Ang Duha ka Bag-ong mga Deacon
Anthony Poutu, New Zealand
Pipila ka tuig ang milabay ako adunay kahigayunan sa pagserbisyo isip adviser sa korum sa deacon. Sa among korum kami adunay tulo ka aktibo nga mga deacon, silang tanan gitawag nga mahimong kabahin sa kapangulohan sa korum.
Sa usa sa ilang mga miting, kining batan-ong kapangulohan nakahukom nga gusto nila nga bisag duha lang sa dili kaayo aktibo nga mga deacon sa ilang korum magsugod sa pagtambong sa miting ug mga kalihokan sa Simbahan. Sila mainampuong nakigsabut og petsa—usa ka Dominggo mga unom ka mga semana sumad adto nga adlaw—nga makab-ot ang ilang tumong. Sila nag-ampo nga molampus niining sagradong mga paningkamot ug mainampoong misaad nga buhaton ang mosunod:
-
Mag-ampo og dungan kanunay.
-
Magpuasa og dungan.
-
Magbisita sa matag deacon nga anaa sa listahan.
-
Magplano og mga kalihokan aron si bisan kinsa nga mobalik og kaaktibo nga deacon mosulod sa maayong pagka-organisar nga programa.
Ang kapangulohan mibati gayud nga kining mga tumong mao ang kabubut-on sa Ginoo, busa nagpadayon sila nga may hugot nga pagtuo ug pagsalig.
Atol sa mosunod nga mga semana, kining tulo ka batan-ong mga lalaki mibuhat sa ilang gipangsaad, nagpaabut nga ang ilang mga pag-ampo pagatubagon. Sila dungan nga nag-ampo, nagpuasa, nagbisita sa mga deacon nga dili kaayo aktibo ug nagdapit kanila sa pagbalik, ug nag-andam og mga kalihokan, nagtuo nga sila kinahanglan nga maandam alang sa dugang nga manambong.
Bisan pa sa ilang kakugi, walay deacon mibalik—sa simbahan o sa bisan unsang kalihokan. Ang petsa nagkaduol na, ug bisan tuod sila nawad-an og kadasig nga ang mga sakop sa ilang korum wala mobalik sa simbahan, ang batan-ong mga lalaki nagpabiling masaligon nga ang Langitnong Amahan motubag sa ilang mga pag-ampo.
Miabut ang Dominggo nga maoy petsa sa ilang tumong, ug walay usa sa batan-ong mga lalaki nga gitabangan sa kapangulohan misimba. Apan ang bishop mipahibalo atol sa sakrament miting nga duha ka 12 anyos batan-ong lalaki kinsa nag-imbestigar sa Simbahan mabunyagan nianang gabhiona.
Dako nga panalangin alang niining duha ka bag-ong mga miyembro sa Simbahan nga maapil sa korum sa ingon niini nga kapangulohan. Ug dako nga panalangin alang sa kapangulohan nga makita nga direktang gitubag ang ilang mga paningkamot ug pag-ampo ug sa pagkasayud nga ang Ginoo mituman sa Iyang mga saad.
Ingon niana ang kahinam diha sa korum nga usa sa sakop sa kapangulohan miingon, “Buhaton nato kini pag-usab.”