Nagpabiling Hagit nga Tawag

Ni Richard M. Romney

Mga Magasin sa Simbahan

Ang mga propeta ug apostoles mideklarar nga “Ang Pamilya: Usa ka Pamahayag ngadto sa Kalibutan” mas mahinungdanon karon kaysa una kining giisyu.

Sa kalibutan diin ang kaminyoon anaa sa kakuyaw ug giatake ang tradisyonal nga pamilya, usa ka pihong dokumento ang naghatag og kaklaro ug paggiya. Ang mga propeta ug mga apostoles miingon nga “Ang Pamilya: Usa ka Pamahayag ngadto sa Kalibutan” mas magamit karon kaysa dihang giisyu kini niadtong 1995.¹

Usa ka Modernong Bandila sa Kalingkawasan

Ang pamahayag kabahin sa pamilya nagpabiling “hagit nga tawag sa pagpanalipod ug paglig-on sa mga pamilya,” sumala ni Elder M. Russell Ballard sa Korum sa Napulog Duha ka mga Apostoles.²

Ang atong kalibutan susama sa nagkagun-ob nga katilingban sa Nephite diha sa Basahon ni Mormon, ug si Elder Ballard nag-awhag sa mga Santos sa Ulahing mga Adlaw “sa paghimo [sa pamahayag] nga bandera nga susama sa kang Heneral Moroni nga ‘titulo sa kalingkawasan,’ ug sa pagpasalig sa atong kaugalingon sa pagsunod sa lagda niini.”³

Mahinungdanon sa Kalipay

Ang kalibutan nag-awhag og lain-laing dalan sa kalipay. Apan ang mga propeta karon mipahayag nga ang dakong posibilidad sa kalipay anaa sa celestial nga kaminyoon.⁴

Kon kita magpakabuhi ug mosunod sa atong kahibalo nga ang mga pamilya mahimong mahangturon, si Elder Ballard misaad nga “makadani kita sa kalibutan ngari kanato. Ang mga ginikanan nga naghatag og taas nga prayoridad sa ilang mga pamilya madani ngadto sa Simbahan. …

“Ang atong panan-awon nga sentro sa pamilya makapahimo sa mga Santos sa Ulahing mga Adlaw sa pagpaninguha nga mahimong pinakamaayo nga mga ginikanan sa kalibutan. Kini mohatag gyud nato og dako kaayong respeto sa atong mga anak nga sa tinuoray atong espirituhanong igsoon, ug kini makapahimo kanato nga mohatag bisan unsang panahon nga gikinahanglan aron paglig-on sa atong pamilya. Sa tinuoray, wala gyuy mas importante nga sumpay sa kalipay—sa atong kaugalingon ug sa atong mga anak—kaysa giunsa nato paghigugma ug pagsuporta sa usag usa diha sa pamilya.”⁵

Kalig-on nga Sobra pa sa Anaa Kaninyo

Si Elder Ballard nagtambag sa mga pamilya bisan asa sa pag-angkon og kopya sa pamahayag ug sa pagsunod sa mga pagtulun-an niini.

“Magmahimong pinakamaayo ug buhata ang inyong pinakamaayo kutob sa mahimo. Ang Dios mohatag kaninyo sa kalig-on nga sobra pa kon unsay anaa kaninyo samtang maningkamot kamo kada adlaw sa pagtuman sa pinakasagrado nga mortal nga responsibilidad nga Iyang gihatag sa Iyang mga anak. Paminaw sa tingog sa Espiritu ug sa tambag sa buhing mga propeta. Pagmaya. Ang Dios wala mobutang kaninyo dinhi sa yuta aron mapakyas, ug ang inyong mga paningkamot isip mga ginikanan dili pagaisipon nga pakyas gawas kon mohunong kamo.”⁶

Paglaum alang sa Kinabuhing Dayon

Ang pamahayag sa pamilya nagtudlo nga ang pamilya makalahutay hangtud sa kahangturan. Si Elder Russell M. Nelson sa Korum sa Napulog Duha ka mga Apostoles nagtudlo nga “samtang ang kaluwasan maoy usa ka indibidwal nga butang, ang kahimayaan usa ka pamilya nga butang. … Kon ang usa ka pamilya nabugkos diha sa templo, kana nga pamilya mahimo nga ingon ka mahangturon sama mismo sa gingharian sa Dios.”⁷

Si Presidente Henry B. Eyring, Unang Magtatambag sa Unang Kapangulohan, mipasabut nga ang atong pamilya “mahinungdanon dili lang sa katilingban ug sa Simbahan apan usab sa atong paglaum alang sa kinabuhing dayon.”⁸

Nag-una nga Pasidaan

Si Presidente Eyring mipasidaan nga ang mga sangputanan sa pagbaliwala sa mga pagtulun-an diha sa pamahayag sa pamilya “mas grabe pa kaysa yanong pagkakulang og kalinaw niining kinabuhi o pagkawalay kalipay.”⁹

Kini nga pamahayag mapanagnaon, siya miingon, kay kini nagpasidaan sa tanang mga butang nga nakapahuyang sa mga pamilya sa bag-ohayng katuigan. Siya nagkutlo sa mga propetikanhong pasidaan ug panawagan nga sundon diin gitapos ang pamahayag:

“Kami mopahimangno nga ang tagsa-tagsa kinsa makalapas sa mga pakigsaad sa kaputli, kinsa moabuso sa ilang kapikas o mga anak, o kinsa mapakyas sa pagtuman sa mga kapangakohan sa pamilya moabut ang adlaw nga mobarug nga adunay tulubagon sa atubangan sa Dios. Dugang pa, kami mopahimangno nga ang pagkabungkag sa pamilya makadala sa tagsa-tagsa, sa komunidad, ug sa nasud sa mga katalagman nga gipanagna sa karaan ug sa bag-o nga mga propeta.”¹⁰

Usa ka Internasyonal nga Dokumento

Sa dihang si Presidente Gordon B. Hinckley (1910–2008) mipaila sa pamahayag sa pamilya sa kinatibuk-ang miting sa Relief Society niadtong Septyembre 23, 1995, siya miingon nga ang katuyoan niini mao ang “pagpahimangno ug pagpasidaan”¹¹ sa kalibutan batok sa dili pagsunod sa mga baruganan niini. Sukad niadto, ang dokumento gimantala sa daghang pinulongan, balik-balik nga gihisgutan sa kinatibuk-ang komperensya, ug gi-display sa mga meetinghouse ug panimalay sa tibuok kalibutan. Kini propetikanhon nga pamahayag nga giandam sa mahigugmaong Langitnong Amahan sa paggiya sa Iyang mga anak—giya nga gikinahanglan kaayo karon.