Gikan sa Misyon
Agi sa Nipis nga Bong-Bong
Ang tagsulat nagpuyo sa Utah, USA.
Wala kami makaamgo hangtud sa kaulahian nga, samtang nagtudlo kami og usa ka pamilya sa ebanghelyo, nagtudlo usab kami sa ilang silingan sa tupad.
Isip mga sister missionary, gipakigbahin namo ang ebanghelyo ngadto sa usa ka babaye nga nagpuyo sa kasarangang kahimtang sa ubos sa usa ka dakong bungtod duol sa labayanan og basura sa kahilitan sa Asunción, Paraguay.
Si Soledad ug ang iyang bana, si Oscar, nagpuyo sa usa ka kwarto sa usa ka taas, pig-ot nga balay nga sumpay-sumpay nga mga kwarto, nipis kaayo nga mga bong-bong. Ang matag kwarto usa ka gamay nga pinuy-anan nga may usa ka bintana, usa ka pultahan, usa ka lamesa, ug usa ka higdaanan. Dihay daghan sa ingon niini nga mga building niini nga dapit, binuhat sa kahoy, nga kugon ang atop ug yuta ang salog. Ang mga lapok nga gipamasok sa mga lungag makapawala sa katugnaw.
Naminaw si Soledad
Si Soledad inahan sa tulo ka gagmayng mga bata, ug siya batan-on usab—ug nabug-atan. Ang iyang tanang mahimo mao ang pag-atiman sa iyang panimalay ug sa matag adlaw nga mga panginahanglan sa iyang mga anak. Apan ingon og gusto siya sa among pagbisita ug nakaamgo sa panginahanglan alang sa Dios sa iyang kinabuhi.
Gipahayag ni Soledad ang iyang mga hunahuna ug mga pagbati nga gawasnon. Nahigugma siya ug milayas sa ila uban ni Oscar, bisan tuod ang iyang mga ginikanan wala motugot. Siya ug ang iyang bana wala makahuman og eskwela o walay trabaho, ug ang ilang kaugmaon ingon og walay klaro. Naghunahuna siya nga gibiyaan sa Dios ug gisilutan ba sila Niya tungod sa dili maayong mga pagpili nga ilang gihimo.
Si Oscar mamaligya og mga alahas sa kabalayan sa paningkamot sa pagtabang sa iyang pamilya nga mabuhi. Kon malampuson ang iyang adlaw, mopalit siya og pagkaon ug, usahay, gagmayng mga gasa alang sa mga anak. Apan kon gamay ra ang halin, mopauli siya nga dili malipayon, masuk-anon, ug hubog.
Nahagit kami sa pagtabang nila sa pag-atubang og daghan kaayong temporal nga mga problema. Apan gibati usab namo pinaagi sa Espiritu sa pagpadayon sa paghigugma ug sa pagtudlo nila, bisan tuod og usahay makapasubo ang ilang pag-uswag. Human sa pipila ka mga pagbisita ug human sa sinsero nga pag-ampo, kami sa katapusan mibati nga hatagan namo sila og panahon sa paghunahuna sa among gitudlo, sa pagtuon sa Basahon ni Mormon, ug pag-ampo sa ilang kaugalingon.
Among gipasabut ang among plano ni Soledad, ug siya wala makagusto.Gibati niya nga biyaan na namo ang iyang pamilya. Misulti usab siya namo nga mabdos siya sa ilang ikaupat nga anak ug wala masayud kon unsaon nila sa paglahutay. Sa kasuko misulti siya namo sa pagbiya ug dili na mobalik.
Si Juan Naminaw Usab
Wala kami mahibalo, bisan pa niana, ang tupad nila nga silingan, si Juan, nagpaminaw diha sa bong-bong sa unsay among gitudlo. Batan-on siya, kuryuso ug maulawon kaayo. Samtang siya naminaw, duna siyay daghang mga pangutana sa plano sa kaluwasan, sa Basahon ni Mormon, ug paghinulsol. Nanghulam siya sa kopya sa Basahon ni Mormon ni Soledad, nagbasa, ug nag-ampo kabahin sa tanan niyang hilom nga nakat-unan.
Milabay ang mga adlaw. Nabalaka si Juan sa dihang kami wala na mobalik sa pagtudlo ni Soledad ug Oscar.Dayon usa ka gabii niana, samtang adunay grabe nga unos sa tingtugnaw, nangutana siya ni Soledad asa kami magpuyo ug unsaon niya pagkontak namo. Miingon siya nga wala siya masayud, ug misugod si Juan sa paghilak. Mipamatuod siya ngadto ni Soledad sa kamatuoran sa among mensahe ug midagan sa gawas sa unuson nga gabii sa pagpangita namo samtang kusog ang ulan, nga nakapabaha sa kadalanan og lapok.
Milabay ang mga oras, gikapoy ug gitugnaw, nagpadayon siya sa pagpangita. Misugod siya sa pag-ampo samtang naglakaw siya sa kangitngit, nagsaad sa iyang Amahan sa Langit nga kon Siya motabang kaniya nga makakita kanamo, magpabunyag siya ug moserbisyo Kaniya sa iyang tibuok kinabuhi. Sa kasamtangan, si Soledad, nadasig sa pagpamatuod ni Juan, misugod sa pag-ampo nga kami mobalik. Mipauli si Juan apan nagpadayon sa pag-ampo ug pagbasa sa Basahon ni Mormon sa misunod nga duha ka adlaw. Si Soledad usab nag-ampo sa kinasingkasing ug nakigsulti ni Oscar. Silang duha nagsugod sa pagbasa sa Basahon ni Mormon.
Ug Naminaw ang Langitnong Amahan
Duha ka adlaw human sa unos, samtang ang akong kompanyon ug ako nag-ampo, gibati namo nga mobalik ngadto sa gagmayng panimalay sa ubos sa bungtod. Miadto dayon kami, ug sa among pag-abut, gisugat kami og mga luha sa kalipay ug kadasig nila ni Soledad, ni Oscar, ilang mga anak, ug ni Juan. Misulti sila namo sa tanang nahitabo, ug sukad nianang higayona, silang tanan gusto nang makat-on sa ebanghelyo. Wala madugay nabunyagan si Juan, ug misunod sila si Soledad ug si Oscar.
Nahinumdom ko nga naghunahuna nganong kusog kaayo ang pagdasig sa pagpadayon sa pagtudlo nila ni Soledad ug Oscar nga dili man kaayo sila interesado. Nakahinumdom ko nga naghunahuna nganong mibati mi nga magdali sa pagbalik nga giabug man kami tungod sa kasuko. Apan samtang nakakita ko sa kalipay nga miabut sa kinabuhi ni Juan ug dayon sa pamilya ni Soledad ug Oscar, nasayud ko nga dili lang si Juan ang naminaw agi sa nipis nga bong-bong apan ang Langitnong Amahan naminaw sa mga pag-ampo gikan sa matag usa namo, pag-ampo nga nagagikan sa kasingkasing.