Walay Paglubad nga mga Istorya sa Ebanghelyo
Unsay Kahulugan ni Jesus alang Kanato Karon?
Si Elder David B. Haight naordinahan isip Apostol niadtong Enero 8, 1976, ug miserbisyo niana nga korum hangtud sa iyang kamatayon niadtong 2004. Isip Assistant sa Konseho sa Napulog Duha, gihatag niya kini nga pakigpulong sa kinatibuk-ang komperensya niadtong Abril 6, 1974. Alang sa kompleto nga teksto sa Iningles, tan-awa sa Mayo 1974 nga Ensign sa LDS.org.
Ang Jesus nga akong nasayran ug gituohan mao si Jesus ang Kristo, ang Anak sa Dios. Kini nga pagsaksi gipadayag ngari kanako pinaagi sa panalangin ug impluwensya sa Espiritu Santo. Ako nasayud nga Siya … ang Tiglalang sa kalibutan ug sa tanan nga anaa niini, nga Siya mao ang atong Manluluwas kinsa nahigugma kanatong tanan ug namatay sa krus alang kanato, kinsa nagtudlo kanato og kalooy ug pagpasaylo, ang higala sa tanan, mananambal sa masakiton, ang tighatag sa kalinaw ngadto sa tanang maminaw ug motuo.
Ang moderno nga tawo kinahanglan dili gayud malayo sa mga kamatuoran sa karaan ug sa ulahing mga adlaw—mga kamatuoran ug espirituhanong mga kasinatian nga nahitabo sa dihang ang mga propeta naglakaw ug nakig-istorya ni Jesus. Unsa ang kahulugan ni Jesus ngadto sa karaang mga apostoles? Unsa Siya para kang Pedro?
Ang moderno nga tawo kinahanglan dili gayud malayo sa mga kamatuoran sa karaan ug sa ulahing mga adlaw—mga kamatuoran ug espirituhanong mga kasinatian nga nahitabo sa dihang ang mga propeta naglakaw ug nakig-istorya ni Jesus.
Sa Paghandum Kanako, ni Walter Rane
Si Marcos, nagsulat sa mga panghitabo sa buntag sa Pagkabanhaw, namahayag nga si Maria Magdalena ug Maria ang inahan ni Santiago gigiyahan sa [duha ka anghel] nga ilang nakita samtang sila misulod sa lubnganan, “Lumakaw kamo … suginli ninyo ang iyang mga tinun-an ug si Pedro” (Marcos 16:7). Gisugo sila ilabi na sa pagpahibalo ni Pedro. Si Pedro ug Juan nagdali-dali sa pag-adto sa lubnganan. Misulod si Pedro, nakakita sa limpyong pagkapilo nga panaptong sinina ug panyo. Si Pedro usa ka personal nga saksi niining talagsaon nga panghitabo.
Sa adlaw sa Pentecostes, si Pedro … misangyaw sa mahimayaon nga ebanghelyo ug mipamatuod ni Jesus nga Nazaretnon. Natandog ang kasingkasing sa mga tawo ug nangutana, “Mga igsoon, unsa may among pagabuhaton?” (Mga Buhat 2:37). Ug si Pedro, uban sa bag-ong napalambo nga konbiksyon, mitubag, “Paghinulsol kamo, ug pabautismo kamo ang matag usa kaninyo sa ngalan ni Jesukristo tungod sa kapasayloan sa inyong mga sala, ug madawat ninyo ang gasa sa Espiritu Santo” (Mga Buhat 2:38). Tulo ka libo nga mga kalag ang mituo ug gibunyagan. Mibati sila sa espiritu ug gahum sa senior nga Apostol sa Ginoo. Magduhaduha pa ba gyud kita unsa ka kamahinungdanon si Jesus ngadto ni Pedro?
