang?

Mga Buhat 28:1–9.Aduna bay usa sa imong pamilya nga ganahan og mga bitin? Mahimo nimong hangyoon kana nga tawo o laing sakop sa pamilya sa paghisgot sa istorya nga nakita sa Mga Buhat 28:1–9. Ang imong mga anak tingali malingaw sa pagdrowing og hulagway niini nga mga istorya o pagdrama niini. Unsa nga mga leksiyon ang atong makat-onan gikan niini nga mga istorya? Tingali ang usa ka leksiyon mao nga ang Ginoo nagtuman sa Iyang mga saad ngadto sa Iyang mga sulugoon. Pananglitan, mahimo nimong itandi ang mga saad nga gihimo sa Marcos 16:18 uban sa mga katumanan niini diha sa mga kasinatian ni Pablo. Makita usab nimo sa bag-ong pakigpulong sa kinatibuk-ang komperensiya ang usa ka saad nga gihimo sa usa sa mga sulugoon sa Ginoo—tingali kanang makahuluganon sa imong pamilya—ug ipakita kini diha sa imong panimalay. Unsaon nato sa pagpakita sa atong hugot nga pagtuo nga kini nga saad matuman?

Gipanalipdan sa Dios si Pablo sa dihang usa ka malala nga bitin mipaak kaniya.

Mga Buhat 28:22–24.Sama sa Simbahan sa panahon ni Pablo (gitawag nga “pundok” sa bersikulo 22), ang Simbahan karon kanunay nga “ginasupak bisan diin.” Kon ang mga tawo mosulti batok sa Manluluwas ug sa Iyang Simbahan, giunsa ni Pablo pagtubag? Unsa ang atong makat-onan gikan sa kasinatian ni Pablo?

Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga awit: “Buhi ang Akong Manunubos,” Mga Himno, nu. 79.

Pagpalambo sa Atong Pagtudlo

Tutoki ang mga baroganan nga mopanalangin sa imong mga pamilya. Samtang magtuon ka sa mga kasulatan, pangutan-a ang imong kaugalingon, “Unsay akong nakita dinhi nga mahimong ilabi ka makahuluganon ngadto sa akong pamilya?” (Tan-awa sa Pagtudlo sumala sa Pamaagi sa Manluluwas, 17.)