Ang Iyang Grasya Paigo
Gikan sa usa pakigpulong sa debosyonal sa Brigham Young University nga gihatag niadtong Hulyo 12, 2011. Alang sa kompleto nga teksto sa Iningles, bisitaha ang speeches.byu.edu.
Sa unsang paagi nga molihok ang grasya sa Dios?
Usa ka batan-ong babaye miduol nako ug nangutana kon mahimo ba ming mag-istoryahanay. Ako miingon, “Siyempre. Unsay akong matabang nimo?”
Siya miingon, “Wala ko kasabut sa grasya.”
Ako mitubag, “Unsay wala nimo masabtan niini?”
Siya miingon, “Nasayud ko nga kinahanglan nakong buhaton akong pinakamaayo, ug dayon si Jesus mobuhat sa kulang, apan dili gani nako mabuhat akong pinakamaayo.”
Ako miingon, “Ang tinuod, si Jesus hingpit nga gibayaran atong sala. Wala niya kini bayari sa pipila lang ka sinsilyo. Gibayaran niya tanan. Nahuman na.”
Siya miingon, “Sakto! Sama nga ako wala nay buhaton?”
“Ah, dili,” miingon ko, “daghan pa ka og buhatunon, apan dili kini sa pagbayad niana nga sala. Kitang tanan mabanhaw. Kita mobalik ngadto sa presensya sa Dios aron pagahukman. Ang atong pagkamasulundon modeteminar kon unsa kita kakomportable nga maanaa sa presensya sa Dios ug unsa nga ang-ang sa kahimayaan ang plano natong angkunon.”
Si Kristo naghangyo kanato sa pagpakita og hugot nga pagtuo diha Kaniya, paghinulsol, paghimo ug pagtuman sa mga pakigsaad, pagdawat sa Espiritu Santo, ug paglahutay sa kahangturan. Sa pagsunod niini, kita wala nagbayad sa sukna sa kaangayan—bisan gani sa kinagamyan nga bahin. Hinoon, kita nagpakita og pagdayeg sa gihimo ni Jesukristo pinaagi sa pagpakabuhi sama sa Iyaha. Ang kaangayan nanginahanglan diha-diha dayon sa kahingpitan o silot kon kita mapakyas. Tungod kay gibayaran na ni Jesus ang silot, Siya makatanyag kanato og kahigayunan sa kahingpitan (tan-awa sa Mateo 5:48; 3 Nephi 12:48) ug motabang nato sa pagkab-ut nianang tumong. Siya makapasaylo nga dili mahimo sa kaangayan, ug Siya mihatag kanato karon sa Iyang mga kinahanglanon [requirements] (tan-awa sa 3 Nephi 28:35).
Ang Grasya Makapausab Kanato
Ang sabut ni Kristo ngari kanato susama sa usa ka inahan nga nagsangkap og mga leksyon sa musika para sa iyang anak. Gibayaran sa inahan ang magtutudlo sa piano. Tungod kay gibayran sa inahan ang tanang balayrunon, siya makaduol sa iyang anak ug makapangayo og usa ka butang. Unsa kini? Pagpraktis! Ang pagpraktis ba sa bata makabayad sa magtutudlo sa piano? Dili. Ang pagpraktis ba sa anak makabayad sa inahan sa iyang pagbayad sa magtutudlo sa piano? Dili. Ang pagpraktis mao ang paagi nga maipakita sa anak ang iyang pagdayeg sa talagsaong regalo sa inahan. Kini mao ang paagi nga iyang pahimuslan ang talagsaong oportunidad nga gihatag sa iyang Inahan aron magpakabuhi sa mas taas nga lebel. Ang kalipay sa inahan dili makita nga mabayaran siya apan makakita siya nga gigamit sa anak ang iyang gasa—nagtan-aw sa iyang anak nga naglambo. Busa nagpadayon siya sa paghangyo nga magpraktis kanunay.
