Ang Pag-ampo sa Akong Kasingkasing
Ang tagsulat nagpuyo sa Metro Manila, Philippines.
Ang pagpataas sa akong mga sumbanan sa musika nga akong gipaminaw nakatabang nako nga mas makagusto pa niini.
Ganahan ko og musika, ug ang akong adlaw dili kompleto hangtud maminaw ako niini o magkanta. Dili pa dugay, mas naganahan pa gyud ko sa musika sa laing paagi, ug ako nakakat-on sa mga butang nga nakapausab sa akong paghunahuna ug paggamit sa musika.
Nagsugod kini sa dihang akong gibasa ang mga kasulatan diin ang Ginoo miingon, “Kay ang akong kalag mahimuot sa awit sa kasingkasing; oo, ang awit sa mga matarung mao ang pag-ampo ngari kanako, ug pagatubagon uban sa usa ka panalangin diha sa ilang mga ulo” (D&P 25:12). Sa dihang nabasa nako kana nga bersikulo, akong nahinumduman ang usa ka butang nga gitudlo sa akong mama kanako. Kausa, sa dihang ako nagkanta og mga himno sa dili angay nga paagi, siya mipahinumdom nako nga ang mga himno mga pag-ampo ug nga kinahanglan nga tarungon nako sa pagkanta. Sa akong hunahuna kini nga bersikulo nagpasabut dili lamang sa mga himno apan sa bisan unsang mga kanta usab nga atong kantahon uban sa matarung nga tinguha. Hunahunaa ang mga panalangin nga moabut ngari nato, sama sa giingon sa kasulatan, kon kita manganta og mga awit ngadto sa Ginoo.
Nakat-unan usab nako ang kaimportante sa pagpaminaw og maayo nga musika. Human mabasa kini nga kasulatan, akong gisugdan sa pagtan-aw ang akong listahan sa mga kanta ug gi-delete kadtong dili mosuporta sa mga pagtulun-an sa Alang sa Kalig-on sa Kabatan-onan.
Sa wala madugay kinahanglan kong mohimo og mga desisyon sa musika nga wala sa akong kaugalingong koleksyon. Usa ka adlaw niana sa dihang didto ko sa eskwelahan, usa ka kauban nako nagsugod sa pagtukar og dili maayo nga kanta. Dili maayo ang akong gibati sa maong kanta, mao nga mihangyo ko niya nga ilisdan kini, nga iyang gihimo. Nasayud ko nga ang matag usa nato makabaton og samang kaisug niadto nga mga sitwasyon. Ug usahay kon ang mga tawo dili moilis sa musika alang nato, kita aduna pay laing mga opsyon: makaadto kita og laing lugar.
Nasayud ko nga pinaagi sa maayong musika kita mas makapaduol sa atong Langitnong Amahan. Ang musika makalamdag nato, makadasig nato, makadapit sa Espiritu Santo nga mouban nato, moagni nato sa matarung nga mga binuhatan, ug motabang nato sa pagbuntog sa mga tintasyon sa kaaway (tan-awa sa Alang sa Kalig-on sa Kabatan-onan [booklet, 2011], 22–23).
Hinumdumi nga kon kita manganta sa awit sa mga matarung, kita sa tinud-anay nag-ampo ngadto sa atong Amahan sa Langit.