Unsa man ang Mahinungdanon Kaayo sa Dako ug Lapad nga Gambalay?
Ang tagsulat nagpuyo sa Utah, USA.
Kon ang kalibutan mosulti kaninyo nga ang ilang pamaagi mas maayo, pagmaisugon sa pagbarug ug pagsunod sa mga kamatuoran sa ebanghelyo.
Mga paghulagway pinaagi ni Steve Kropp
Si Abby naghinam-hinam nga moadto sa prom apan nangandoy nga ang iyang bag-ong sinina pareho unta sa isul-ob sa iyang mga amiga. Nagtuo siya nga ang iyang mga amiga mas maanyag ug mas uso tan-awon sa ilang sleeveless nga mga sinina kay sa iyang ligdong nga sinina, ug nabalaka nga mamatikdan siya nga lahi.
Si Nate nakig-uban sa iyang mga higala usa ka gabii sa dihang usa sa iyang kauban mipagawas og mga beer ug mihatag sa tanan. Sa dihang si Nate nagdumili sa una, miingon, “Dili ko,” ang iyang mga higala nagsugod sa pagkatawa ug pagbugal-bugal niya.Dili gusto si Nate nga ang iyang mga higala magtuo nga dili siya sosyal, mao nga iyang gihunahuna nga moinom lang og gamay nga beer aron lang mohunong ang iyang mga higala sa pagkatawa kaniya.
Pamilyar ba kini nga mga sitwasyon? Sama ni Abby ug Nate, matag usa nato moabut sa panahon sa atong kinabuhi diin lain-laing mga pagpili ang atong giatubang sama sa mga dalan. Niining malisud ug importante nga panahon sa pagdesisyon, usahay mahadlok kita sa pagbarug sa unsay atong gituohan tungod kay mahadlok kita nga mamatikdan nga lahi.
Nakasinati gayud sila si Abby ug Nate og pipila sa mga kalisud nga gihulagway diha sa panan-awon ni Lehi sa kahoy sa kinabuhi. Niana nga panan-awon, makat-unan nato nga ang duha ka importanting mga rason ngano nga ang mga tawo mobiya sa higpit ug pig-ot nga dalan mao nga sila nabutahan sa pagpangamay sa tintasyon (tan-awa sa 1 Nephi 8:23; 12:17) ug nga sila naulaw sa pagbiay-biay gikan niadtong anaa sa dako ug lapad nga gambalay (tan-awa sa 1 Nephi 8:26–28). Atong susihon kining duha ka mga bahin sa panan-awon ni Lehi aron kita dili lamang makasabut niini apan usab makakat-on gikan niini nga makakaplag og kalig-on sa pagbarug ug pagbuhat sa matarung.
Maglakaw Niini nga Pamaagi
Ang problema sa mga tintasyon sa kalibutan mao nga kini makatintal kaayo, dili ba? Sama sa gisulti ni Presidente Spencer W. Kimball (1895–1985): “Kinsay miingon nga ang sala dili makalingaw?… Ang sala madanihon. … Ang sala sayon ug makahatag og daghang makalingaw nga mga higala.”1
Bisan dili kita ganahan moangkon niini, daghan niadto nga mga dalan sa kasagaran madanihon. Ang ubang mga dalan kalit nga moliko sa makahinam nga direksyon, samtang ang uban malinglahon nga mokurbada nga sa makadiyot ingon og kini nagsubay sa dalan sa ebanghelyo. Ang ubang dalan padulong sa kabantug.Ang uban gidayandayanan og bulawan ug mga alahas.
Ang pagkamadanihon sa dako ug lapad nga gambalay susama kaayo.Human sa tanan, ang ubang pinakadato, pinakainila, pinakamadanihon, ug pinakagamhanan nga mga tawo sa kalibutan nagpuyo dinhi! Kinsa ang dili gusto nga makig-uban, maglihok, ug magsinina sama niadtong mga tawhana? Sa kasagaran sila makita nga adunay mas maayo nga panahon kay kanato kinsa naningkamot nga magpabilin sa dalan sa ebanghelyo.
