Sama kang Kristo nga Kalooy
Ang tagsulat nagpuyo sa New York, USA.
Ang mortal nga pangalagad sa Manluluwas naghatag kanato sa praktikal nga mga ehemplo kon sa unsang paagi kita mahimong maloloy-on.
Sa dihang nawala ni Propeta Joseph Smith ug ni Martin Harris ang 116 ka hinubad nga mga pahina sa Basahon ni Mormon, nasuko kaayo ang Ginoo sa ilaha (tan-awa sa D&P 3:6–8, 12–13). Sa mubong higayon nawad-an og kahigayunan si Joseph sa paghubad ug nagmasulub-on sa iyang pagkadilimasulundon.1 Human nagpaubos sa iyang kaugalingon ug nangamuyo sa Ginoo alang sa kapasayloan, ang Manluluwas misiguro ni Joseph, “Hinumdumi, ang Ginoo maloloy-on; … ug ikaw sa gihapon pinili, ug ikaw gitawag pag-usab ngadto sa buhat” (D&P 3:10).
Si Presidente Dieter F. Uchtdorf, Ikaduhang Magtatambag sa Unang kapangulohan, mitudlo: “Si Kristo ang atong ehemplo. Sa Iyang mga pagtulun-an [sa kalooy] sama sa Iyang kinabuhi, gipakita Niya kanato ang dalan. Gipasaylo Niya ang dautan, ang bulgar, ug kadtong nagtinguha sa pagpasakit ug paghimo og dautan Kaniya.”2
Ang mga kasulatan nagpakita nga ang kamanggiloy-on mao ang usa sa langitnon nga mga kinaiya sa Manluluwas. Si Jesus mitudlo, “Bulahan ang mga maloloy-on” (Mateo 5:7), ug “Magmaloloy-on kamo, maingon nga maloloy-on man ang inyong Amahan” (Lucas 6:36).3 Ang kalooy naglakip sa mga pagbati ug mga buhat sa simpatiya, pagkamabination, pagpasaylo, ug gugma. Ang atong kapasidad sa kalooy kasagaran mogawas kon makakita kita sa dili sagad ug makaguol nga mga kahimtang sa uban. Gipakita ni Kristo ang walay kinutuban nga kapasidad sa kalooy. Siya “dili makahimo nga masud-ong sa nawong sa tawo nga wala masakiti sa ilang pagduha-duha, ilang kalibug, ug ilang kalisdanan. … Kon siya makakita sa mga tawo nga naluya ug nahisalaag sa kalibutan sama sa karnero nga walay magbalantay, siya malooy kanila.”4
“Kon [ang Manluluwas] makakita sa mga tawo nga naluya ug nahisalaag sa kalibutan sama sa karnero nga walay magbalantay, siya malooy kanila.”
Ang Nawala nga Karnero, ni Newell Convers Wyeth, gipakopyahan og usab uban sa pagtugot sa Colby College Museum of Art
Ang mosunod nga mga baruganan gikan sa mga asoy sa Bag-ong Tugon naghulagway sa unsang paagi nga ang Manluluwas nagmanggiloy-on ug sa unsang paagi kita mopili nga magmanggiloy-on sa uban.
Si Jesus nagmanggiloy-on pinaagi sa dili pagbasol sa uban.
Sa Katapusang Panihapon, mga oras sa wala pa ang pagbudhi, si Judas Iscariote mikaon sa panihapon sa Pagpalabay uban sa mga disipulo. Sa dihang gipahibalo ni Jesus, “Usa kaninyo magabudhi kanako,” ang mga disipulo, lakip ni Judas, nangutana Kaniya, “Ako ba?” (Mateo 26:21–22). Si Jesus mitubag ni Judas, “Ang imong pagabuhaton, buhata sa madali” (Juan 13:27). Dayon sa agianan pasulod sa Tanaman sa Getsemani, si Jesus ug Judas nagkita pag-usab. Si Judas miingon, “Magtutudlo, kumusta ka?” ug gisugat ang Manluluwas uban sa usa ka halok (Mateo 26:49), diin si Jesus nangutana, “Inubanan ba diayg halok ang imong pagbudhi sa Anak sa tawo?” (Lucas 22:48). Ang tubag ni Jesus, samtang wala makapawala sa mga sangputanan sa gibuhat ni Judas, wala magbasol kaniya apan mitandog sa balatian ni Judas sa husto ug sayop.
Human naagwanta ni Jesus ang pagkabilanggo, paglatigo, pagbunal, paglakaw diha sa siyudad, ug pagdala ug pagpalansang sa krus diha sa mga kamot sa mga sundalo nga taga-Roma, Siya maloloy-ong mitan-aw sa mga nagdakop Kaniya ug nangamuyo, “Amahan, pasayloa sila; kay wala sila makasabut sa ilang ginabuhat” (Lucas 23:34).