Kanunay kong mapalig-on sa kahugot sa konbiksyon ni Juan. Wala gayuy pagduha-duha. Siya mipamatuod: “Sa sinugdanan mao na ang Pulong, ug ang Pulong uban sa Dios, ug Dios ang Pulong. … Ang tanang mga butang nangahimo pinaagi kaniya. … Diha kaniya ang kinabuhi; ug ang maong kinabuhi mao ang kahayag alang sa mga tawo. Ug ang kahayag nagadan-ag taliwala sa kangitngitan; ug ang kangitngitan wala makabuntog kaniya” (Juan 1:1, 3–5). …
Kita mahimong dili makasabut kon unsa kamahuluganon si Jesus ngadto kang Nephi sa dihang ang nabanhaw nga Kristo mipakita sa kasadpang kontinente, nag-ingon, “Tan-awa, Ako mao si Jesukristo, kinsa gipamatud-an sa mga propeta nga moanhi sa kalibutan.” …
Dayon si Nephi misulat, “Ang pundok sa mga katawhan miduol ngadto kaniya, ug mihikap pinaagi sa ilang mga kamot ngadto sa iyang kilid, ug mibati sa mga agi sa mga lansang sa iyang mga kamot ug sa iyang mga tiil” (3 Nephi 11:10, 15). … Sila naa na sa Iyang presensya, ug sila makapamatuod.
Unsa ang kahulugan ni Jesus ngadto sa batang Joseph Smith? Ang pagpakita sa Dios nga Amahan ug ni Jesukristo ngadto sa batang propeta sa modernong panahon gihulagway sa iyang mismo nga mga pulong: “Ako nakakita og usa ka dako nga gilis sa kahayag ibabaw gayud sa akong ulo, labaw sa kahayag sa adlaw. … Sa diha nga ang kahayag midapat kanako ako nakakita og duha ka Personahe, kansang kahayag ug himaya dili mahulagway, nagtindog ibabaw kanako diha sa kawanangan. Usa kanila misulti ngari kanako, nagtawag kanako sa akong ngalan ug miingon, nagtudlo ngadto sa lain—Kini mao ang Akong Hinigugmang Anak. Paminaw Kaniya!” (Joseph Smith—Kasaysayan 1:16–17).
Ang espiritwal nga kahibalo ug espiritwal nga mga kasinatian kinahanglang dili gayud makalimtan sa moderno nga tawo, tungod kay ang mga pagpamatuod sa mga propeta sa karaan ug karon narekord na alang sa kaayohan sa tawo, ug karon ang mga tumutuo nagpamatuod niining mga kamatuoran. Kinahanglang pulihan sa moderno nga tawo ang mga walay kasiguradoan ug pagduhaduha uban sa tinguha nga mas masayud pa ni Jesus.
Kini mao ang atong responsibilidad ug nindot kaayong oportunidad sa pagpamatuod kanunay ni Jesus ang Kristo. Kinahanglan gayud kita mopamatuod ngadto sa kalibutan sa Iyang pagka-dios, ang katinuod sa Iyang pagkatawo diha sa unod sa balaanon ug mortal nga mga ginikanan. Siya gipili sa pagpahigayon sa mahinungdanong misyon sa Pagpahiuli ug sa Katubsanan. Iya kining gibuhat—Siya gilansang sa krus ug nabanhaw gikan sa lubnganan, nga nakapaposible sa tanang tawo nga mabanhaw pinaagi sa talagsaong Pag-ula ni Jesus, ma-santos man o makasasala.
Ang tanan mahimong maanaa sa dalan padulong sa mahangturong pag-uswag. Ang tanan nga modawat Kaniya ug mahinulsulon makadawat og kapasayloan sa nangaging mga sala ug kahigayunan nga maangkon ang kahimayaan. “Ako mao ang dalan, ug ang kamatuoran, ug ang kinabuhi: walay bisan kinsa nga makaadto sa Amahan, gawas kon pinaagi kanako” (Juan 14:6). Ang tawo posible bang makahunahuna og mas maayong konsepto para sa kapaingnan sa tawo? Si Jesukristo mao ang pinakamahinungdanon.
Sa pangutana “Unsa ang kahulugan ni Jesus ngadto sa moderno nga tawo?” Ako mopamatuod nga Siya makahuluganon kaayo.