Sama sa atong higala, nga si Abby, kon hatagan nato og dakong pagtagad ang mga residente sa dako ug lapad nga gambalay, mas mobati kita og kasina o gani kasuko. Maghunahuna kita nga dili makiangayon nga sila dunay daghang nindot nga mga butang samtang kita naningkamot nga magpabilin sa dalan padulong sa kahoy sa kinabuhi.
Si Satanas nakahibalo nga ang usa sa labing maayong paagi nga ang mga tawo makabiya sa dalan sa ebanghelyo mao ang paglingla nila sa pagtuo nga lisud kaayo, dili makalingaw, o kinaraan nga magpabilin sa dalan. Dili siya magsapayan unsa nga dalan ang atong subayon—bisan unsa nga dalan—basta dili ang dalan sa ebanghelyo.
“Unsa May Lami sa Bunga?”
Ang pagbiay-biay sa matinud-anon usa ka paborito nga kalihokan diha sa dako ug lapad nga gambalay. Si Presidente Thomas S. Monson miingon, “Nagkadaghan, ang inilang mga tawo ug uban pa … anaa makita sa publiko, adunay kalagmitan nga mobiay-biay sa relihiyon sa kinatibuk-an ug, usahay, sa Simbahan mismo. Kon ang atong mga pagpamatuod dili igo nga nakagamot, ang maong mga pagtamay modala nato sa pagduha-duha bahin sa atong kaugalingong gituohan o makapahuyang sa atong determinasyon.”2
Ingon og bisan asa kita mopaingon sa kinabuhi, bisan personal o sa internet, adunay abli nga bintana sa dako ug lapad nga gambalay sa duol nga dunay tawo nga andam nga motulisok ug mokatawa sa mga butang nga atong gihatagan og bili. Nakasinati tingali kitang tanan niini nga pagbiay-biay, ug mahimong sakit kini kaayo. Nasayud kita nga kinahanglan kitang motubag sa Kristohanon nga paagi, apan dili kini kanunayng sayon. Walay tawo nga gustong kataw-anan o biaybiayon ang mga pagtuo. Sama ni Nate, tingali kita usahay motubag sama sa “dili ko—Mormon ko,” nga makadungog sa uban nga mas mikatawa pa og kusog.
“Dili ko …”
Namatikdan ba ninyo kon unsa nga paagi mo-focus ang mga mabiaybiayon sa pulong dili? Sama sa, “Nganong dili man ka makainom niana?” “Nganong dili kamo mouban nako nga mamalit kon Dominggo?” o “Nganong dili kamo makahilawas sa dili pa kamo maminyo?”
Kini nga pag-focus sa pulong dili makapabati nato nga walay mahimo. Daw mabati nato nga kita huyang ug walay kaisug. Daw mabati nato nga kita mga biktima nga walay mahimo sa dili mahigalaong Dios kinsa nagdili nato aron kita dili malingaw.
Kini nga taktika karaaan na kaayo. Gani, si Satanas naggamit na niini sukad pa sa sinugdanan. Sa dihang ang Dios mibutang kang Adan ug Eva sa Tanaman sa Eden, Siya miingon kanila, “Sa matag kahoy sa tanaman ikaw mahimo nga gawasnon nga mokaon” (Moises 3:16). Ang mga pulong ba nga “matag kahoy” ingon og pagpugong kaninyo? Samtang ang Dios misulti kang Adan ug Eva nga adunay piho nga mga sangputanan sa pagkaon sa kahoy sa kahibalo sa maayo ug dautan, wala gayud Siya magpugong nila sa pisikal. Anaa nila ang tibuok tanaman ug giingnan, “Ikaw mahimo nga makapili alang sa imong kaugalingon, kay kini gihatag nganha kanimo” (Moises 3:17). Morag kagawasan kana ngari nako!