Si Jesus nagmanggiloy-on pinaagi sa pagpili nga mohigugma kay sa mopanghimaraut.
Sayo sa Iyang pangalagad, si Jesus mihunong aron sa pagpahulay ug pag-inom og tubig sa atabay sa Samaria atol sa usa sa Iyang panaw. Usa ka babaye miduol sa atabay aron sa pagkalos og tubig, ug ang Manluluwas nakig-istorya kaniya. Ang babaye nahibulong nga Siya nakig-istorya kaniya, “kay ang mga Judeo ugod wala [may] pakigharong sa mga Samarianhon.” Apan wala Niya panumbalinga ang mga tradisyon nga nakapaubos sa bili sa babaye sa mga mata sa uban. Siya mitudlo kaniya mahitungod sa buhi nga tubig sa ebanghelyo, ug Siya mipamatuod ngadto kaniya, “Ako nga nakigsulti kanimo mao [ang Mesiyas].” (Tan-awa sa Juan 4:3–39.)
Atol sa katapusang mga adlaw sa pagpangalagad Niya sa Perea, si Jesus miagi sa siyudad sa Jerico sa Iyang pagpadulong sa Jerusalem. Usa ka mubo, adunahang lalaki nga ginganlan og Zaqueo mikat-kat sa kahoy aron makakita sa Manluluwas samtang Siya moagi. Si Jesus nakamatikod kaniya ug miingon nga Siya moadto sa balay ni Zaqueo. Pipila sa mga disipulo ni Jesus mireklamo sa dihang ila kining nakita, nag-ingon nga si Jesus “misulod siya sa pag-abut diha sa balay sa usa ka tawong makasasala.” Apan nakita ni Jesus ang kamaayo ni Zaqueo ug miingon, “Niining adlawa karon, ang kaluwasan nahiabut niining balaya, sanglit siya usab anak man ni Abraham.” (Tan-wa sa Lucas 19:1–10).
Si Jesus nagmanggiloy-on pinaagi sa paghatag sa uban og daghang mga oportunidad sa paghinulsol ug mapasaylo.
Sayo sa Iyang pangalagad, si Jesus mibalik sa sinagoga sa Iyang lungsod nga natawhan diha sa siyudad sa Nazaret, diin Siya kadaghan nga misimba. Iyang gibasa niadtong nagpundok para sa Igpapahulay ang usa ka panagna gikan ni Isaias kabahin sa Mesiyas. Siya dayon yanong mipamatuod ngadto kanila nga Siya mao ang Mesiyas. Ang mga tawo diha sa sinagoga “nangasuko sa hilabihan gayud” sa Iyang mga pulong, ug ilang “giabog siya paingon sa gawas sa lungsod … aron ilang ihulog siya” sa pangpang. (Tan-awa sa Lucas 4:16–30.) Ang dugay na nga mga higala ni Jesus nahimong Iyang mga kaaway. Wala madugay, si Jesus miadto sa Nazaret pag-usab ug mitudlo sa mga tawo. Ug bisan tuod sila nasilo Kaniya, Siya kaduha naningkamot sa pagpasabut kanila. (Tan-awa sa Mateo 13:54–57.)
Ang mga lider sa mga Judeo mao gyud ang kaaway sa Manluluwas. Sila nagtinguha sa pagpatay Kaniya tungod kay Siya mihulga sa ilang mga tradisyon. Apan miawhag og balik kanila si Jesus sa paghinulsol ug mosunod sa kamatuoran. Anaa sa mga kasulatan nga dili mominus og 10 ka dagkong mga wali nga gidirekta ni Jesus niining mga lider diin Iyang gipakita ang ilang mga sala ug midapit kanila sa paghinulsol.
Si Jesus nagmangiloy-on pinaagi sa paglikay nga mobati og pagdumot.
Ang Jerusalem mao ang dapit sa pag-antus ug kamatayon sa Manluluwas. Siya unta mahimong masuko sa mga tawo dinhi; apan Siya kanunay nagpahayag og kasubo sa ilang mga kadautan ug pagdumili sa paghinulsol.
Sa mga adlaw sa wala pa Siya Gilansang, misakay og asno si Jesus paingon sa Jerusalem. Usa ka panon sa mga sumusunod nagmaya, nagbuklad sa ilang mga kupo diha sa Iyang atubangan ug misimba sa Dios. (Tan-awa sa Lucas 19:28–38.) Apan si Jesus nasayud nga ang kamaunungon sa mga tawo sa Jerusalem dili molungtad. Samtang Siya nagsud-ong sa siyudad atol sa Iyang katapusang semana, ang Manluluwas mihilak, nag-ingon, “O Jerusalem, Jerusalem, nga nagapatay sa mga propeta, ug nagabato sa mga sinugo nganha kanimo, sa makadaghan gipangandoy ko ang pagtigom unta sa imong mga anak, … apan nagadumili kamo!” (Mateo 23:37; tan-awa usab Lucas 19:41–44).