Kon makita sa anak nga ang kinahanglanon sa inahan sa pagpraktis sobra ra kaayo (“Oy, Ma, nganong kinahanglan pa ko nga magpraktis? Walay usa sa mga bata kinahanglan nga magpraktis! Magpropesyonal baseball player man gihapon ko!”), tingali kay wala niya kini makita sama sa nakita sa iyang inahan. Wala niya makita kon unsa ka mas maayo ang kinabuhi kon siya mopili nga magpakabuhi sa mas taas nga sumbanan.
Sa samang paagi, tungod kay si Jesus mibayad sa kaangayan, Siya karon makaduol kanato ug moingon: “Sumunod kamo kanako” (Mateo 4:19); “Pagatumanon ang akong mga sugo” (Juan 14:15). Kon atong makita ang Iyang kinahanglanon nga sobra ra kaayo, tingali wala nato kini makita pinaagi sa Iyang mga mata. Kita wala pa makasabut kon unsa Iyang gusto nga kita mamahimo.
Si Elder Dallin H. Oaks sa Korum sa Napulog Duha ka mga Apostoles miingon, “Ang mahinulsulong makasasala kinahanglang mag-antus sa iyang mga sala, apan kini nga pag-antus adunay laing katuyoan kay sa silot o bayad. Ang katuyoan niini mao ang kausaban” (The Lord’s Way [1991], 223; emphasis sa orihinal). Ato kining isusama sa bata nga piyanista: Ang bata kinahanglang magpraktis sa pag-piano, apan kini nga praktis adunay laing katuyoan kay sa silot o bayad. Ang katuyoan niini mao ang kausaban.
Ang milagro sa Pag-ula dili lang nga kita mabuhi human kita mamatay apan kita mabuhi nga mas mabungahon (tan-awa sa Juan 10:10). Ang milagro sa Pag-ula dili lang nga kita malimpyuhan ug mahupay apan kita mausab (tan-awa sa Mga Taga-Roma 8). Giklaro diha sa kasulatan nga walay mahugaw nga butang mahimong mopuyo uban sa Dios (tan-awa sa Alma 40:26), apan walay butang nga wala mausab ang gusto niini.
Ang milagro sa Pag-ula dili lang nga kita makabalik sa atong Langitnong Amahan kondili—sa milagrosong paagi—mobati kita nga komportable didto. Kon ang Langitnong Amahan ug ang Iyang Anak wala kinahanglana ang hugot nga pagtuo ug paghinulsol, nan wala nay tinguha nga mausab. Hunahunaa ang inyong mga higala ug mga sakop sa pamilya kinsa mipili sa pagpakabuhi nga walay hugot nga pagtuo ug dili maghinulsol. Dili sila gusto nga mausab. Wala sila maningkamot sa pagsalikway sa sala ug mahimong komportable uban sa Dios. Hinoon, naningkamot sila sa pagbiya sa Dios ug mahimong komportable sa sala. Kon ang Amahan ug ang Anak wala kinahanglana ang mga pakigsaad ug gitugyan ang gasa sa Espiritu Santo, nan wala nay paagi nga mausab. Kita aduna na lay kabubut-on hangtud sa hangtud, walay access sa Iyang gahum. Kon ang Langitnong Amahan ug ang Iyang Anak wala magkinahanglan sa paglahutay hangtud sa katapusan, nan dili na gayud masabtan ang mga kausaban. Kini hangtud sa hangtud kutob na lang ni sa panit ug pangpagwapa imbis nga modulot kanato ug mahimong kabahin nato—kabahin kon si kinsa kita. Sa yano nga pagkasulti, kon si Jesus wala magkinahanglan og praktis, nan kita dili gayud mahimong mga Santos.
Detalye gikan sa Si Kristo ug ang Dato nga Batan-ong Magmamando, ni Heinrich Hofman, sa maayong kabubut-on sa C. Harrison Conroy Co.
