Agosto 7–13

Mga Taga-Roma 1–6

“Ang Gahom sa Dios alang sa Kaluwasan”

Ang pagrekord sa mga pag-aghat motabang kanimo sa paghinumdom unsa ang gitudlo sa Espiritu kanimo. Hunahunaa usab ang pagrekord kon unsay imong gibati mahitungod niini nga mga pag-aghat.

I-rekord ang Imong mga Panghunahuna

Sa dihang gisulat ni Pablo ang iyang epistola ngadto sa mga miyembro sa Simbahan sa Roma, kinsa nagkalainlain nga grupo sa mga Judeo ug mga Hentil, ang Simbahan ni Jesukristo mitubo pag-ayo gikan sa gamay nga pundok sa mga tumutuo gikan sa Galilea. Mga 20 ka tuig human sa Pagkabanhaw sa Manluluwas, dihay mga kongregasyon sa mga Kristiyano hapit bisan asa nga makabiyahe ang Apostoles—lakip sa Roma, ang ulohan sa gamhanan nga gingharian. Sa gihapon, kon itandi ang pagkalapad kaayo sa gingharian nga Romano, ang Simbahan gamay ug kasagaran ang tumong sa pagpanggukod. Sa mao nga sitwasyon, ang pipila tingali mibati nga “naulaw sa ebanghelyo ni Kristo”––apan, sa dayag, wala si Pablo maulaw. Nasayod siya ug mipamatuod sa tinuod nga gahom, “ang gahom sa Dios alang sa kaluwasan,” nga makaplagan diha sa ebanghelyo ni Jesukristo (Mga Taga-Roma 1:16).

Mga Ideya alang sa Personal nga Pagtuon sa Kasulatan

Unsa ang mga Epistola, ug giunsa kini sa paghan-ay?

Ang mga Epistola mga sulat sa mga lider sa Simbahan ngadto sa mga Santos sa lainlaing mga bahin sa kalibotan. Si Apostol Pablo misulat sa kadaghanan sa mga epistola diha sa Bag-ong Tugon—nagsugod sa Mga Taga-Roma ug nagtapos sa Mga Hebreohanon. Ang iyang mga epistola gihan-ay pinaagi sa gitas-on, gawas sa Mga Hebreohanon (tan-awa sa ang Giya ngadto sa mga Kasulatan, “Epistola ni Pablo, Mga”). Bisan og ang Mga Taga-Roma mao ang unang epistola diha sa Bag-ong Tugon, kini sa tinuod gisulat sa hapit na mahuman ang misyonaryo nga mga panaw ni Pablo.

Mga Taga-Roma 1–6

“Ang mga makiangayon magpakabuhi pinaagi sa hugot nga pagtuo.”

Ang mosunod nga mga pagpasabot mahimong motabang kanimo nga mas makasabot sa Epistola ngadto sa Mga Taga-Roma:

Ang balaod.Sa dihang si Pablo misulat “sa lagda,” siya nagpasabot sa mga kasugoan ni Moises. Ang pulong “mga buhat” sa mga sinulat ni Pablo nagpasabot ngadto sa makita nga mga lihok nga may kalabotan sa mga kasugoan ni Moises. Hunahunaa kon sa unsang paagi ang mga kasugoan ni Moises ug ang mga buhat nga gikinahanglan ubos niini lahi gikan sa “lagda sa pagtuo” nga gihulagway sa Mga Taga-Roma 3:23–31.

Sirkunsisyon, walay sirkunsisyon.Sa karaan, ang sirkunsisyon mao ang usa ka timailhan o simbolo sa pakigsaad sa Dios nga gihimo uban ni Abraham. Gigamit ni Pablo ang pulong nga “sirkunsisyon” sa pagpasabot ngadto sa mga Judeo (ang mga tawo sa pakigsaad) ug “walay sirkunsisyon” sa pagpasabot ngadto sa mga Hentil. Palandonga kon unsa ang gitudlo sa Mga Taga-Roma 2:25–29 mahitungod sa unsa gayod ang gipasabot nga mahimong tawo sa pakigsaad sa Dios. Timan-i nga ang sirkunsisyon dili na usa ka timaan sa pakigsaad sa Dios uban sa Iyang mga katawhan (tan-awa sa Mga Buhat 15:23–29).

Kapaangayan, paghatag og kaangayan, gihatagan og kaangayan.Kini nga mga pulong nagpasabot sa kapasayloan, o pagpasaylo, sa sala. Kon kita gihatagan og kaangayan, kita gipasaylo, gipadayag nga walay sala, ug gawasnon gikan sa mahangturong silot alang sa atong mga sala. Kon ikaw makakita niini nga mga pulong, tan-awa kon unsa ang gitudlo ni Pablo mahitungod kon unsay naghimo sa kapaangayan nga posible (tan-awa usab ang Giya ngadto sa mga Kasulatan, “Kapaangayan, Paghatag og kaangayan,” scriptures.ChurchofJesusChrist.org; D. Todd Christofferson, “Justification and Sanctification,” Ensign, June 2001, 18–25). Diha sa Mga Taga-Roma, ang mga pulong sama sa “matarong” ug “pagkamatarong” makita nga mga sama og kahulogan alang sa mga pulong nga “makiangayon” ug “kapaangayan.”

