Mga Lakang paingon sa Kalipay

Ni Elder D. Todd Christofferson

Sa Korum sa Napulog Duha ka mga Apostoles

Gikan sa pakigpulong nga gihatag ngadto sa kabatan-onan sa Salta, Argentina, niadtong Nobyembre 2011.

Ang mga kasugoan wala gihatag sa pagpugong apan sa paghimong posible sa atong tinuoray nga tinguha ug unsay gusto sa atong Langitnong Amahan, kinsa nahigugma kanato, nga kita mamahimo.

Paghulagway pinaagi ni David Habben; paghulagway sa litrato pinaagi ni Robert Casey © IRI

Usahay, ang ubang mga tawo naglibog, naghunahuna nga ang mga kasugoan mga restriksyon o limitasyon nga nakapalisud sa kinabuhi, nga makapawala sa mga oportunidad o sa kalipay o sa kahayahay sa kinabuhi. Sa pagkatinuod, ang mga kasugoan makapanalipod ug makagiya nato ngadto sa kalipay. Kini wala magpugong apan hinoon sa paghimong posible—nga motugot kanato sa pagkab-ot niining kinabuhia ug sa sunod—sa atong tinuoray nga tinguha ug unsay gusto sa atong Langitnong Amahan, kinsa nahigugma kanato, nga kita mamahimo.

Kini sama sa mga hagdanan. Ang kada lakang nagrepresentar sa usa ka sugo, ug sa matag sugo nga atong nasunod, kita makapadayon sa taas. Dayon, kon kita nakasabut sa kahulugan sa mga sugo, mas gusto pa natong dugangan. Dili kita mobati og kasuko kabahin sa mga kasugoan; mas gusto natong dugangan aron kita mas molambo. Ug ang Langitnong Amahan kinsa nahigugma kanato mohatag sumala sa atong mga tinguha. Kon kita nagtinguha niini, Iya kitang hatagan og mas daghang kasugoan aron makatabang sa atong paglambo.

Busa, mga batan-on, palihug ayaw og reklamo kabahin sa mga kasugoan. Ayaw og ingon, “Dili nako gusto og dugang”, hinoon sulti og, “Sige pa. Gusto ko nga molambo. Gusto ko nga malipay. Gusto ko nga mahisama sa akong Langitnong Amahan. Ug gipakita sa mga kasugoan kon unsaon nako pagbuhat niini. Ipakita niini ang dalan ug moprotekta nako gikan sa kadautan ug sa mga butang nga makapawala sa kalipay—ug usahay kini moprotekta sa kinabuhi mismo.”

Ako naglaum nga kamo nakombinser. Buhaton nato ang tanang gikinahanglang butang sa pagsunod sa mga kasugoan, bisan kon kita daw nag-inusara samtang ato kining sundon.

Pag-apil sa Pag-istoryahanay

Tibuok Septyembre kamo magtuon kabahin sa mga kasugoan diha sa inyong korum sa priesthood ug mga klase sa Young Women ug sa Sunday School. Mahimo ninyong hunahunaon ang pipila ka mga sugo nga gipanglimbasugan sa inyong mga kaedad. Unsa nga mga panalangin nga nadawat ninyo o sa uban pinaagi sa pagsunod sa mga sugo? Pag-brainstorm og mga pamaagi nga kamo makapamatuod niadto nga mga panalangin sa mga tawo nga naglibut kaninyo, ug mosunod sa Espiritu aron masayud unsay isulti ug kanus-a kini isulti. Mahimong inyong i-drama-drama ang pipila ka mga ehemplo atol sa family home evening o ipakigbahin ang inyong pagpamatuod atol sa usa ka leksyon sa Sunday School.

Alang sa dugang niining hilisgutan, tan-awa sa Thomas S. Monson, “Ang Pagkamasulundon Makahatag og Panalangin,” Liahona, Mayo 2013, 89; ug L. Tom Perry, “Kalingkawasan ang Pagsunod sa Balaod,” Liahona, Mayo 2013, 86.

Mga Leksyon sa Dominggo

Hilisgutan Niining Bulana: Mga Kasugoan