Sa Unsang Paagi Giestablisar ang Doktrina?

Ni LaRene Porter Gaunt

Mga Magasin sa Simbahan

Ang doktrina moabut karon sama sa karaan—pinaagi sa balaan nga pagpadayag ngadto sa mga propeta.

Isip mga Santos sa Ulahing mga Adlaw “kami nagtuo sa tanan nga gipadayag sa Dios, sa tanan nga gipadayag niya karon, ug kami nagtuo nga siya mopadayag pa og daghan nga dagko ug mahinungdanon nga mga butang kalabut sa Gingharian sa Dios.” (Mga Artikulo sa Hugot nga Pagtuo 1:9).

Sa relasyon tali sa pagpadayag ug doktrina, si Elder D. Todd Christofferson sa Korum sa Napulog Duha ka mga Apostoles miingon, “Sa Simbahan karon, sama sa karaan, ang pag-establisar sa doktrina ni Kristo o pagkorihir sa doktrinal nga mga sayop nagkinahanglan sa balaang pagpadayag ngadto sa gitugahan sa Ginoo sa apostolikanhong awtoridad.”¹

Sama nga ang pagpadayag mao ang paagi diin ang doktrina madawat sa mga propeta, manalagna, ug tigpadayag, kitang tanan mismo makadawat usab og pamatuod nga ang mga doktrina sa ebanghelyo ni Jesukristo tinuod. Kining personal nga pagpadayag madawat pinaagi sa pag-ampo, pagtuon sa kasulatan, ug saksi sa Espiritu Santo. Atong gipakita nga atong gidawat ang doktrina ni Jesukristo pinaagi sa paghinulsol, pagpabunyag, pagdawat sa gasa sa Espiritu Santo, ug pagpadayon sa pagsunod sa mga balaod ug pagtuman sa mga pakigsaad sa ebanghelyo sa atong tibuok kinabuhi.

Ang mosunod nga flowchart, gibase sa pakigpulong ni Elder Christofferson sa Abril 2012 nga kinatibuk-ang komperensya, mopakita sa unsang paagi giestablisar ang doktrina.²

Ang pagpadayag sa doktrina nagagikan ni Jesukristo

Kon ang pinadayag mao ang doktrina sa tibuok simbahan, kini madawat lang sa Unang Kapangulohan ug sa Korum sa Napulog Duha ka mga Apostoles (tan-awa sa Amos 3:7; D&P 1:38; 28:2).

Ang pinadayag moabut pinaagi sa …

Iyang personal nga pagpakita

Ang Dios nagpakita ngadto kang Moises ug gipakita kaniya ang talagsaong buhat sa Iyang mga kamot (tan-awa sa Moises 1:1–9; tan-awa usab sa Joseph Smith—Kasaysayan 1:15–20).

Iyang kaugalingon nga tingog

Ang Ginoo nakigsulti ngadto kang Nephi ug gisugo siya sa paghimo og barko aron dalhon iyang pamilya ngadto sa Amerika (tan-awa sa 1 Nephi 17:7–8).

Tingog sa Espiritu Santo

Kini nga matang sa pagpadayag makomunikar Espiritu ngadto sa espiritu. Ang mga Apostoles sa Bag-ong Tugon nakadawat og kumpirmasyon pinaagi sa Espiritu Santo nga dili na ipasunod ang balaod ni Moises sa bag-ong mga kinabig (tan-awa sa Mga Buhat 15:5–29).

Mensahero

Mga mensahero nga sila si Moises, Elias, ug Elijah mipakita kang Joseph Smith ug Oliver Cowdery ug ang matag usa nila mihatag sa mga yawe sa ilang dispensasyon ngadto sa Propeta (tan-awa sa D&P 110:11–16).

Ang Pinadayag mahimong madawat sa …

Presidente sa Simbahan

Ang propeta ug Presidente sa Simbahan makadawat sa pinadayag nga mahimong doktrina kon kini paluyohan sa hiniusang tingog sa Unang Kapangulohan ug sa Korum sa Napulog Duha ka mga Apostoles (tan-awa sa Mga Buhat 10; Opisyal nga Pahayag 2).

Mga Propeta nga Naglihok isip Konseho

Ang mga disipulo sa Amerika nag-ampo aron masayud unsay ilang ipangalan sa Simbahan. Si Kristo mipakita ngadto kanila ug mitubag, “Bisan unsa ang inyong buhaton, kamo mobuhat niini pinaagi sa akong ngalan; busa kamo motawag sa simbahan sa akong ngalan” (3 Nephi 27:7).

Ang Unang Kapangulohan

Ang Korum sa Napulog Duha ka mga Apostoles