Grasya.Ang grasya “balaang … tabang o kalig-on, gihatag pinaagi sa buhong nga kalooy ug gugma ni Jesukristo.” Pinaagi sa grasya, ang tanang tawo mabanhaw ug makadawat og pagka-imortal. Agig dugang, “ang grasya mao ang makaabag nga gahom nga nagtugot sa mga lalaki ug mga babaye nga makaangkon og kinabuhing dayon ug kahimayaan human sila makahimo sa ilang labing maayo nga kaugalingong mga paningkamot.” Kita dili makaangkon og grasya pinaagi sa atong mga paningkamot; hinoon, ang grasya mao ang naghatag kanato og “kalig-on ug pagtabang sa paghimo og maayong mga buhat nga [kita] sa laing paagi dili makahimo sa pagpadayon” (Bible Dictionary, “Grace”; tan-awa usab sa 2 Nephi 25:23; Dieter F. Uchtdorf, “Ang Gasa sa Grasya,” Liahona, Mayo 2015, 107–10; Brad Wilcox, “Ang Iyang Grasya Paigo,” Liahona, Sept. 2013, 43–45). Samtang ikaw magbasa sa Mga Taga-Roma, i-rekord unsay imong nakat-onan mahitungod sa grasya sa Manluluwas.

Mga Taga-Roma 2:17–29

Ang akong mga lihok kinahanglan nga magpakita ug magdugang sa akong pagkakabig.

Pipila sa mga Kristiyano nga Judeo sa Roma sa dayag nagtuo gihapon nga ang mga seremonya ug mga ritwal sa mga kasugoan ni Moises midala og kaluwasan. Ingon og kini usa ka problema nga dili na magamit tungod kay wala na kita magpuyo sa balaod ni Moises. Apan samtang imong basahon ang mga sinulat ni Pablo, ilabi na sa Mga Taga-Roma 2:17–29, hunahunaa ang imong kaugalingong mga paningkamot sa pagpuyo sa ebanghelyo. Ang imong dayag nga mga tulumanon, sama sa pag-ambit sa sakramento o pagtambong sa templo, nagpatubo ba sa imong pagkakabig ug nagpalig-on sa imong hugot nga pagtuo diha ni Kristo? (tan-awa sa Alma 25:15–16). Aduna bay butang nga kinahanglan nimong usbon aron ang imong makita nga mga lihok naggiya ngadto sa kausaban sa kasingkasing?

Mga Taga-Roma 3:10–31; 5

Pinaagi ni Jesukristo, ako mapasaylo sa akong mga sala.

Ang pipila sa mga tawo mahimong mobati nga nawad-an og paglaom sa maisog nga pahayag ni Pablo nga “walay matarong, wala, bisan usa” (Mga Taga-Roma 3:10). Apan usab adunay malaumon nga mga mensahe diha sa Mga Taga-Roma. Pangitaa kini sa mga kapitulo 3 ug 5, ug hunahunaa kon ngano nga ang paghinumdom nga “sanglit nakasala man ang tanan ug nakabsan sa himaya sa Dios” (Mga Taga-Roma 3:23) usa ka importante nga lakang ngadto sa pagkat-on nga “nagakalipay sa paglaom” pinaagi ni Jesukristo (Mga Taga-Roma 5:2).

Mga Taga-Roma 6

Ang ebanghelyo ni Jesukristo nagdapit kanako nga “managgawi diha sa kabag-o sa kinabuhi.”

Gitudlo ni Pablo nga ang ebanghelyo ni Jesukristo kinahanglang mousab sa paagi sa atong pagpakabuhi. Unsa nga mga pahayag diha sa Mga Taga-Roma 6 ang naghulagway kon unsaon ang pagsunod sa Manluluwas pagtabang kanimo nga “managgawi diha sa kabag-o sa kinabuhi?” (bersikulo 4).

Mga Ideya alang sa Pamilya nga Pagtuon sa Kasulatan ug Home Evening

Mga Taga-Roma 1:16–17.Unsaon nato sa pagpakita nga “wala igakaulaw ang maayong balita ni Kristo”?

Mga Taga-Roma 3:23–28.Samtang ikaw nagbasa niini nga mga bersikulo, mahimo nimong hisgotan ang kalainan tali sa “bayad” sa grasya sa Dios, nga dili gayod nato mahimo, ug ang pagdawat niini, nga kinahanglan gayod nga atong buhaton. Kanus-a nato natagamtam ang grasya sa Dios? Unsaon nato pagdawat niini sa mas hingpit nga paagi?

Mga Taga-Roma 5:3–5.Unsa nga mga kalisdanan ang atong nasinati? Sa unsa nga paagi kini nga mga kalisdanan mitabang kanato sa pagpalambo og pailob, kasinatian, ug paglaom?

Mga Taga-Roma 6:3–6.Unsa ang gisulti ni Pablo niini nga mga bersikulo mahitungod sa mga simbolo sa bunyag? Tingali ang imong pamilya makaplano sa pagtambong og umaabot nga bunyag. O usa sa imong pamilya mahimong makigbahin og mga litrato o mga handumanan gikan sa iyang bunyag. Sa unsa nga paagi nga ang paghimo ug pagtuman sa atong mga pakigsaad sa bunyag makatabang kanato nga “managgawi diha sa kabag-o sa kinabuhi”?

Ang bunyag nagsimbolo sa sinugdanan sa usa ka bag-o nga kinabuhi isip usa ka disipulo ni Kristo.

Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga awit: “Kon Ako Bunyagan” Songbook sa mga Bata, 53.

Pagpalambo sa Personal nga Pagtuon

Pangutana samtang ikaw nagtuon. Samtang magtuon ka sa mga kasulatan, tingali adunay mosulod nga mga pangutana diha sa hunahuna. Palandonga kini nga mga pangutana ug pangitaa ang mga tubag. Pananglitan, sa Mga Taga-Roma 1–6 makapangita ka og mga tubag sa pangutana “Unsa ang grasya?”

Be Not Afraid [Ayaw Kahadlok], ni Greg K. Olsen