Ang Grasya Makatabang Nato
“Apan nakaamgo ba mo kon unsa ka lisud nga magpraktis? Dili ko maayo nga mag-piano. Daghang sayop nga mga nota akong matugtog. Dugay pa kaayo nga makamao ko.” Karon hulat sa. Dili ba kining tanan kabahin sa proseso sa pagkat-on? Kon ang usa ka batan-ong piyanista sayop og tugtog sa nota, dili kita makaingon nga dili na siya angay nga magpadayon sa pagpraktis. Dili kita magdahum nga siya dili masayop. Kita magdahum lang nga siya padayon nga magpraktis. Ang kahingpitan mao ang iyang katapusang tumong, apan sa pagkakaron kita mahimong kontento sa iyang kalamboan diha sa saktong direksyon. Ngano man nga kining panglantaw sayon kaayo nga makita diha sa konteksto sa pagkat-on og piano apan lisud kaayo nga makita diha sa konteksto sa pagkat-on kabahin sa langit?
Daghan kaayo ang mibiya sa Simbahan tungod kay sila gikapoy nga kanunayng mibati nga dili sila angay. Sila naningkamot sa una, apan sila padayong mibati nga dili angay. Wala nila masabti ang grasya.
Dili gyud angay nga duha lang ang mga opsyon: mahingpit o mobiya. Sa pagkat-on sa pagtugtog sa piano, ang opsyon lang ba kay mopasundayag sa Carnegie Hall o moundang? Dili. Ang pagtubo ug paglambo nanginahanglan og panahon. Ang pagkat-on naginahanglan og panahon. Kon kita makasabut sa grasya, kita makasabut nga ang Dios mainantuson, nga ang kausaban usa ka proseso, ug ang paghinulsol sumbanan sa atong mga kinabuhi. Kon kita nakasabut sa grasya, kita nakasabut nga ang mga panalangin sa Pag-ula ni Kristo makanunayon ug ang Iyang kalig-on hingpit diha sa atong mga kahuyang (tan-awa sa 2 Mga Taga-Corinto 12:9). Kon kita nakasabut sa grasya, kita mahimo, sama sa giingon sa Doktrina ug mga Pakigsaad, “padayon diha sa pagpailub hangtud [kita] mahingpit” (D&P 67:13).
Ang grasya dili usa ka booster engine nga magamit lang kon hapit na mahurot ang gasolina. Hinoon, kini mao ang atong tinubdan sa makanunayon nga kusog. Dili kini mao ang kahayag sa katapusan sa tunnel apan ang kahayag nga naggiya kanato diha sa tunnel. Ang grasya dili lang madawat sa umaabut. Kini madawat dinhi ug karon.
Ang Grasya Paigo
Ang grasya ni Kristo paigo (tan-awa sa Ether 12:27; D&P 17:8)—paigo aron sa pagbayad sa atong sala, paigo nga mausab kita, ug paigo sa pagtabang nato samtang nagpadayon ang kausaban. Ang Basahon ni Mormon nagtudlo kanato nga mosalig lang “sa maayo nga buhat, kalooy, ug grasya sa Balaang Mesiyas” (2 Nephi 2:8). Samtang ato kining buhaton, kita wala magdiskobre—sama sa pagtuo sa ubang mga Kristiyano—nga si Kristo walay gikinahanglan nato. Hinoon, atong madiskubrihan ang rason nga Siya nanginahanglan og maayo ug kalig-on nga buhaton ang tanan nga Iyang gisugo (tan-awa sa Mga Taga-Filipos 4:13). Ang grasya wala magpasabut nga walay dakong gipaabut ang Dios kanato. Ang grasya mao ang pagkaanaa sa gahum sa Dios (tan-awa sa Lucas 1:37).
Ang grasya sa Dios paigo. Ang grasya ni Jesukristo paigo. Kini paigo gayud. Kini mao ang atong gikinahanglan. Ayaw paghunong. Padayon sa pagpaningkamot. Ayaw pangita og mga kaeskapohan ug pasangil. Salig sa Ginoo ug sa Iyang hingpit nga kalig-on. Ayaw pangita og tawo nga basulon. Pangitaa ang tawo nga makatabang nimo. Pangitaa si Kristo, ug, samtang inyo kining buhaton, kamo mobati sa makapahimo nga gahum ug balaanong tabang nga atong gitawag og Iyang katingalahan nga grasya.
Detalye gikan sa Si Kristo sa Getsemani, ni Heinrich Hofmann, sa maayong kabubut-on sa C. Harrison Conroy Co.; sa background © Thinkstock/iStockphoto