Pipila lang ka adlaw ang milabay, ang mga katawhan nakigbatok ni Jesus ug misinggit nga Siya pagasilutan. Samtang ang Manluluwas padulong nga ilansang sa krus, “usa ka dakong panon sa katawhan, ug sa mga babaye, … nanaghilak ug nanagminatay tungod kaniya.
“Apan si Jesus milingi ug miingon ngadto kanila, mga Babayeng anak sa Jerusalem, ayaw kamo paghilak tungod kanako, hinonoa panghilak kamo tungod sa inyong kaugalingon, ug tungod sa inyong mga anak” (Lucas 23:27–28). Bisan pa sa Iyang pagpaubos diha sa publiko ug grabing personal nga mga mag-antus diha sa kamot sa mga katawhan sa Jerusalem, ang Manluluwas wala gayud mobati og pagdumot kanila ug mipahayag sa kaguol nga sila midumili sa paghinulsol.
Si Jesus nagmanggiloy-on pinaagi sa pagtabang sa uban nga nanginahanglan.
Atol sa usa sa Iyang panaw, si Jesus duol na sa siyudad sa Nain, diin Siya nakakita og “giyayongan paingon sa gawas nga usa ka minatay nga bugtong anak nga lalaki sa usa ka inahan nga balo” (Lucas 7:12). Si Elder James E. Talmage (1862–1933) sa Korum sa Napulog Duha ka mga Apostoles naghulagway sa nahitabo nga milagro diha sa iyang libro nga Jesus the Christ: “Ang atong Ginoo nagtan-aw nga naluoy niining masulub-ong inahan, nga nawad-an na og bana ug anak; ug, Siya Mismo mibati sa kasubo sa inahan, Siya miingon sa malumo nga tuno, ‘Ayaw na paghilak.’ Iyang gihikap ang gihigdaan sa minatay [ug] … miingon Siya ngadto sa patay: ‘Dong, ingnon ko ikaw, Bangon.’ Ug ang patay nakadungog sa Iyang tingog kinsa mao ang Ginoo sa tanan, ug dayon milingkod ug namulong. Mabination nga gihatag ni Jesus ang batan-ong lalaki ngadto sa iyang inahan.”5
Si Jesus mipahigayon og daghang mga milagro alang sa mga tawo atol sa panahon sa panginahanglan. Siya miayo og sanglahon, mipakalma sa dagat, ug gibuhi pagbalik ang anak nga babaye ni Jairo. Siya miayo sa tawo nga masakiton diha sa lawa sa Betesda, sa usa ka bungol nga maglisud sa pagsulti, ug sa 10 ka sanglahon. Silang tanan hilabihang nanginahanglan.
Si Jesus mipahigayon og daghang mga milagro alang sa mga tawo atol sa panahon sa panginahanglan. Siya miayo og sanglahon, mipakalma sa dagat, ug gibuhi pagbalik ang anak nga babaye ni Jairo.
PAGHULAGWAY PINAAGI NI Dan Burr
Gimarkahan sa Manluluwas ang dalan nga sundon. Kita naningkamot nga magmanggiloy-on pinaagi sa dili pagbasol sa uban, mohigugma kay sa mopanghimaraut, paghatag sa uban og daghang mga oportunidad sa paghinulsol, paglikay nga mobati sa pagdumot, ug pagtabang sa uban nga nanginahanglan. Kon mas atong ilhon ug hinumduman ang daghang kalooy nga gihatag kanato ni Jesukristo, mas makakat-on kita nga magmanggiloy-on ngadto sa uban.
Si Presidente Uchtdorf mitambag: “Igo na ang kasakit ug kasub-anan niini nga kinabuhi nga dili na kini dugangan pinaagi sa atong kaugalingong kagahi sa ulo, kayugot, ug kasilag. … Kinahanglan atong isalikway ang atong mga mulo. … Kana mao ang paagi sa Ginoo.”6
Sa dihang ang nabanhaw nga Ginoo mibisita sa mga Nephite sa Amerika, Siya mitudlo sa mga tawo. Ug sa dihang miabut na ang panahon nga Siya mobiya, si Jesus “milibut sa iyang mga mata pag-usab ngadto sa pundok sa mga katawhan, ug nakakita nga sila naghilak. …
“Ug siya miingon ngadto kanila: Tan-awa, ang akong kasingkasing napuno sa kapuangod diha kaninyo.
“Aduna ba kamo dihay mga masakiton? … Dad-a sila ngari ug Ako moayo kanila, kay Ako adunay kalooy diha kaninyo; ang akong kasingkasing napuno sa kalooy” (3 Nephi 17:5–7; emphasis gidugang). Ang Iyang kalooy walay kinutuban. Siya mopanalangin kanato uban sa balaanong gasa sa kalooy kon kita moduol Kaniya (tan-awa sa Moroni 10:32).