Mga Ideya sa Family Home Evening
Kini nga isyu naglangkob og mga artikulo ug mga kalihokan nga mahimong magamit alang sa family home evening. Ang mosunod mao ang duha ka mga ehemplo.
“Unsa man ang Mahinungdanon Kaayo sa Dako ug Lapad nga Gambalay?” pahina 48: Basaha ang artikulo uban sa inyong pamilya. Ikonsiderar ang pagpangutana kanila kon nakasulay na ba sila nga mibati og kaulaw sa pagsunod sa mga sumbanan sa Simbahan; mahimo ninyong ipakigbahin ang higayon nga kamo mibati niana ug unsay inyong nakat-unan. Hisguti ang kalainan nga kamo dili makabuhat sa usa ka butang ug sa kamo dili mobuhat sa usa ka butang. Ang inyong pamilya makasunod niining scripture chain aron sa pagkat-on og dugang kon sa unsang paagi ang kabubut-on mohaum sa plano sa Dios: Moises 4:1–4; 2 Nephi 2:14–16, 22–27; Josue 24:15; Mosiah 2:41; Doktrina ug mga Pakigsaad 82:10; 130:20–21. Mahimo ninyong kantahon ang “Choose the Right [Pilia ang Matarung]” (Hymns, nu. 243) o lain nga himno mahitungod sa pagpili og maayo.
“Pagsulat Niini nga Husto,” pahina 64, ug “Ako Mipili sa Matarung,” pahina 71: Ikonsiderar sa pagpakigbahin kon sa unsang paagi sila si Cara ug Ekene sa istorya nakakita og mga pamaagi sa pagbarug sa kamatuoran. Mahimo ninyong hisgutan unsa ang gipasabut nga “mobarug ingon nga mga saksi sa Dios” (Mosiah 18:9). Pag-brainstorm og mga paagi sa pagpakigbahin sa inyong pagpamatuod ug paghimo og plano sa pagbuhat niini niining semanaha. Alang sa usa ka kalihokan, ang inyong pamilya mahimong mobasa o moribyu og mga istorya sa kasulatan diin ang usa ka tawo mibarug isip usa ka saksi sa Dios; dayon i-drama-drama ninyo ang mga karakter niini nga istorya. Pipila sa mga ideya alang sa mga istorya naglakip nila ni Daniel ug sa iyang mga higala nga nagdumili sa pagkaon sa makadaut nga mga pagkaon (Daniel 1), si Stephen nga nagpamatuod ni Jesukristo (Mga Buhat 6–7), ug si Nephi nga nag-awhag sa iyang mga igsoon sa pagkuha sa mga palid (1 Nephi 3–4).
Sa Inyong Pinulongan
Ang Liahona ug ubang mga materyal sa Simbahan anaa sa daghang pinulongan sa languages.lds.org.
Gilitratohan ni Cody Bell