Mao nga sa dihang si Satanas miabut siya miingon, “Oo, ang Dios ba miingon—Ikaw dili mokaon sa matag kahoy sa tanaman?” (Moises 4:7). Sa pagkatinuod, si Satanas nangutana, “Nganong dili kamo makakaon sa bunga niana nga kahoy?” sa sama nga mabiay-biayon nga tuno nga gikan sa mga bintana sa dako ug lapad nga gambalay. Si Satanas nag-focus sa usa ka butang nga gilakipan sa Dios og mga sangputanan, ug gihimo niya nga ingon og gidid-an sa Dios si Adan ug Eva. Si Satanas mituis sa mga pulong sa Dios, nagdugang og bakak sa paningkamot sa pagkombinser nila sa pagsunod kaniya kay sa Dios. Sa katapusan, ang pagkaon sa bunga kabahin sa plano. Ug ang Dios mihatag og Manluluwas aron paghatag og kahigayunan ni Adan ug Eva ug sa tanan nilang mga anak nga motubo ug makapauli.
“Dili Gyud Ko!”
Ug unsa man gayuy atong gisulti kon kita moingon, “dili ko—Mormon ko”? Nagsulti ba kita, “gusto unta ko, ug kon dili pa ko Mormon, himoon gayud nako”? Kausa ako dunay higala kinsa mangomedya sa tanang butang nga iyang gustong buhaton kon dili pa lang unta siya miyembro sa Simbahan. Ang problema lang, dili ako makasulti kanunay kon nangomedya ba siya.
Kay sa mag-focus sa dili makahimo ug dili mohimo, mas maayo alang nato kon mogamit kita sa pulong dili gyud. Sama sa, “dili gyud ko—Mormon ko.” Ang paggamit sa dili gyud imbis dili makahimo makausab sa focus sa mga pulong ug nagpakita nga kita gihatagan og gahum sa pagpili alang sa atong kaugalingon. Pinaagi sa pag-ingon “Dili gyud ko”, kita nag-ingon, “ako nagpili nga dili mobuhat niana, dili tungod kay ako usa ka buta nga sumusunod o tungod kay ako gipugngan, apan tungod kay ako nagtuo sa kabubut-on ug pagkamay-tulubagon, ug ako gusto mobuhat unsay matarung. Ako nagpili sa paglihok ug dili pagaaghaton” (tan-awa sa 2 Nephi 2:14, 26).
Ang paggamit sa “dili gyud ko” imbis sa “dili ko makahimo” usa usab ka talagsaong buhat sa kaisug. Wala magkinahanglan og kaisug sa pagsunod sa mga pundok sa mga tawo subay sa nagkalain-laing mga dalan sa kalibutan. Si bisan kinsa makahimo niana. Ang pagbarug alang sa kamatuoran nagpakita sa tinuod nga pagtuo. Ang pagbarug batok sa kalibutan nagkinahanglan og tinuod nga kaisug. Nagpakita kini nga tinud-anay kitang naggamit sa atong kabubut-on ug naghunahuna gayud sa atong mga kaugalingon. Ang mga tawo diha sa dako ug lapad nga gambalay kanunay gipasabut nga pundok sa mga tawo nga walay ngalan, manggugubot nga panon sa mga tawo nga walay nawong. Sa katapusan, ang ilang mga pulong haw-ang ug walay kahulugan. Pinaagi sa matinud-anong paggamit sa atong kabubut-on, makakaplag kita og kaisug sa pagsulti, sama sa gibuhat ni Lehi ug sa maisugon ug matinud-anong mga miyembro sa iyang pamilya, “Kami wala maminaw kanila” (1 Nephi 8:33).
Taliwala sa nagkagrabe nga kadautan sa kalibutan, kadtong mobarug ug molakaw sa dalan sa ebanghelyo sa tinuod makabarug. Apan sila wala mag-inusara. Si Presidente Thomas S. Monson midapit kanato, “Hinaut nga magmaisugon kita ug andam sa pagbarug sa unsay atong gituohan, ug kon kinahanglan kitang magbarug nga mag-inusara diha sa proseso, hinaut magmaisugon gayud kita sa pagbuhat, gilig-on sa kahibalo nga sa pagkatinuod wala kita mag-inusara kon magbarug uban sa atong Amahan sa Langit.”3